Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Beleggers moet portefeuljes as mini-konglomerate beskou
18 Maart 2021
Foto: Gallo/Getty Images

Maartmaand het ’n tradisionele plek in die beleggingsgemeenskap; dit is wanneer Warren Buffett sy brief aan aandeelhouers publiseer. (Jy sal die brief by berkshirehathaway.com vind.)

Dis vir my altyd iets goeds om te lees en maak my dikwels ’n slimmer belegger nadat ek dit gelees het. Vanjaar begin hy sy brief weereens met kritiek oor die algemeen aanvaarde rekeningkundige praktyk (GAAP) wat in Amerika gebruik word. GAAP toon dat Berkshire verdienste van $42,5 miljard in 2020 gehad het.

Tog, soos Buffett uitwys, is hierdie syfer verkeerd, want die werklike (bedryfs-)verdienstesyfer is $21,9 miljard. Die verskil is bygevoegde kapitaalwins van aandele wat verkoop is en $26,7 miljard in kapitaalwins van aandele wat steeds besit word (daar is ook ’n negatiewe afwaartse waardering). Die ongerealiseerde kapitaalwins is bog met betrekking tot verdienste.

Ja, hulle het aandele gekoop, byvoorbeeld in Apple, wat enorme prysgroei sedert die aankoop getoon het. Maar dit is ’n papierwins en is glad nie verdienste nie. Die verdienste van Apple bly hoofsaaklik in die onderneming om herbelê te word, terwyl dividende na Berkshire sal vloei.

Maar aandeelprysskommelings is nie verdienste nie en hoewel hulle in sommige jare help, soos in 2020, is hulle in ander jare skadelik wanneer pryse daal en nie een van die twee gevalle gee ’n billike weerspieëling van die werklike bedryfsaak nie. Die les hier is dat maatskappye moet meedeel as hulle rekeningkundige standaarde (plaaslike IFRS) gebruik, maar hulle maak nie altyd sin nie en ons moet ons huiswerk doen deur die syfers te dekonstrueer om ’n billike weerspieëling van die reële wins te kry.

Berkshire het ’n eenvoudige formule om sy eie aandele teen 10% hoër as hul intrinsieke waarde terug te koop.

Buffett praat ook oor hoe dit is om ’n konglomeraat te wees en hoe die risiko hier is om die saak volkome te besit, wat sal behels dat ’n swaar beheerpremie betaal moet word of dat tweederangse ondernemings gekoop word omdat die gehalteondernemings nie sal verkoop nie of dit slegs teen waansinnige waardasies sal doen.

Hy en Charlie Munger is tevrede om minderheidsaandeelhouers te wees; hulle deel in die wins sonder dat hulle enigsins moeite hoef te doen. Dit is presies hoe ons ons eie portefeuljes moet beskou, as ’n mini-konglomeraat. Ons besit klein minderheidsbelange in genoteerde maatskappye wat deur die bestuurspan bestuur word en hulle deel van die wins met ons en hou die res om die onderneming te laat groei. Ons taak is dan om ’n oog oor die resultate te hou, maar nie oor die daaglikse bestuur nie.

Dit beteken ook dat net die beste gehalte teen goeie pryse gekoop word. As ons nie die regte gehalte of waardasie kan kry nie, is dit beter as ons daarvan wegloop. Buffett lewer ook kommentaar oor die terugkoop van aandele deur maatskappye. As dit teen die regte prys geskied, verhoog hulle ons aandelebesit in die maatskappy sonder dat ons ’n vinger hoef te verroer.

Maar die belangrike ding hier is die regte prys. Berkshire het ’n eenvoudige formule om sy eie aandele teen 10% hoër as hul intrinsieke waarde terug te koop. Alte veel maatskappye (meer so in Amerika as hier) koop aandele terug teen belaglike hoë pryse wat waarde vernietig. Hou dus ’n valkoog oor terugkope en vra jouself af of jy bereid sal wees om nog aandele te koop teen die prys wat betaal word, omdat dit in wese die prys is wat jy sal betaal (aandeelhouerskontant is trouens jóú kontant).

Nog ’n belangrike punt wat hy opper, het betrekking op See’s Candy, maar met groter implikasies. “Wanneer ’n onderneming ’n verbruikersproduk vervaardig en versprei wat nie noodsaaklik is nie, is die klant die baas.” Dit is ’n uitstekende punt wat talle bestuurspanne ter harte moet neem. Met noodsaaklike produkte het die verbruiker ietwat van ’n keuse, maar uiteindelik moet hulle koop.

Met nie- noodsaaklike produkte kan die klant kies om glad nie te koop nie, dus is dit diens, gehalte en prys wat werklik saak maak. Berkshire Hathaway se algemene jaarvergadering sal op 1 Mei om 20:00 SA tyd virtueel op Yahoo.com plaasvind. Dis voorwaar die paar uur werd wat dit sal duur. 

* Stuur 'n boodskap aan terugvoer@finweek.co.za


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.