Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Beleggingstema's: Hou dié drie lentebloeisels dop
10 September 2020
Foto: Shutterstock

Die mense hou daarvan om te sê dat die tyd vlieg as jy jou geniet. Ek het nog altyd gedink dat so ’n mening waar is – maar dit was voordat 2020 aangebreek het. Nou het ons so pas die laaste maand van die derde kwartaal van die jaar binnegegaan, en skielik is dit amper weer tyd om oor ons beleggings en finansies vir volgende jaar te begin dink.

In die lig hiervan dink ek dit sal beter wees om, as ek mag, hierdie gesegde van ons so ’n bietjie aan te pas: “Die tyd vlieg as jy jou geniet, behalwe as jy ingeperk is, want dan vlieg die tyd selfs nog vinniger.”

Met alles wat in 2020 gebeur het, wil ek drie onderwerpe bespreek wat beleggers met die oog op volgende jaar in gedagte moet hou. Kom ons kyk na vanjaar tot dusver. Die MSCI-indeks vir alle lande (ACWI) het 2020 goed begin, en teen Valentynsdag verhandel die indeks vir die jaar 3% positief (in Amerikaanse dollars).

Toe kom Covid-19. Die wêreld het ’n grendelstaat binnegegaan, en die groei van die indeks het tot stilstand gekom. Teen 23 Maart het die indeks nie net die groei van 3% teruggegee nie, maar ook bykans ’n derde van sy waarde verloor in vergelyking met 31 Desember verlede jaar. Teen Junie het die wêreld stadig uit die grendelstaat begin beweeg.

Begin Augustus het die ACWI vir die jaar tot dusver positief geword. En teen 18 Augustus was die ACWI vir die jaar tot dusver weer 3% positief. Nie alles is heeltemal so positief nie.

Selfs ná die onlangse herstel in goudmyne wêreldwyd, verhandel die 30 grootste myne ter wêreld nou slegs teen ’n verwagte p/v van 16 maal oor een jaar.

Van die 46 beskikbare beursverhandelde fondse (ETF’s), verhandel slegs tien positief vir die jaar tot dusver. Teen 21 Augustus was die gemiddelde groeikoers vir alle lande wat nog nie vanjaar positief verhandel het nie, tot dusver vanjaar -16% in dollarwaarde. So hoekom lyk alle portefeuljes nie soos die ACWI nie? Een moontlike antwoord kan ons in Amerika vind.

Ons weet die S&P 500 is een van die beste beleggings in die afgelope vyf jaar, maar vanjaar was uitsonderlik. Einde Julie het die S&P 500 vanjaar reeds met meer as 2% (in dollars) gegroei.

Gedurende dieselfde tydperk (volgens FactSet en Goldman Sachs Global Investment Research) was die gemiddelde groei van die vyf grootste maatskappye in die indeks, naamlik Amazon, Apple, Facebook, Alphabet (Google) en Microsoft, 35%. Die oorblywende 495 maatskappye wat op die S&P 500 genoteer is, soos die res van die wêreld, verhandel steeds in negatiewe terrein (-5%).

Met die Nasdaq- saamgestelde indeks wat op 21 Augustus 2020 teen die hoogste historiese prys-verdienste-verhouding (p/v) sedert Julie 2002 verhandel, dink ek die internasionale tegnologiesektor is tans oorverhit, en wil ek beleggers se aandag vestig op drie ander sektore wat hulle dalk as alternatiewe beleggingsopsies kan oorweeg.

Daar skuil baie waarde in waarde

Waarde-aandele se onderprestasie beweeg nou diep in ekstreme vlakke. As ons die waarde-indeks (WI) van die MSCI se indeks vir alle lande met die ACWI vergelyk, sien ons dat die WI sedert einde 1995 slegs by twee geleenthede met 1,5 standaardafwykings onder die ACWI gepresteer het – einde 1999 en weer in 2011 ná die groot resessie van 2008 tot 2009.

Ná 1999 het die WI die volgende vyf jaar lank met 6% gegroei in ’n omgewing waar die ACWI met 9% gedaal het. Dit het in 2011 weer gebeur toe die WI met 45% gegroei het, terwyl die ACWI met slegs 29% gegroei het.

Met ander woorde, in albei gevalle het die WI met 15 persentasiepunte of meer (in dollarwaarde) beter as die ACWI gepresteer. Dié keer kan dit natuurlik anders wees, maar sedert die einde van Maart onderpresteer die WI weer met ’n 1,5 standaardafwyking.

Kan goud nog uitblink?

Goud is nie ver agter as dit kom by uitstekende prestasies vanjaar nie – afgesien van tegnologieaandele. Maar in teenstelling daarmee, verhandel goudmyne nie teen opgeblase waardasies nie. Dit kom daarop neer dat goudmyne teen die huidige hoër goudprys goeie geld verdien. Warren Buffett het ook onlangs onverwag aangekondig dat Berkshire Hathaway ’n belang in ’n goudmyn (Barrick Gold) verkry het.

Selfs ná die onlangse herstel in goudmyne wêreldwyd, verhandel die 30 grootste myne ter wêreld nou slegs teen ’n verwagte p/v van 16 maal oor een jaar. Ontleders wêreldwyd deel Buffett se gevoel, met Thomson Reuters se konsensus wat teikengroei oor 12 maande van meer as 40% in hierdie 30 myne se aandeelpryse verwag.

Nul nie beskore vir bank- en finansiële aandele nie

Schalk Louw is ’n portefeuljebestuurder by PSG Wealth.

Vir die drie jaar tussen September 2012 en September 2015 het die MSCI ACWI Select Gold Miners IMI-indeks in dollars met net minder as 70% gedaal. Daar is talle goeie redes aangevoer waarom dié situasie net sou vererger, en uiteindelik tot die myne se bankrotskap sou lei – China se vraag sou opdroog, en die dollar vir ewig versterk.

Ons het gehoor dat goudmyne teen 2020 nie meer sou bestaan nie, en nou hoor ek al hoe meer dat banke en die meeste finansiële en versekeringsmaatskappye teen 2025 nie sal bestaan nie. Dit het daartoe gelei dat die S&P Global 1 200 Financial Index meer as drie maal laer as die gemiddelde relatieweprysstandaardafwyking van tien jaar gedaal het – iets wat nie in die afgelope 20 jaar gebeur het nie.

Ek wil afsluit deur dit duidelik te stel dat hierdie drie beleggingsidees as alternatiewe opsies beskou kan word en dat dit ongetwyfeld die beste sal werk in kombinasie met ’n goed gediversifiseerde portefeulje.

* Stuur 'n boodskap aan terugvoer@finweek.co.za

* Schalk Louw is ’n portefeuljebestuurder by PSG Wealth.


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.