As jy die naam Hilda en 7de Laan (die SABC2-sepie) sê, is dit sinoniem met vreemde koskonkoksies en serpies. Die aktrise Annelisa Weiland het dié karakter die afgelope tien jaar baie geliefd gemaak onder Suid-Afrikaanse kykers. Marguerite van Wyk het by haar gaan hoor watter rol 7 de Laan in haar lewe speel.

Hoe kry 'n mens dit reg om ná tien jaar nog opgewonde te bly oor jou karakter?
Met 'n sepie weet 'n mens nooit wat voorlê nie en elke nou en dan is 'n mens betrokke by 'n storie wat prikkelend is. Jy het heeltyd nuwe geleentheid om met 'n verskeidenheid akteurs te werk en dit hou jou op jou tone. Dit is in elke geval jou professionele plig om opgewonde te bly!

Hoe het Hilda se rol gegroei die afgelope tien jaar?
Die Hilda karakter (oujongnooi) het begin as 'n vaal ontvangsdametjie by dr SP de Wet-Malan se spreekkamers. Nie lank daarna nie is sy in 'n liefdesdriehoek vasgevang en uiteindelik het Oubaas haar hart verower. Sy het ook ontpop as 'n waaghals op haar bromponie ''Saartjie'', 'n vindingryke kok en 'n skepper van interessante Ikebanas.

Wat het 7 de Laan jou oora)die lewe en b) toneelspel geleer?

a) Oor die lewe: Truth is stranger than fiction.
b) Oor toneelspel: Wees eerlik en bereid om in die diepkant in te spring.

Hoe is dit om saam met Danie Odendaal, die vervaardiger te werk?
Ek het ongelooflike respek vir hom (en Annie, as mede-vervaardiger) as mens en as baas. Hulle kry dit reg om die sepie soos 'n groot familie te laat voel. Maar moenie dink jy gaan wegkom met enigiets wat hy nié goedkeur nie. Hy is altyd 'hands on'. Hulle handhaaf hoë standaarde.

Wat is die grootste uitdaging vir sepie-akteur?
Dis 'n baie tegniese medium, so 'n mens moet baie goed voorbereid wees, sodat jy nie konsentrasie verloor met alles wat rondom jou gebeur nie. Ons werk teen 'n verskriklik tempo en moet vinnig by 'n emosie uitkom. Omdat daar vier regisseurs is, moet 'n mens kan aanpas, want elkeen het hul eie manier van werk. Bo en behalwe alles, moet 'n mens uithouvermoë hê en besef jy is net deel van 'n groot, gulsige masjien.