Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Aan die voorpunt van nie-alkoholiese drankies
16 Januarie 2020
The Duchess het tans drie produkte in hul reeks: Duchess Floral, Duchess Greenery en Duchess Botanical

The Duchess het in September 2016 in Kaapstad die eerste alkoholvrye jenewer en tonikum (gin en tonic) ter wêreld bekendgestel.

Sedertdien het die maatskappy meer as 3 miljoen eenhede in 1 500 restaurante en winkels in Suid-Afrika verkoop en na Europa uitgebrei.

Daar kan jy dit in 600 Albert Heijn-winkels in Nederland en 400 Delhaize-winkels in België kry. Dit is ook in 230 Dan Murphy's-winkels in Australië beskikbaar. Die handelsmerk het internasionale erkenning ontvang toe dit op Zenith Global se jaarlikse InnoBev-toekennningsgeleentheid in 2018 twee kategorieë gewen het, naamlik die beste drankie vir volwassenes en die beste nuwe drankiekonsep.

In Oktober 2019 het ZX Ventures, die innovasie-afdeling van AB InBev, ’n minderheidsaandeel in die maatskappy gekoop om verdere uitbreiding in die internasionale mark te ondersteun. Johannes le Roux, medestigter van die maatskappy, het met finweek oor die besigheid gesels.

Wat het jy gedoen voordat jy The Duchess begin het?

Ek het eiendomsontwikkeling aan die Universiteit van Kaapstad gestudeer, maar my studie gestaak toe die resessie in 2008 begin het en ek besef het die swak ekonomie sal maak dat ek op die ou end eiendomme bemark eerder as om gesogte nuwe eiendomme te ontwikkel.

’n Vriend het my genooi om saam met hom ’n reklameagentskap genaamd The Suits te begin, wat gefloreer het omdat ons die meeste van die werk uitgekontrakteer het.

Hoe het jou intog in die mark vir drinkgoed begin?

In 2013 het ek op 23 met die karbonering van brandewyn begin eksperimenteer, wat tot die skepping van SA se heel eerste brandewyn en Coke uit ’n tapvaatjie gelei het, bekend as Brannas Draught.

Daar het oral in my woonstel in Mouille Point vaatjies brandewyn gestaan. Weens die produk se gewildheid het KWV enkele maande ná die bekendstelling ’n 25%-aandeel in die maatskappy gekoop.

Weens die produk se gewildheid het KWV enkele maande ná die bekendstelling ’n 25%-aandeel in die maatskappy gekoop.

Die tydperk voordat die transaksie met KWV afgehandel is, was vir my een van die senutergendste ooit. Ons het 500 vaatjies uit China bestel om te kon byhou by die groeiende vraag, maar die vaatjies het aangekom voordat die transaksie beklink was. Hawetariewe van R36 000 per dag was my voorland en ek moes blitsvinnig oorbruggingsfinansiering kry om vir die vaatjies te betaal.

Brannas het my nie net geleer hoe belangrik dit is om kontantvloei en produksie te balanseer nie, maar het my ook gehelp om ’n sterk netwerk in die drinkgoedbedryf te vestig en my voor te berei vir al die werk wat ek met die verkryging van finansiering vir The Duchess sou doen.

KWV was toenemend by Brannas betrokke, dus het ek twee en ’n half jaar nadat ek die maatskappy begin het ’n besturende direkteur aangestel om my werkslading oor te neem en het ek begin soek na ’n volgende groot ontwrigter van die drinkgoedmark.

Die mark vir Brannas is beperk, want in ander dele van die wêreld drink mense nie regtig brandewyn en Coke nie. Ons verkoop ruweg sowat 50 000 eenhede Brannas per maand en ons konsentreer op Gauteng.

Hoekom het jy The Duchess begin?

Die idee om ’n nie-alkoholiese jenewer en tonikum te begin, het met ’n besoek aan Nederland by my opgekom. Ek het die jenewer-en-tonikum-neiging gesien en opgelet hoeveel mense na ’n nie-alkoholiese en suikervrye alternatief op soek was, veral atlete en ma’s.

Vertel ons meer van die ontwikkeling van The Duchess.

Soos met Brannas het ek met ’n geurmiddelmaatskappy begin saamwerk om die drankie te ontwikkel. Die Britse maatskappy Seedlip het min of meer in dieselfde tyd ’n nie-alkoholiese jenewer ontwikkel, maar ek wou ’n reeds gemengde drankie ontwikkel wat volumegedrewe was en net so uit die yskas gehaal en gedrink kon word. Die eerste voorbeelde was taamlik basies, maar my tante Febe Wessels het my van plantbestanddele voorsien wat die drankies komplekser gemaak het, sodat mens beswaarlik tussen die ware Jakob en die nie-alkoholiese drankie kon onderskei.

Hoekom het jy die handelsmerk The Duchess genoem?

Ons het met die gedagte van “Dutch” en “koninklik” rondgespeel en by The Duchess geëindig. “Dutch” omdat jenewer oorspronklik van Nederland afkomstig is.

