Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Aan alle beleggers: Tyd is geld!
21 Maart 2019

Een van die belangrikste wenke in Warren Buffet se jaarlikse Berkshire Hathaway-brief is dat tyd beleggers se grootste bate is. En dit moet ten volle benut word.

Warren Buffett, voorsitter en uitvoerende hoof van Berkshire Hathaway

Die jaarlikse Berkshire Hathaway-brief van die maatskappy se voorsitter, Warren Buffett, is op 23 Februarie aanlyn uitgereik en ek wil na sommige van die hoogtepunte kyk. Jy kan die hele brief te siene kry by berkshirehathaway.com en dit is absoluut die moeite werd om te lees.

Ek gaan ook na die regstreekse potgooi van die algemene jaarvergadering (AJV) op 4 Mei kyk. Die brief begin met ’n veeghou na aangepaste ebitda-verdienste (opbrengs voor rente, belasting, aftrekkings en amortisasie), wat volgens Buffet “ ’n verskeidenheid werklike koste uitsluit”.

Byvoorbeeld: ’n Maatskappy skryf ’n verkryging af, en is nie bekommerd daaroor om dit te doen nie omdat dit nie ’n kontantgebeurtenis is nie. Ten tye van die afskrywing was dit nie ’n kontantgebeurtenis nie, maar dit was toe vir die verkryging betaal is.

Ebitda werk op dieselfde manier met rente en belasting – hulle is baie werklik en kan nie bloot weggewens word nie. Hy wys ook op die krag van goeie tydsberekening met aandeelterugkope. Berkshire se belang in American Express het toegeneem van 12,6% tot 17,9% suiwer omdat die maatskappy van sy aandele teruggekoop het – Berkshire het nie ’n enkele ekstra aandeel gekoop nie. Die maatskappy kry nou ’n groter deel van die wins en uiteindelik toekomstige dividende.

Hy herinner ons daaraan om nie paniekerig te raak nie. Met tye sal die toekoms baie donker lyk, maar uiteindelik presteer die markte. Nie altyd op kort termyn nie, maar altyd op die lang termyn.

Die belangrike punt om op te let is dat dit “welberekend” (ek het die frase bygevoeg) moet wees omdat bestuur dikwels nie die beste beoordelaar van die waarde van sy aandele is nie. Ek hou daarvan dat ’n maatskappy ’n duidelik verklaarde beleid het oor terugkope wat insluit watter prys in verhouding tot die netto bate of intrinsieke waarde is waarteen hulle sal koop.

Om bloot ’n hoop kontant te hê en te besluit om aandele terug te koop, eindig dikwels in trane, omdat die prys wat betaal is, heeltemal te hoog is. Buffett bestee ’n paar bladsye daaraan om die Amerikaanse meewind te bespreek. Hy het 77 jaar gelede (1942) tydens ’n wêreldoorlog begin belê.

Sedertdien het die Amerikaanse ekonomie tydperke van vinnige groei beleef en ander van hoë rentekoerse en inflasie. Amerika het resessies en markineenstortings beleef, maar oor die tydperk van 77 jaar was daar geen beter belegging nie – die S&P 500 het ’n geannualiseerde opbrengs van 11,8% gelewer. Hy herinner ons daaraan om nie paniekerig te raak nie.

Met tye sal die toekoms baie donker lyk, maar uiteindelik presteer die markte. Nie altyd op kort termyn nie, maar altyd op die lang termyn. Dié 11,8%-opbrengs sou $1 miljoen in $5,3 miljard laat verander het. Dié geweldige rykdomskepping toon dat die grootste bate vir beleggers tyd is.

Vir baie lesers (ekself ingesluit) is tyd nou nie iets wat ek in hordes oor het nie. Maar jongmense het beslis. En nog meer so vir kinders wat regtig baie dekades het wat voorlê; as hulle vroeg genoeg begin, selfs met ’n klein bedraggie, kan hulle dit tot hul voordeel aanwend om rykdom te skep.

Ons oueres moet daardie boodskap versprei. Versprei dit ver en wyd. Dit gaan minder oor hoeveel geld ons het om te belê, dit gaan meer oor hoeveel tyd ons het om te belê. ’n Voorbeeld is die R33 000 wat in ’n belastingvrye spaarrekening met geboorte geplaas word en gelos word tot op die ouderdom van 65 wat ’n maandelikse aftreegeldjie van R10 000 in vandag se geld sal lewer (natuurlik maak ek ’n klomp aannames, maar jy kry die idee).

’n Laaste en ewe belangrike punt is koste. Dieselfde opbrengs soos bo sou amper gehalveer gewees het tot $2,65 miljard as daar nie ’n 1% jaarlikse gelde aan die belegging gekoppel was nie.

Nou ja, dit is so dat gelde ’n deel van die lewe is, en ek het nie ’n probleem daarmee nie. Maar ons moet die geweldige impak insien wat gelde maak, en die voorsieners moet ophou gierig wees en ’n negatiewe impak op ons opbrengste hê met hulle belaglike gelde. 

* Stuur 'n boodskap aan terugvoer@finweek.co.za

Meer oor:  Warren Buffett  |  Finweek  |  Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.