Kaapstad Verander Area

Vandag


25°C / 14°C

Wind 19km/h


Reënval 0.0mm


Humiditeit 57%

Dinsdag


24°C / 16°C

Wind 21km/h


Reënval 0.4mm


Humiditeit 68%

Woensdag


24°C / 16°C

Wind 17km/h


Reënval 0.0mm


Humiditeit 57%

Donderdag


25°C / 18°C

Wind 22km/h


Reënval 0.0mm


Humiditeit 65%

Vrydag


23°C / 16°C

Wind 30km/h


Reënval 0.1mm


Humiditeit 56%

Saterdag


26°C / 18°C

Wind 36km/h


Reënval 0.0mm


Humiditeit 53%

Nuus

Guptas se lot lê by vervolger

Verslag bekend gemaak

Deur James-Brent Styan, Sapa Maandag 20 Mei 2013 3:02 vm.

Foto: Verskaf

Kaapstad. – Die Suid-Afrikaanse Polisiediens en die Nasionale Vervolgingsgesag moet besluit of die Gupta-familie vervolg gaan word weens die onlangse onregmatige landing van hul vliegtuig op die lugmagbasis Waterkloof.

So het Jeff Radebe, minister van justisie, gister gesê toe hy die verslag oor die ondersoek na die onregmatige landing bekend gemaak het.

“Die besluit oor vervolging lê by die nasionale polisiekommissaris (Riah Phiyega) en haar amptenare,” het Radebe gesê.

“Die besluit oor wié vervolg moet word, lê by die Nasionale Vervolgingsgesag. Dié besluit moet geneem word sonder aansien des persoons en selfs nie eens die minister mag daarby inmeng nie.”

Radebe het gesê die regering gaan ook kyk na die gebruik in regeringskringe om mense se naam te misbruik om gunste te bekom.

Hy het bevestig die ministers van vervoer en verdediging, asook pres. Jacob Zuma se naam, is gebruik om sekere dinge tydens die Gupta-troue, wat ’n paar weke gelede by Sun City gevier is, te laat gebeur.

“Die definisie van wangedrag moet aangepas word in wetgewing sodat die misbruik van die name van die uitvoerende gesag as wangedrag hanteer kan word.”

Radebe het ook gesê die Waterkloof-lugmagbasis is nie ’n nasionale sleutelpunt nie.

“Die lugmagbasis is geklassifiseer as ’n strategiese militêre basis wat gereguleer word deur die Verdedigingswet no. 44 van 1957.

“Dit beteken die basis het selfs strenger veiligheidsmaatreëls as nasionale sleutelpunte.”

Radebe het gesê die Nasionale Wet op Sleutelpunte word bestuur deur die departement van polisie. Hy het aangedui dat die verantwoordelikheid vir die wetgewing in 2004 geskuif is van die departement van verdediging na dié van die polisie.

“Die lugmagbasis hanteer siviele sowel as militêre vliegtuie,” het Radebe gesê.

Luidens die verslag was 194 regeringsamptenare betrokke by die Gupta-troue.

In die ondersoek, wat gedoen is onder leiding van Dennis Dlomo, waarnemende direkteur-generaal van staatsveiligheid, is ook gevind dat die Guptas 88 voertuie gebruik het (nie noodwendig staatsvoertuie nie) en 296 private veiligheidswagte gehuur het.

Die familie het twee vliegtuie en sewe private helikopters gebruik om trougaste te vervoer tussen Waterkloof en Sun City.

Radebe het gesê die Airbus A330-200 wat die Guptas by Jet Airways vir bruilofsgaste gehuur het, het toestemming gehad om op die lugmagbasis te land. Dié toestemming is gegee deur die lugmag se beheersentrum gegrond op die nodige klaringsprosedures.

“Dié klaringsprosedures was egter gegrond op vals inligting en die misbruik van diplomatieke privilegie,” het Radebe bygevoeg.

“Die kombinasie van laasgenoemde twee het gelei tot die manipulasie van die (landings-) proses deur verskeie persone,” het Radebe gesê.

Hy het bygevoeg die mense wat luidens die ondersoekverslag saamgewerk het om die landing te bewerkstellig, sluit in die hoof van staatsprotokol, Bruce Koloane, en lt.kol. Christine Anderson, onderbevelvoerder van die lugmagbasis se verplasingsentrale in Pretoria.