Kaapstad Verander Area

Vandag


20°C / 14°C

Wind 26km/h


Reënval 2.0mm


Humiditeit 67%

Woensdag


21°C / 15°C

Wind 31km/h


Reënval 0.0mm


Humiditeit 71%

Donderdag


23°C / 14°C

Wind 27km/h


Reënval 0.0mm


Humiditeit 56%

Vrydag


23°C / 14°C

Wind 35km/h


Reënval 0.0mm


Humiditeit 62%

Saterdag


26°C / 17°C

Wind 26km/h


Reënval 0.0mm


Humiditeit 52%

Sondag


28°C / 15°C

Wind 17km/h


Reënval 0.0mm


Humiditeit 41%

Nuus

E-tol onnodig, wys studies

Brandstofheffing bring genoeg geld in

Deur James-Brent Styan Maandag 20 Mei 2013 2:50 vm.

Die elektroniese tolpunt tussen 14de Laan en Beyers Naudéweg op die N1 in Johannesburg. Foto: Lerato Maduna

Kaapstad. – Die regering se brandstofheffings genereer genoeg geld om vir nuwe paaie en die instandhouding daarvan te betaal.

Dit is in twee onafhanklike studies bevind. Dit is in kontras met die Suid-Afrikaanse Nasionale Padagentskap (Sanral) en die departement van vervoer, wat aanvoer dat nuwe tolpaaie, insluitende die e-tol-stelsel in Gauteng, landwyd nodig is om vir paaie te betaal.

Die Automobiel-Assosiasie (AA) en die Suid-Afrikaanse Bitumenvereniging (Sabita) het elkeen ’n studie gedoen oor instandhouding van die land se nasionale paaie.

Die studies het onder meer gekyk na die regering se gebruik al dan nie van die brandstofheffing om te betaal vir padherstelwerk en -instandhouding.

Luidens die bevindings is daar tussen 2003 en 2008 jaarliks ’n gemiddelde van R7,4 miljard aan Suid-Afrikaanse paaie bestee. Dit sluit nuwe paaie en instandhouding in.

In dieselfde tydperk het die regering ’n gemiddelde van R21 miljard met die brandstofheffing ingevorder.

Ian Ollis, DA-LP, sê Suid-Afrikaners moet begin vra waarom daar nie meer van dié beskikbare geld gebruik word vir die padnetwerk in die land nie.

Ollis sê die brandstofheffing sal vanjaar ’n geskatte R42 miljard in die staatskas sit.

“Daar is genoeg geld vir paaie. Maar dit word elders deur die regering bestee en nie aan die paaie waarvoor dit ingevorder word nie.”

Ollis voer aan Sanral en die regering wil hê Suid-Afrikaners moet betaal vir dié entiteite se ondoeltreffende gebruik van beskikbare geld.

Daar was in die verlede ’n afgebakende bedrag wat deur die brandstofheffing ingesamel is en net vir paaie gebruik is.

Dié afbakening is egter in 1988 geskrap. Tans word die heffings in die regering se algehele belastingpot gestort en orals toegedeel deur die tesourie.

Ollis sê planne vir nuwe tolpaaie is ’n skande gegewe die inligting rondom die brandstofheffing.

Ben Martins, minister van vervoer, het berigte oor nuwe tolpaaie ontken.

“Die regering op nasionale vlak moet nog met die provinsies vergader rondom die planne vir nuwe tolpaaie in die provinsies,” het Martins gesê.

Martins het gesê die regering en die provinsies sal saam kyk na die beste manier om paaie te ontwikkel.

“Hoe moet ons paaie in stand hou? Wat is die opsies vir die finansiering daarvan? Al dié kwessies moet eers bespreek word.”