Kaapstad Verander Area

Vandag


24°C / 15°C

Wind 37km/h


Reënval 0.0mm


Humiditeit 62%

Saterdag


26°C / 14°C

Wind 37km/h


Reënval 0.0mm


Humiditeit 50%

Sondag


28°C / 17°C

Wind 23km/h


Reënval 0.0mm


Humiditeit 45%

Maandag


26°C / 16°C

Wind 29km/h


Reënval 0.0mm


Humiditeit 60%

Dinsdag


24°C / 16°C

Wind 36km/h


Reënval 0.0mm


Humiditeit 67%

Woensdag


25°C / 16°C

Wind 34km/h


Reënval 0.0mm


Humiditeit 60%

Nuus

Regering vasbeslote oor Aarto

‘Om te skrap, is nie opsie’

Deur Jinine Botha Maandag 02 September 2013 12:21 vm.

Die regering is vasbeslote om die gewraakte Wet op die Administratiewe Beregting van Padverkeersmisdrywe (Aarto) te máák werk.

Dit blyk uit kommentaar van die Agentskap vir Padverkeersmisdrywe (RTIA), wat dié boetes administreer.

“Die voorstel om Aarto te skrap word glad nie oorweeg nie. Dit is die regering se plig om wette toe te pas en burgers se lewens te beskerm,” het Mthunzi Mbungwana, woordvoerder van die RTIA, gesê.

Hy het gereageer op opposisiepartye en verskeie padveiligheidsinstellings se beroep op die regering om die stelsel te skrap.

Daar is ook gevra dat boetes wat nie ingevolge Aarto met geregistreerde pos uitgereik is nie, gekanselleer word omdat die stelsel sedert sy instelling vyf jaar terug met verskeie administratiewe nagmerries en praktiese probleme besaai is.

R2 miljard se Aarto-boetes is in die afgelope twee boekjare nie ingevorder nie, luidens ’n verslag wat vroeër vandeesmaand aan Dipuo Peters, minister van vervoer, oorhandig is.

Dieselfde verslag het ook aangedui dat verkeersboetes moontlik sal moet verdubbel om die stelsel te red.

Aarto, wat bepaal dat strafpunte vir sekere oortredings toegeken word en dat motoriste wat herhaaldelik oortree se rybewys opgeskort word, is nog net gedeeltelik in Johannesburg en Tshwane ingestel.

Die proeflopies was tot dusver rampspoedig en die Suid-Afrikaanse munisipale vereniging (Salga) het in 2012 in die parlement gevra dat Aarto afgeskaf word. Salga het gesê die stelsel het Johannesburg se inkomste uit verkeersboetes in die 2011-’12-boekjaar met meer as R100 miljoen laat afneem.

“Die nuutste Aarto-verslag toon duidelik dat die regering nie die regte stelsels het om miljarde rande se projekte in te stel nie,” het Mmusi Maimane, die DA se Gautengse premierskandidaat, gesê.

Adv. Anton Alberts, VF+-LP, het gesê Aarto is tans ’n peperduur wit olifant. “Aarto is ’n sinlose vermorsing van geld sonder enige resultate. Die minister moet dit nou stopsit.”

Rene Venter, wat boetes en lisensies namens vlootmaatskappye hanteer, het gesê hoewel sy steeds sukkel met Tshwane-owerhede, is die Johannesburgse metropolisie (JMPD) baie vinniger wanneer hulle boetes aan die bestuurder moet heruitreik.

Sy raai motoriste aan om hulle boetes se afleweringsdatums by die poskantoor na te gaan en as die boete nie binne die regte tyd afgelewer is nie, ’n vertoë (Aarto 8-vorm) aan die RTIA te rig. “Mense moenie net boetes ignoreer nie. Dinge verander oornag en ewe skielik kan jy nie jou lisensie hernu nie.”