Kaapstad Verander Area

Vandag


25°C / 16°C

Wind 33km/h


Reënval 0.0mm


Humiditeit 50%

Sondag


26°C / 16°C

Wind 28km/h


Reënval 0.1mm


Humiditeit 58%

Maandag


20°C / 16°C

Wind 30km/h


Reënval 40.8mm


Humiditeit 86%

Dinsdag


22°C / 15°C

Wind 18km/h


Reënval 0.4mm


Humiditeit 68%

Woensdag


23°C / 16°C

Wind 31km/h


Reënval 0.0mm


Humiditeit 68%

Donderdag


25°C / 16°C

Wind 36km/h


Reënval 0.0mm


Humiditeit 61%

Sake

ALTRON

Mark verlig oor Altech-oorname

Deur David van Rooyen Sondag 19 Mei 2013 7:33 nm.

Johannesburg. – Beleggers in die beleërde Altech-groep is duidelik baie verlig dat dié maatskappy se beheermaatskappy, Altron, nou die probleemkind van hul hande af wil neem.

Altron het Vrydag aangekondig dat hy al die aandele in Altech (Allied Technologies) wat hy nog nie besit nie, wil bekom, en dat hy ’n premie van 32% daarvoor aanbied. Altron besit reeds 61% van Altech.

Dié premie is egter feitlik heeltemal uitgewis, want Altech se aandeelprys het Vrydag in reaksie op die aankondiging met ’n yslike 29,69% tot R44,60 verbeter. Altron bied R47,50 aan.

Die premie van 32% is gegrond op die aandeelprys van R35,96 op 20 Maart, die laaste verhandelingsdag voordat aangedui is dat Altech en Altron met samesprekinge besig is wat ’n invloed op die aandeelprys kan hê.

Na dié aankondiging is wyd bespiegel dat die onderhandelinge op ’n moontlike oorname dui – Altron het dit al vroeër probeer doen, maar kon toe nie die nodige steun daarvoor kry nie.

Dié keer gaan dit waarskynlik anders wees, want Altech se aandeelprys was teen die einde van April op die laagste vlakke in vyf jaar nadat die maatskappy se winsgewendheid die afgelope jaar sterk onder druk was.

Dis weens die groot verliese wat Altech se filiale in Oos- en Wes-Afrika gely het. Die verliesmakende filiale is sedertdien verkoop.

Altron het Vrydag aangekondig dat 59,1% van Altech se minderheidsaandeelhouers onderneem het om sy aanbod te aanvaar.

Altech het onder meer op 24 April vanjaar aangekondig dat hy die eerste keer nóg nie ’n dividend gaan betaal nie. Dit het daartoe gelei dat die aandeelprys op die dag tot R31,20 verswak het, want Altech was tot dusver ’n stewige dividendbetaler, met ’n dividendopbrengs van meer as 6%.

Altron bied nou aan om die oorblywende aandele in Altech vir R47,50 kontant te koop of vir 2,22 Altron-voorkeuraandele vir elke Altech-aandeel.

Dit plaas ’n markwaarde van sowat R4,05 miljard op Altech en gaan aan Altron ’n markwaarde van R10,3 miljard besorg.

Die aanbod maak egter daarvoor voorsiening dat nie meer as die helfte van die aandele waarvoor die aanbod gedoen word, met voorkeuraandele gekoop kan word nie.

As daar vir meer as die helfte van die aandele aanbiedinge in ruil vir voorkeuraandele is, sal die persentasie bo 50% in kontant afgelos word.

Die voorkeuraandele dra geen stemreg nie.

Altron het reeds twee van sy ander filiale wat eens genoteer was, Bytes Technology en Powertech, se minderhede uitgekoop.

Robbie Venter, Altron se uitvoerende hoof, sê dit sal makliker wees om sinergieë tussen Bytes en Altech te ontsluit as albei maatskappy ten volle deur Altron besit word.

Die gewildste berigte op Sake24.com :