04 Augustus 17:51
13°C / 16°C

Kaapstad Verander Area

Vandag


16°C / 13°C

Wind 8km/h


Reënval 0mm


Humiditeit 62%

Donderdag


20°C / 12°C

Wind 5km/h


Reënval 0mm


Humiditeit 48%

Vrydag


19°C / 13°C

Wind 10km/h


Reënval 0mm


Humiditeit 56%

Saterdag


17°C / 12°C

Wind 12km/h


Reënval 0mm


Humiditeit 72%

Sondag


16°C / 12°C

Wind 35km/h


Reënval 0mm


Humiditeit 70%

Maandag


13°C / 11°C

Wind 25km/h


Reënval 0mm


Humiditeit 65%

Nuus

Daar’s ’n hasie in Madiba se oor!

Deur Cobus Claassen Saterdag 18 Januarie 2014 00:48

Wát, ’n haas in Madiba se oor? Régtig, ’n háás?

Dít was gister die reaksie van Mack Lewele, woordvoerder van die departement van kuns en kultuur, toe hy gepols is oor die hasie wat by die regteroor van die standbeeld van oudpres. Nelson Mandela voor die Uniegebou uitloer.

Die reuse-bronsbeeld van Madiba is verlede maand op Versoeningsdag onthul enkele dae ná die ikoon se dood.

Lewele het gesê hulle was nie bewus van die haas nie en die departement gaan onmiddellik ondersoek instel.

Beeld het ’n foto wat een van sy fotograwe geneem het op versoek aan die departement gestuur.

“Ons kan nie kommentaar lewer voordat ons dit met ons eie oë gesien het nie,” het Lewele gesê.

Ruhan Janse van Vuuren en André Prinsloo, die twee Pretoriase beeldhouers wat die beeld gemaak het, het gister die aap uit die mou, of eerder die haas uit die oor gelaat oor dié verskynsel.

Hulle het gesê daar is in die ateljee op die hasie besluit nadat die departement hulle verbied het om hul handtekeninge onderaan die een broekspyp aan te bring.

Prinsloo het gesê hy en Janse van Vuuren het besluit om ’n “klein stempel” van hul werk te laat.

“Die haas is simbolies en verteenwoordig die haas waarteen die beeld gemaak moes word. Die tydfaktor was groot en ons het soms baie hard gewerk.”

Janse van Vuuren wou ’n merk laat wat sou beteken sy kleinkinders kan eendag daarna kyk en sê: “Dit is my oupa se handewerk.”

Volgens Prinsloo is die “klein simbooltjie” weggesteek in die oor en doen dit nie afbreuk aan die beeld nie.

“Jy het ’n langlens (kamera) of ’n verkyker nodig om dit te sien. Daar het baie mense gedurende die gietproses van naby na die beeld gekyk en niemand het dit raakgesien nie.

“Ons het vermoed iemand gaan dit die een of ander tyd raaksien, maar nie so gou nie. Daar is regtig geen dieper betekenis daaragter nie,” het Prinsloo gesê.

Janse van Vuuren het gesê hulle is bly die beeld het die afgelope maand ’n groot aantrekkingskrag in die hoofstad geword.

Die briewegleuf wat hulle op eie inisiatief in die beeld se linkerbobeen geplaas het, is ook baie gewild.

Lewele wou nie sê of die departement dit gaan oorweeg om die haas te verwyder nie.