Stel ons op die proef, vir nuus wat jy kan vertrou. Registreer vir 30 dae gratis
Boeke
Ou familielid kom kuier
Die Nederlandse jeugboekskrywer Benny Lindelauf was onlangs in die land om Afrikaanse skoolkinders se kreatiwiteit en hul belangstelling in Nederlands te prikkel. Jaco Jacobs, een van die Afrikaanse skrywers wat as deel van die werksessies opgetree het, vertel meer oor die projek.
Benny Lindelauf saam met een van die jong deelnemers van die skryfskool.

As jy in die 1990’s en vroeër op skool was, onthou jy waarskynlik ’n Nederlandse voorgeskrewe boek of twee, soos De Witte Boot of Koning van Katoren. Deesdae is Nederlands egter nie meer ’n deel van die voorgeskrewe Afrikaanse kurrikulum nie en al hoe minder Afrikaanssprekende kinders kry enigsins blootstelling aan ’n wêreldtaal wat ons eintlik maklik verstaan.

Dit is waarom Sasnev (die Suid-Afrikaanse Sentrum vir Nederland en Vlaandere) vanjaar besluit het om die Nederlandse jeugboekskrywer Benny Lindelauf na Suid-Afrika te bring om skryfwerksessies vir tieners aan te bied.

Lindelauf, van wie twee boeke, Nege oop arms en Die hemel van Heivisj, onlangs deur Daniel Hugo in Afrikaans vertaal en deur Protea gepubliseer is, het saamgespan met Afrikaanse jeugboekskrywers soos Nanette van Rooyen, Eldridge Jason, Fanie Viljoen, Marisa Haasbroek, Alet Steenkamp en Nerine Ahlers vir optredes in Kaapstad, Bloemfontein, Pretoria en Port Elizabeth.

In Bloemfontein is die projek met groot geesdrif begroet. Meer as 100 kinders van skole soos Virginia en Bethlehem was die Vrydagoggend vroeg op hul pos om hul kreatiwiteit te kom slyp.

Ek en kollega Fanie Viljoen is eerste aan die beurt met ’n paar skryfwenke, en dan is dit Benny se beurt.

Dit is sommer uit die staanspoor duidelik waarom hy ’n goeie keuse vir die projek was – hy is spontaan en entoesiasties. Aanvanklik is die jong gehoor duidelik ’n bietjie geïntimideer deur die Nederlands, maar toe Benny met ’n kitaar op die verhoog gaan sit en begin sing, ontdooi hulle sigbaar. En teen die tyd dat hy met kreatiewe skryf­oefeninge begin, kan jy sien hoe die Nederlands reeds gemaklik op die Afrikaanse ore begin val.

“Wat is die teenoorgestelde van ‘boom’?” vra Benny.

“Wortels,” antwoord iemand.

“Gras,” kom nog ’n probeerslag.

“En die teenoorgestelde van ‘Nelson Mandela’?”

“Jacob Zuma!”, “Julius Malema!” dreun dit soos een man deur die saal.

Dinge word nog ’n bietjie moeiliker gemaak. Jeanne Goosen se gedig “Nog nooit het ek mooier geskilder” verskyn op die bord. Nou moet die groepe die gedig oorskryf deur elke woord met die teenoorgestelde te vervang. Ek loop tussen die groepe deur en is heimlik dankbaar ek hoef nie te probeer uitpluis wat die teenoorgestelde van “dartelende nartjies” en “hoogmoedige wandelstokke” is nie.

Lindelauf, ’n ervare aanbieder van skryfwerksessies, het agterna gebieg hy was ietwat senuweeagtig om met so ’n groot groep skoolkinders te werk, maar hy was baie beïndruk deur hul konsentrasie en die manier hoe hulle hulle oorgegee het aan die taal- en kreatiewe eksperimente.

Elke skool het ’n boek van Lindelauf present gekry, asook ’n plakkaat van Sasnev oor die verbintenis tussen Afrikaans en Nederlands.

Eureka Barnard, bestuurshoof van Sasnev, sê met vanjaar se boektoer wou hulle die Afrikaanssprekende jeug en hul onderwysers aan ’n bekende en suksesvolle Nederlandse jeugverhaalskrywer voorstel – en Afrikaanse jongmense daarvan bewus maak dat hulle deel is van ’n taalgemeenskap van 30 miljoen mense.

“Dit is lekker om te sien hoe maklik die leerlinge Benny se Nederlands verstaan. In die Kaap het leerlinge wonderlike teks geskryf en in Bloemfontein het hul teks en dissipline Benny baie beïndruk. Die kombinasie om bekende Afrikaanse skrywers saam met ’n Nederlandse een te laat optree werk baie goed.”

Sasnev wil Nederlands graag terugbring in Afrikaansklasse. Hul Nederlandse lespakket, “Eenders en anders”, is ontwikkel vir leerlinge van gr. 6 tot gr. 11 en skakel in by Pearson-uitgewers se gewilde Platinum-taalhandboeke. Dit sal gereed wees vir 2015 en voldoen aan die vereistes van die KABV (Kurrikulum- en Assesseringsbeleidsverklaring).

Vir meer inligting oor Sasnev of die Nederlandse lespakkette, besoek www.sasnev.co.za of kontak Eureka Barnard by
eureka@sasnev.co.za

■ Jaco Jacobs is ’n bekroonde kinderboekskrywer en -vertaler. 

NETWERK24 Stemme

Hallo, jy moet ingeteken wees of registreer om artikels te lees.