Kaapstad Verander Area

Vandag


27°C / 16°C

Wind 25km/h


Reënval 0.0mm


Humiditeit 51%

Sondag


22°C / 16°C

Wind 26km/h


Reënval 0.4mm


Humiditeit 79%

Maandag


25°C / 16°C

Wind 31km/h


Reënval 0.0mm


Humiditeit 58%

Dinsdag


29°C / 17°C

Wind 22km/h


Reënval 0.0mm


Humiditeit 47%

Woensdag


22°C / 17°C

Wind 38km/h


Reënval 5.1mm


Humiditeit 81%

Donderdag


23°C / 16°C

Wind 21km/h


Reënval 3.5mm


Humiditeit 69%

Sport

Indiërs boelie KSA

Korter toer = miljoene minder

Deur Christo Buchner Maandag 02 September 2013 9:07 nm.

JOHANNESBURG. – Die Indiese Krieketraad (BCCI) het skynbaar besluit om Suid-Afrikaanse krieket ’n les te leer wat hy nie gou sal vergeet nie.

Dít alles omdat Krieket Suid-Afrika (KSA) volgens die BCCI die “vermetelheid” gehad het om Haroon Lorgat teen sy wil as die SA beheerliggaam se nuwe uitvoerende hoof aan te stel.

Die BCCI het met boelie-taktiek besluit om sy toer later vanjaar in Suid-Afrika aansienlik te verkort, wat onder meer beteken die kolfmeester Sachin Tendulkar sal nie meer sy 200ste toets in Suid-Afrika speel nie.

Die oorspronklike toerdatums in Suid-Afrika sou van 18 November tot 21 Januarie wees.

Die BCCI het egter intussen gereël dat die Wes-Indiese Eilande vroeg in November in Indië toer, terwyl Indië gister ook aangekondig het dat hy vanaf middel Januarie twee toetse en vyf eendagstryde in Nieu-Seeland gaan speel. Die Windies-toer sal twee of selfs drie toetse insluit, asook enkele eendagstryde. Dit beteken Tendulkar, wat nou op 198 toetse staan, sal dan die mylpaal van 200 toetse in sy land bereik en nie meer tydens die beoogde Nuwejaarstoets in Kaapstad nie.

Veel erger egter is die geldelike verlies wat KSA in die gesig staar as die toer kwaai ingekort word en Tendulkar nie meer sy 200ste toets hier speel nie.

Daar word selfs gesê die geld wat KSA met die Majola-bonusskandaal verloor het, gaan kleingeld wees teenoor wat hy uit TV-regte gaan verloor vir ’n verkorte Indiese toer.

Volgens ingeligte bronne sou KSA tot R300 miljoen ryker kon word uit ’n volle Indiese toer.

Vir elke dag wat verlore gaan, kan hy tot R2,5 miljoen per dag verloor. “As jy R100 miljoen uit die begroting van die Indiese toer neem, is KSA in groot geldelike moeilikheid,” is aan Sport24 gesê.

Die BCCI, in die persoon van sy voorsitter, Narayanaswami Srinivasan, is skynbaar in ’n persoonlike vete met Lorgat gewikkel. Hy was kwaai gekant teen Lorgat se aanstelling as KSA se uitvoerende hoof.

Lorgat is in sy tyd as die uitvoerende hoof van die Internasionale Krieketraad (IKR) beskou as iemand wat die rug styf gemaak het teen die BCCI se boelie-taktiek. Dit sluit in hoe die IKR se toerprogram moet lyk, die skeidsregter-verwysingstelsel waarteen Indië gekant is en ook die IKR se korporatiewe bestuurstyl.

’n Ingeligte bron het gesê Indië het egter nie die IKR se toerprogram-beleid onderteken nie en daar is dus niks wat aan hom gedoen kan word as hy links en regs toere verkort en ander reël nie.

“KSA kan dus nie eens dreig om hulle hof toe te sleep oor ’n verlies aan inkomste nie,” volgens die bron.

Die aanvanklike Indiese toerprogram in Suid-Afrika sou drie toetse, sewe eendagstryde en twee T20-kragmetings behels het, maar sal straks nou uiteindelik net uit twee toetse, drie of vier eendagstryde en die twee T20’s bestaan.

Anders as in die verlede, is geen personeellid van KSA ook genader om tydens die Kampioeneliga te help nie. Daar is sprake dat die $4 miljoen (meer as R40 miljoen) wat KSA sou kry as een van die hooflede van die Kampioeneliga, glo nie meer betaal gaan word nie.