Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Astral is ’n suksesvolle herstelverhaal
24 Mei 2018

Dié pluimveemaatskappy se aandeelprys styg met meer as 100% sedert 2016-’17 se donker dae.

Astral is steeds die sterkste aandeel onder die JSE se top100 uitgifte, soos gemeet aan hul markkapitalisasies, en illustreer weer eens die verstommende opbrengste wat verkry kan word mits ’n herstel-situasie raakgevat kan word. Sedert sy huidige lopie in September verlede jaar begin het, het die aandeel reeds met meer as 100% gestyg. En nog is’t einde niet: sy wesensverdienste het in die halfjaar tot einde Maart met 455% toegeneem, ’n tussentydse dividend van R10 is verklaar (2017-halfjaar: R1,80), en vooruitsigte lyk positief.

Die aandeel, soos ander in die pluimveebedryf, het in 2016 en deels verlede jaar sleg deurgeloop weens faktore buite hul beheer, soos rekord-mieliepryse weens

die droogte en ’n stroom van ingevoerde hoenderprodukte. Die groep se wesensverdienste per aandeel het in die halfjaar tot Maart 2017 met 54% getuimel, maar die prentjie het ingrypend verander vanweë sterk afnames in voerpryse, danksy goeie reën wat tot ’n rekordoes gelei het, en hoër verkooppryse vir braaikuikens.

Iets wat plaaslike produsente van pluimveeprodukte kan help, is aanduidings van listeria in invoerprodukte uit Amerika en Brasilië. Dit kan handelaars en die publiek sku maak vir die invoerprodukte. Die staat kan natuurlik ook ingryp. Waardebeleggers sê daar is een kernvereiste om sukses te behaal met herstel-aandele, oftewel belangrike maatskappye wat tydelik teenspoed ervaar.

Dit is dat daar ’n duidelike potensiaal vir ’n maatskappy moet wees om sterk te kan herstel. Byvoorbeeld, in die geval van Astral het goeie reën en die

daaropvolgende skattings van ’n rekordmielieoes bevestig dat mieliepryse sal daal, wat regstreeks voerpryse sal bevoordeel.

’n Tweede reël is dat weggebly moet word van maatskappye wat goedkoop is weens oneerlikheid of wat knaend siek is. Steinhoff is ’n voorbeeld hiervan.

Daar is altyd herstelsituasies in die een of ander vorm op die JSE. Een wat in die laaste tyd aandag trek, is Implats wat by die skrywe hiervan teen sowat R18 verhandel het. Die laaste keer dat hy in die omgewing was, was in 1999. Vroeg die voorafgaande jaar, 20 jaar gelede, was sy prys in een stadium R4,31. Sy hoogtepunt van R368 het hy in Maart 2008 bereik te midde van ’n platinumprys op rekordvlak van bykans $2 200. Toe die platinumprys begin tuimel, het Implats gevolg en binne sewe maande gee hy 76% prys tot R86,55.

Daar word algemeen aanvaar dat dié hoërisiko-aandeel wel oor die potensiaal beskik om dramaties te herstel. Dit hang veral saam met ’n styging in die platinumprys, tans in die omgewing van $900, wat nou al geruime tyd so ’n groot deel van SA se myne onlonend maak.

John Biccard, bekende bestuurder van Investec se waardefonds, het ’n ruk gelede ’n saak daarvoor uitgemaak dat Implats tot R150 kan styg indien omstandighede verander.

’n Interessante kenmerk van die toptien-aandele in die tabel van die sterkste aandele is dat hulle so ’n verskeidenheid van sektore verteenwoordig, wisselende van Clicks, wat tans een van die gewildste aandele op die JSE is ondanks ’n hoë prysverdienste-veelvoud van 36, tot PPC. Dié sementgroep het in Augustus verlede jaar teen slegs 344c verhandel toe sake vir hom op die donkerste gelyk het. Sedertdien het hy met sowat 160% opgeskiet om nou die derde sterkste aandeel te wees.

Dit is opvallend dat verskeie waarde-effektetrusts hom aangekoop het toe hy so laag was. Opvallend onder die swakste aandele is Sibanye-Stillwater, wat weens sy beoogde oorname van die verliesmakende Lonmin, so ’n swaargewig op die gebied van die platinumgroep van metale word. Fortress B en Resilient bevind hulle ook onder die swakste toptien, wat bevestig hoe riskant beursbelegging kan wees ondanks die puik eiendomsbeleggings wat hulle besit. Onder die aandele wat deurgebreek het, lyk Naspers** en Vodacom die interessantste.

*Stuur ’n e-pos aan terugvoer@finweek.co.za

*Lucas de Lange is ’n voormalige redakteur van finweek en die skrywer van twee boeke oor belegging.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.