Kaapstad Verander Area

Vandag


24°C / 16°C

Wind 35km/h


Reënval 0.0mm


Humiditeit 54%

Saterdag


27°C / 16°C

Wind 27km/h


Reënval 0.0mm


Humiditeit 48%

Sondag


23°C / 16°C

Wind 26km/h


Reënval 0.1mm


Humiditeit 74%

Maandag


26°C / 17°C

Wind 27km/h


Reënval 0.0mm


Humiditeit 54%

Dinsdag


27°C / 17°C

Wind 18km/h


Reënval 0.0mm


Humiditeit 54%

Woensdag


24°C / 16°C

Wind 21km/h


Reënval 6.7mm


Humiditeit 68%

Sport

super-stryd teen highlanders

Volpunte vir Ligbloues

Sege én 4 drieë ná loslootjie

Deur Marco Botha Sondag 19 Mei 2013 10:31 nm.

Jano Vermaak van die Bulle op pad doellyn toe vir sy span se bonuspunt-drie in die Super-wedstryd tussen die Highlanders Saterdag op Loftus Versfeld in Pretoria Foto: Deaan Vivier

PRETORIA. – Die Bulle se handskrif kort ’n bietjie werk. Maar nogtans kry hulle vir dié toets volpunte.

’n Mens kan só kyk na hul Superrugby-sege van 35-18 (rustyd 23-6) Saterdag hier oor die Highlanders. Want dit het maar geraas en geblaas om eers in die 78ste minuut by lywe van Jano Vermaak ’n vierde drie vir ’n bonuspunt te druk.

Tussendeur was sake maar morsig. “Maar ons het die regte uitslag gekry,” het die breier Frans Ludeke gesê. “En as jy ná ’n loslootjie met ’n bonuspunt kan wen, sal ek dit enige dag vat.” Sy troepe het Saterdag in die tweede minuut al gedruk toe die Bulle hul eie afskop teruggewen en JJ Engelbrecht ná 14 fases gaan druk het.

Die Bulle het verlede week besluit om Dean Greyling (grieperig) te laat rus en om Bjorn Basson om dergelike redes net op die bank te kies. Want Ludeke het voorsien dat die wedstryd teen ’n hoë tempo gespeel sal word.

En so was dit ook. Veral omdat die Highlanders lynstane en rolmaalbewegings probeer vermy het deur die bal vinnig in te gooi of om dit doer oor die Bul-rankers se koppe díép in te gooi.

Deon Stegmann het homself egter op die grond laat geld. En Morné Steyn het die strafskoppe by die afbreekpunte stewellangs in ’n lekker puntebuffer omskep.

Maar verder het die Bulle geduik. En geduik. En die enigste plek waar dit lekker is om nét na lakwerk te kyk, is op YouTube.

Maar, benadruk Pierre Spies, dit is juis die Bulle se verdediging wat vanjaar vir hulle heelwat drieë besorg het. ’n Bevredigende balans.

“Ons verdedigingsafrigter, Pine Pienaar, verdien baie lof. Ons het vanjaar met verdediging ’n tree vorentoe gegee en dit vir ons laat werk, want goeie verdediging het vir ons soveel meer moontlikhede (op die aanval) geskep,” het hy gesê.

Drie naweke terug het dit twee onderskepdrieë behels. En dié keer Akona Ndungane s’n in die 38ste minuut. Chiliboy Ralepelle het die bal met ’n harde duikslag in sy eie kwartgebied laat los spat, waarna Dewald Potgieter, Engelbrecht en eindelik Ndungane die bal gehad het.

Die laaste aangee was erg verdag, maar die TV-skeidsregter het met rustyd aan Sport24 gesê dat hy nie genoeg bewyse tot sy beskikking gehad het om met sekerheid te sê dat die bal uit Engelbrecht se hande vorentoe was nie. Spies het kort ná rustyd sy eerste drie van die seisoen gedruk, maar daarna het sy span weer aan die duik gegaan en menige puntekans met vrot hantering ongedaan gemaak.

Vermaak, die plaasvervanger-skrumskakel, suiker toe in die 78ste minuut via die steelkant van ’n losskrum vir die doellyn en druk die Bulle se vierde drie.

Dit het moontlik onnodig harde werk geverg om die bonuspunt te kry. Maar soos Spies tereg sê, is dit bemoedigend om te sien dat die Bulle weer daardie vermoë het om tot teen die einde vir ’n goeie uitslag te werskaf.

* Punte: Bulle 35 (23): Drieë: JJ Engelbrecht, Akona Ndungane, Pierre Spies, Jano Vermaak. Doelskoppe: Steyn (3). Strafdoele: Steyn (3). Highlanders 18 (6): Drieë: Fumiaki Tanaka, Tamati Ellison. Doelskop: Hayden Parker. Strafdoele: Colin Slade (2).