Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Anglo American: Klaar met steenkool
23 April 2021

d ie uitvoerende hoof van Anglo American, Mark Cutifani, het seker aan die omstrede steenkoolooreenkoms tussen Seriti Resources en South32 gedink toe hy vroeër in ’n finweek-onderhoud gesê het dat die maatskappy se voorgestelde steenkoolontknoping eenvoudiger was.

Anglo het Thungela Resources op 9 April bekendgestel. Thungela is ’n beheermaatskappy wat die Suid-Afrikaanse bates wat tans in sy sake-eenheid, Anglo Coal, is, sal huisves, mits aandeelhouers die 10:1-ontknoping van die termiesesteenkoolmyne goedkeur.

Die maatskappy het nie ’n handelsverkoop gekies nie omdat hoe die entiteit “ná die transaksie lyk”, vir aandeelhouers belangrik is, sê Cutifani. “ ’n Entiteit wat kontant, goeie bedrywighede en goeie ondernemers het, vertroue in die gemeenskap handhaaf en die regte besluite kan neem, was die eerste oorweging,” het hy gesê.

Mark Cutifani, uitvoerende hoof van Anglo American

Dit is vier jaar sedert Anglo sy plaaslike steenkoolmyne vir R2,3 miljard aan Seriti Resources verkoop het. Die transaksie het ongeveer 18 maande geneem om af te handel. Dit het egter nie die drama gehad van Seriti se ander aankoop nie, die belang van 91% in South African Energy Coal (SAEC) by South32, die Perth-genoteerde maatskappy.

Die voltooiing van dié transaksie, wat in Augustus 2019 begin het, is vir die tweede keer tot die tweede kwartaal van vanjaar uitgestel. Daar heers groot onsekerheid om ’n steenkoolverkoopsooreenkoms (SVO) tussen SAEC se Ifalethu-myn in Mpumalanga en Eskom se Duvha-kragstasie.

South32 het die voorheen verliesmakende transaksie herbeding, sodat die Seriti-transaksie kan plaasvind. Teenstanders hou nie daarvan nie: Hoe kan Eskom instem tot ’n hoër steenkoolprys as hy nie eers die rente op sy skuld van R450 miljard kan betaal nie? Mike Teke, Seriti se uitvoerende hoof, het ’n artikel vir Business Day geskryf en verklaar dat die nuwe SVO ’n tussentydse reëling is en slegs ’n gelykbreektransaksie beteken.

Die opsie om die SVO tot 2034 uit te stel, sal ook nie voordelig beïnvloed word as Seriti in die oop tender van 2024 bie nie. South32 het sy eie transaksie herstruktureer en besluit om $250 miljoen in te sit om Seriti te help. Hy het ook ’n klousule in die oorspronklike ooreenkoms laat vaar wat inkomstedeelname in Seriti-verkope sou beteken as die steenkoolprys sekere drempels oortree.

“Dit moenie lyk asof ons voordeel trek uit die verbeterde SVO met Eskom nie,” het Mike Fraser, South32 se bedryfshoof, gesê. Anglo se ontknoping omseil ’n ingewikkelde handelsverkoop, sê Cutifani. ’n Handelsverkoopbod “bied aan om jou balansstaat te gebruik om hul geleenthede te finansier, en as dit nie heeltemal reg uitwerk nie, sal hulle in elk geval druk op jou plaas,” het hy gesê.

“Ons aandeelhouers het aan ons gesê hulle hou nie van die idee van sulke eensydige transaksies nie; hulle verkies dat ons ontknoop en dat hulle saam met die spelers voordeel kan trek. Die enigste manier om dit te doen, is as jy die besigheid op die regte manier saamstel,” het hy gesê. “Heelwat SA aandeelhouers in Anglo het ons daarop gewys dat hulle die mark, die spelers en die bates se gehalte ken.”

* Stuur 'n boodskap aan terugvoer@finweek.co.za


Thungela Resources: Wat kan beleggers verwag?

Die SA bates het in Anglo se boekjaar verlede jaar 16,5 miljoen ton geproduseer, maar het ’n verlies van $15 miljoen voor rente, belasting, depresiasie en amortisasie getoon, weens ’n gemiddelde steenkoolprys van $57 per ton.

Die huidige prys vir sy gehaltesteenkool is ongeveer $90 per ton, maar Anglo sal nietemin $170 miljoen in die onderneming inspuit, sodat hy met netto kontant kan begin.

Anglo sal die maatskappy ook drie jaar lank steun as die steenkoolprys onder ’n sekere vlak daal. Volgens ontleders kan hierdie myne tans nie teen minder as $80 per ton wins maak nie.

Thungela Resources staan onder leiding van uitvoerende hoof July Ndlovu – tans uitvoerende hoof van Anglo Coal. Hy is gerespekteerd in die bedryf en het ’n beleggerstrategie uitgewerk wat op opbrengs gerig is. Thungela sal dus 30% van sy vrye kontant uitbetaal nadat hy sy kapitaal bewaar het, en het belowe om in korttermynprojekte met hoëkontantwins en laekapitaalkoste te belê om die huidige gemiddelde mynleeftyd van 12 jaar te verleng.

Geen groot kapitaalprojekte is in die eerste drie jaar waarskynlik nie. Thungela Resources sal ’n hoogs verhandelbare aandeel wees. Britse en SA houers van Anglo wat wou hê die groep moes sy steenkoolmyne verkoop, sal waarskynlik hul aandele met die notering (na verwagting 7 Junie), verkoop. Beleggers kan ook wisselvalligheid verwag.

Dit sal geleenthede en risiko’s in gelyke maat bied: Thungela is ’n suiwer belegging en kan ’n verteenwoordiger van die SA steenkoolprys word. ¦

Foto’s: Shutterstock I www.angloamerican.com

Meer oor:  Anglo American  |  Mynbou  |  Finweek  |  Steenkool
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.