SWART-VRYDAG-AANBOD! Betaal slegs R9,99 vir die eerste twee maande as jy nou ’n intekenaar word. Spring gou!
Finweek
Beleggingskoste: Verstaan waarvoor jy betaal
8 November 2018
Foto: Shutterstock

Ek het al dikwels in die verlede in my rubrieke verwys na die Matrjosjka, of die Russiese ineenpassende poppe, want ek vind dit ’n baie gepaste analogie om aan te toon hoe beleggingsprodukte en hul koste werk.

Soos die beskrywing aandui, is ’n Matrjosjka ’n stel klein tot groot hol houtpoppe waar elke kleiner pop in die stel binne ’n groter pop pas.

Net soos met die Russiese ineenpassende poppe, pas verskillende beleggingsprodukte binne mekaar, en hoewel die verskillende verpakkings dalk aantreklik lyk, is daar gewoonlik koste verbonde aan elke afsonderlike laag. Met ander woorde, hoe meer “poppe” daar is, hoe minder sal jou opbrengs uiteindelik wees.

Schalk Louw is ’n portefeuljebestuurder by PSG Wealth.

Dit is om dié rede dat jy heeltemal seker moet wees dat jy die regte produk kies wanneer jy uiteindelik op die punt staan om dit te doen. ’n Koppelbeleggingsdiensverskaffer (Lisp) funksioneer baie soos ’n Matrjosjka-pop. Dit bied toegang tot ’n verskeidenheid beleggingsprodukte en fondse onder een dak.

As jy byvoorbeeld voor die Lisp jou kapitaal in Allan Gray, Coronation en PSG se fondse wou belê, moes jy afsonderlike betalings aan elk van die fondse doen. As jy drie jaar later besluit het dat jy Allan Gray en Coronation wil uitruil vir Investec- en Prudentialfondse, moes jy eers jou kapitaal van Allan Gray en Coronation onttrek het en dit dan weer in jou Investec- en Prudentialfonds belê.

Die bekendstelling van die Lisp het hierdie proses vereenvoudig. Deur jou kapitaal in ’n Lisp te belê, kan jy jou geld tussen fondse van verskillende verskaffers verdeel, alles op een plek. Selfs aanpassings is maklik – deur een vorm in te vul, kan jy jou hele portefeulje herbalanseer.

Jy kan ook in ’n verskeidenheid produkte belê, soos beleggingsplanne, uittree-annuïteite, uitkeerpolisse, bewaringsfondse en lewensannuïteite deur gebruik te maak van ’n enkele Lisp, in die fondse van jou keuse. Hoewel Lisps oor die jare goedkoper en eenvormiger geword het, bly dit belangrik om jou huiswerk te doen as jy die regte een wil kies.

Koste vir verskillende beleggingsgroottes wissel volgens die verskillende platforms – moet dus nie aanvaar dis ’n geval van “een grootte pas almal” nie. Ons het besluit om die standaardkoste vir beleggingsplanne (eksterne fondse) op verskillende beleggingsbedrae van verskillende Lisps (soos op die meeste verskafferswebtuistes gepubliseer word) na te gaan, en ons het die volgende ontdek:

1. Die gepubliseerde koste is nie noodwendig wat jy betaal nie. Jy kan uiteindelik dalk minder betaal, afhangend van verskeie faktore.

2. Lisp A mag ’n laer jaarlikse tariefstruktuur hê as Lisp B, maar as dieselfde onderliggende beleggings ’n hoër jaarlikse tariefklas op die een platform as op die ander het, mag jy op die ou einde hoër kostes hê as jy net fokus op die Lisp se tariefstruktuur.

3. Daar is nie noodwendig ’n verband tussen die getal fondse wat op ’n spesifieke Lisp beskikbaar is en die platformkoste nie. ’n Breukdeel van ’n persentasiepunt hier of daar klink dalk nie soos veel nie, maar dit is nie noodwendig die geval nie – want opbrengste word met die verloop van tyd saamgestel.

Soos hierbo gemeld is, is dié syfers dalk nie heeltemal akkuraat nie, aangesien die werklike ervaring kan wissel. Maar dit wys wel dat elke belegger moet seker wees hy weet wat in sy spesifieke geval geld. Dieselfde geld vir groot beleggers, want die kostestruktuur vir Lisps wissel ook op hoër vlakke.

Met die verloop van tyd sal ’n verskil in koste tot ’n verskil in opbrengste lei, en dit kan ’n impak op jou netto wins hê, soos die tabel toon. Daar is natuurlik baie meer oorwegings wanneer jy die regte belegging op die regte platform kies, en koste moet nie die enigste faktor wees wat jou laat besluit nie. Lisps bied ook ander voordele en, alles in ag genome, moet jy heeltemal tevrede wees met jou verskaffer en die diens wat hy bied.

Jy kan dalk besluit dat ’n breukdeel van ’n persentasiepunt vir jou die moeite werd is as dit vir jou later ’n beter ervaring en meer keuses bied. Die punt is dat wanneer jy besluit om jou poppe die een binne die ander te plaas, moet jy verstaan wat die totale koste is en hoe dit waarskynlik jou totale beleggingsopbrengs uiteindelik sal beïnvloed.

* Stuur 'n boodskap aan terugvoer@finweek.co.za

* Schalk Louw is ’n portefeuljebestuurder by PSG Wealth.

/

Meer oor:  Finweek  |  Beleggingskostes  |  Schalk Louw
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.