Kaapstad Verander Area

Vandag


23°C / 14°C

Wind 21km/h


Reënval 0.0mm


Humiditeit 53%

Saterdag


23°C / 14°C

Wind 20km/h


Reënval 0.1mm


Humiditeit 51%

Sondag


22°C / 17°C

Wind 22km/h


Reënval 0.4mm


Humiditeit 62%

Maandag


25°C / 16°C

Wind 31km/h


Reënval 0.0mm


Humiditeit 51%

Dinsdag


24°C / 15°C

Wind 32km/h


Reënval 0.0mm


Humiditeit 60%

Woensdag


24°C / 17°C

Wind 17km/h


Reënval 0.0mm


Humiditeit 55%

Sport

Aussie kan GW-buiging maak

Deur Gerdie Karstens Sondag 18 Augustus 2013 9:34 nm.

BLOEMFONTEIN. – Griekwas se nuwe slot-aanwins uit Australië, Rory Arnold, sal moontlik Saterdag teen die Westelike Provinsie reeds sy eerste proesel Curriebeker-rugby kry.

Die Poubloues se afrigter, Pote Human, het bevestig dat Arnold van vandag af geweeg sal word met die oog op moontlike speelkans teen die Streeptruie op GWK-park in Kimberley.

Dit verbaas nie dat Human die 23-jarige van 127 kg en 2.08 m betrokke wil kry nie. Hy kan as plaasvervanger vir Ligtoring Landman (duim) die vonk verskaf wat Vrydag in die Poubloues se nederlaag van 9-15 teen die Blou Bulle in Pretoria makeer het.

“Rory is nog nuut in die stelsel. Dit is vir hom ’n nuwe land, nuwe taal en nuwe kompetisie; so hy pas nog aan. Maar ons gaan vandeesweek beslis kyk of hy gereed is,” het Human gesê.

Die afrigter het maar min positiewe dinge oor die Bul-stryd kwytgeraak, ’n kragmeting waarin Griekwas net nooit aan die verwagtinge voldoen het nie nadat hulle die Haaie die week vantevore in Durban afgestof het.

Die besoekers se vertolking van die nuwe skrumreëls was chaoties, hul aanvallende spel was net nêrens te sien nie en hulle het bykans elke bal doelloos weggeskop.

Voeg daarby dat hul dissipline ook nie na wens was nie, die vleuel Nico Scheepers – anders as verlede week – nie sy skopskoene aangehad het nie en die Poubloues kan hulle gelukkig ag dat hulle met ’n bonuspunt uit die Jakarandastad teruggekeer het.

“Dit was vir my seker een van die swakste wedstryde waarby ek as Griekwas-afrigter nog ooit betrokke was,” het Human gesê.

“Ons het gesukkel met die vertolking van die skrumreëls en dit nadat ons die week vantevore so goed teen die Haaie geskrum het. Ons sal beslis daaraan moet werk. Ons móét by die wedstryd-situasie aanpas.”

Nadat die Poubloues teen die Haaie 4 punte in die doodsnikke ingesamel het, is wyd en syd voorspel dat hulle ’n verswakte Bul-span sou kon ore aansit. Eindelik was die Loftus-kragmeting toe ’n geval van die beste van die swakkes wat koning gekraai het.

“Die druk is nou vierkant op ons. Ons het die WP nog nooit geklop nie. ’n Mens kan nie wipwaentjie-vertonings in die Curriebeker bekostig nie.”