Kaapstad Verander Area

Vandag


26°C / 13°C

Wind 14km/h


Reënval 0.0mm


Humiditeit 28%

Maandag


23°C / 12°C

Wind 28km/h


Reënval 0.0mm


Humiditeit 56%

Dinsdag


25°C / 13°C

Wind 24km/h


Reënval 0.0mm


Humiditeit 44%

Woensdag


21°C / 12°C

Wind 25km/h


Reënval 0.0mm


Humiditeit 56%

Donderdag


25°C / 12°C

Wind 26km/h


Reënval 0.0mm


Humiditeit 51%

Vrydag


30°C / 16°C

Wind 15km/h


Reënval 0.0mm


Humiditeit 24%

Nuus

Openbare beskermer besoek Nkandla

Deur James-Brent Styan Maandag 12 Augustus 2013 21:46

JOHANNESBURG. – Adv. Thuli Madonsela, openbare beskermer (OB), het pres. Jacob Zuma se private landgoed by Nkandla gister besoek.

Dié besoek is deel van haar ondersoek na staatsbesteding van tot R206 miljoen aan verbeterings aan Nkandla.

Nosiviwe Mapisa-Nqakula, minister van verdediging, en van haar senior amptenare was heeldag saam met Madonsela by Nkandla om haar in haar ondersoek te “ondersteun”, het Mike Ramagoma, die minister se adviseur, gesê.

“Die veiligheidsprotokol vir die besoek is vooraf deur die minister en die OB bespreek. Afgesien van die ondersteuning wat die minister en haar amptenare sal bied, sal hulle haar (Madonsela) toelaat om haar inspeksie uit te voer.”

Die OB en die regering het volgens Ramagoma reeds saamgestem daar moet verseker moet word dat die sekuriteit van Nkandla nie deur die besoek benadeel word nie.

Madonsela het vroeër aan Volksblad gesê sy sal met die Nkandla-ondersoek “soos altyd baie bedag wees om niemand se persoonlike veiligheid of die landsveiligheid” deur haar verslag in gevaar te stel nie.

“Indien die beskrywing van ’n spesifieke stuk bouwerk wel veiligheidsimplikasies kan hê, sal ons dit dus nie beskryf nie, maar steeds ’n openlike bevinding daaroor doen.”

Thulas Nxesi, minister van openbare werke, het sy departement se ondersoek na die Nkandla-projek vroeër ingevolge die minimum-inligting-veiligheidstandaarde geklassifiseer.

Nxesi het dié besluit blykbaar geneem omdat die verslag volgens die departement sensitiewe kwessies insluit wat Zuma se veiligheid kan bedreig indien dit uitlek.

Lindiwe Mazibuko, die DA se parlementêre leier, het die OB se besoek aan Nkandla verwelkom.

Daar is wel vrae oor die omvang van dié ondersoek nadat Jeremy Cronin, adjunkminister van openbare werke, vroeër vanjaar gesê het die departement se ondersoek het net “bouwerk-kwessies” betreffende die Nkandla-projek ingesluit. “Dit sluit in die koste van die bouwerk, hantering van die tenders en of die departement te veel betaal het of nie.”

Breë kwessies soos die spesifikasies vir die bouwerk en waarom goed aangevra is, het nie aandag gekry nie. Dié aspekte is eerder in die veiligheidsarena, het Cronin vroeër gesê.

Die OB het gister aangedui dat hulle hoop om die Nkandla-verslag teen die einde van die week te voltooi waarna die regering twee weke tyd sal hê om te reageer.