Waar het jy aanvangsfinansiering vir The Duchess gekry?

Ek het vriende en familielede gevra om in die maatskappy te belê en dié geld is gebruik om die eerste produk te finansier. Om koste te beperk het ek die maatskappy saam met Inus Smuts, ’n grafiese ontwerper, gestig wat gehelp het om die logo vir Brannas te ontwikkel. Ons het die aanvanklike produkontwikkeling en bemarking alles self gedoen.

Hoe is die drankie in die mark ontvang?

Ons eerste lot van 10 000 liter het binne ’n maand nadat dit in September 2016 bekendgestel is, verkoop en teen Desember nog 20 000 liter. Ons het geweet die produk sal sterk in aanvraag wees, maar die ontvangs was ’n honderd keer beter as wat ons gedink het.

Die tydsberekening was perfek, want verkope het later geblyk seisoenaal te wees – met ’n hoogtepunt in die lente en die somer.

Die tydsberekening was perfek, want verkope het later geblyk seisoenaal te wees – met ’n hoogtepunt in die lente en die somer.

Hoe het julle vir Europa betree?

Baie van die toeriste wat die Duchess op oggendmarkte hier leer ken het, het gevra ons moet dit ook in hulle lande bemark. Ons het in ’n stadium navrae uit 25 verskillende lande gehad. Daarom het ons vir Kevin Anderson, een van ons vroeë beleggers, gevra om die internasionale mark te help uitbou, want hy het internasionale bande vanweë sy agtergrond in hernubare energie.

Johannes le Roux en Inus Smuts, medestigter van The Duchess
Wat was aan die begin jul grootste uitdaging?

Om ’n deurbraak in die mark vir drinkgoed te maak, is duur – jy benodig hope bedryfskapitaal, dra voorraad en dit vat tot ses maande om betaling te kry. Beginnerondernemings het skynbaar nooit genoeg geld nie. Ons moes mense ook van die produk leer, aangesien dit ’n hele nuwe konsep was. Ons het dus oral in die land by winkels proe-sessies aangebied. Nog ’n uitdaging was die seisoenaliteit van verkope, wat ons oorkom het deur die Europese mark te betree.

Wat is nou jul grootste uitdagings?

Nadat ZX Ventures ’n minderheidsaandeel gekoop het – ek mag nie sê hoe groot nie – het ons ons personeelkomplement van agt tot 18 mense vergroot. Dié vinnige groei bring bestuursuitdagings mee, so ons het ’n mensehulpbronmaatskappy aangestel om een keer per maand met elke werknemer te gaan sit om die oorgang glad te help maak en swakhede en geleenthede vir groei te identifiseer. Dit is ook nogal ’n ding om internasionaal sake te doen; mens moet gevoelig wees vir kultuurverskille en so. Ons moes dus die manier aanpas waarop ons in verskillende lande sake doen.

Hoe bemark julle The Duchess?

Ons het besef in die mark vir alkoholvrye drankies word vroue nogal misgekyk, dus het ons besluit om hulle spesifiek te teiken. Omdat ons begroting so klein is, adverteer en bemark ons hoofsaaklik deur die sosiale media. Ons het ook groot sukses met publisiteit gehad, op talle platforms, want ons handelsmerk was die eerste nie-alkoholiese jenewer en tonikum.

Hoe het die mark verander sedert julle begin het?

Ons ding nie regtig met koeldrank mee nie, want dis ’n mark wat op die afdraande pad is weens hoë suikerinhoude. Die mededinging met ander nie-alkoholiese drankies het aansienlik toegeneem. Baie van dié maatskappye het ook baie geld, wat maak dat hulle baie aan bemarking en promosies kan bestee.

AB InBev het onderneem om sy nie-alkoholiese afdeling só uit te bou dat 20% van sy verkope teen 2025 daarvandaan sal kom.

ZX Ventures se belegging in die handelsmerk sal ons in staat stel om ons werksaamhede en internasionale teenwoordigheid aansienlik uit te brei. AB InBev het onderneem om sy nie-alkoholiese afdeling só uit te bou dat 20% van sy verkope teen 2025 daarvandaan sal kom.

Wat was die beste raad wat jy tot dusver gekry het?

Om beleggers sorgvuldig te kies en nie jou identiteit te verloor sodra ’n maatskappy in jou belê nie. Terwyl beleggers wil hê dat jy moet geld maak, moet jy onthou hulle het in jou belê vir ’n rede. Dit gaan nie net oor die produk nie, maar ook oor jou manier van dink en sake doen.

Watter raad het jy vir ander entrepreneurs?

Mense wil te veel oor goed dink en wil hê als moet volmaak wees voordat hulle dit waag om die mark te betree. Ek voel egter jy moet inspring wanneer jy 65% gereed is. Dan verfyn jy die produk soos jy aangaan.


Meer oor:  Finweek  |  Nie-Alkoholiese Jenewer  |  The Duchess
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.