02 Augustus 14:21
13°C / 19°C

Kaapstad Verander Area

Vandag


19°C / 13°C

Wind 7km/h


Reënval 0mm


Humiditeit 49%

Maandag


17°C / 13°C

Wind 38km/h


Reënval 0mm


Humiditeit 71%

Dinsdag


16°C / 13°C

Wind 34km/h


Reënval 9mm


Humiditeit 82%

Woensdag


16°C / 12°C

Wind 11km/h


Reënval 0mm


Humiditeit 65%

Donderdag


19°C / 12°C

Wind 6km/h


Reënval 0mm


Humiditeit 55%

Vrydag


18°C / 12°C

Wind 8km/h


Reënval 0mm


Humiditeit 61%

Sport

Treu nie veel wyser in Rome

Deur Leighton Koopman Vrydag 14 Junie 2013 22:22

KAAPSTAD. – ’n Toernooi waar hy veronderstel was om die kaf van die koring te skei vir sy Wêreldbeker-sewesrugbygroep, sal Paul Treu, die Blitsbok-afrigter, dalk ’n hoofpyn of twee besorg.

Sy Suid-Afrikaners het gister op die eerste dag van die Roma-toernooi in Italië baljaar en al drie hul teenstanders maklik uit die pad gevee om die uitspeelrondes van die toernooi in Rome te haal.

Die Blitse se eerste wedstryd vandag begin eers om 20:00 en Treu sal heel moontlik dan die geleentheid kry om te sien hoe die spelers vaar wanneer hulle teen heelwat sterker spanne as gister te staan kom.

Frankryk en Italië se nasionale sewesspanne is van die teenstanders wat moontlik op die Suid-Afrikaners wag.

In die Blitsbokke se eerste wedstryd het hulle een van die uitnodigingspanne, Fiamme Oro, met 33-0 geklop.

Hulle het aanvanklik gesukkel, maar daarna het die spelers hul voete gevind.

In die tweede wedstryd het die Blitse die Geneva Barbarians met 69-0 laat les opsê en die dag se spel met ’n sege van 54-0 oor Clandestinos afgesluit.

Volgens Treu het sy spelers aanvanklik in die eerste wedstryd ’n bietjie stadig begin en het dit maar soms traag gegaan voor hulle hul ritme gevind het.

“Dit was baie warm en die hitte het ook sy tol geëis. Die manne is aanhoudend geroteer om aan almal genoeg speeltyd te gee,” het hy gesê.

Die afrigter was ooglopend hoogs tevrede met die terugkeer van sy kaptein, Kyle Brown, Ruwellyn Isbell en Mark Richards, wat ná langtermyn-beserings die eerste keer vanjaar uitgedraf het.

Die spelers wat hulle van die vyftienman-kode by sy groep aangesluit het (soos Ryan Kankowski), het ook gister ’n goeie indruk op hom gemaak.