Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Besit die aandele-mark
11 Junie 2021
Helena Conradie, uitvoerende hoof van Satrix

Om eerste te wees met enige ding ter wêreld gaan beslis met ’n mate van druk gepaard, soos in die geval van Helena Conradie, wat as die uitvoerende hoof van Satrix aan die stuur staan van ’n beleggingsbestuursmaatskappy wat in November 2000, die land se eerste beursverhandelde fonds, (ETF), bekendgestel het.

Dan is daar die druk vir óf verdere hoogtepunte óf om in die bedryf te bly. Desondanks toon Conradie geen teken van die druk nie. Danksy haar dekades lange ervaring in die bedryf bly sy kalm en onverstoord, maar met ’n ywer en geesdrif vir die sterk kultuur van innovasie by die batebestuurder en ’n besorgdheid oor beleggersopvoeding, veral ná die GameStop druk op kortverkopers wat deur kleinbeleggers (Reddit/Robinhood) veroorsaak is.

Nog nie heeltemal daar nie

Met R130 miljard onder bestuur (sedert April 2021) het Satrix van ’n enkele baanbrekende produk, die Satrix 40 ETF, gevorder tot die bestuur van portefeuljes wat indekse navolg en faktore-gebaseerde (slimbeta-) portefeuljes, deur geskeide mandate, ’n diverse verskeidenheid van ETF’s, saamgevoegde lewenspolisse, effektetrusts en buitelandse ondernemings vir kollektiewe beleggings in oordraagbare sekuriteite (“UCITS”).

Die markkapitalisasie van ETF’s en beursverhandelde notas (ETN’e) wat op die JSE genoteer is, het in 2010, ’n dekade nadat die eerste ETF bekend gestel is, met 21% gegroei en volgens etfSA van R27,5 miljard aan die einde van 2009 tot R33,3 miljard teen die einde van 2010 toegeneem.

Aan die einde van die eerste kwartaal van 2021 het die totale markkapitalisasie van alle ETF’s en ETN’e wat op die JSE genoteer is van R111 miljard aan die einde van 2020 tot R119,7 miljard gestyg, wat ’n styging van 7,8% verteenwoordig. Ondanks dié aansienlike groei, nie net vir Satrix nie, maar ook die plaaslike ETF-bedryf, sê Conradie “ná 20 jaar is ons verseker nog nie by ’n toppunt nie”.

Met geen nuwe ETF’s of ETN’e in die eerste kwartaal van vanjaar uitgereik nie, bly die totale getal beursverhandelde produkte op 137, bestaande uit 78 ETF’s en 59 ETN’e. “Ek reken ons kom eintlik nou eers aan die gang,” sê Conradie. “Ons internasionale eweknieë in die bedryf is ons vooruit, maar ons is beslis besig om in te haal noudat meer mense begin sien hoe voordelig dit is om dié finansiële voertuie te gebruik.”

Die reeks Satrix-produkte op die JSE leen hulle tot verskillende strategieë vir ’n wye verskeidenheid van beleggers met verskillende beleggingsdoelwitte en -profiele. Terwyl ’n uiteenlopende klomp verskaffers die mark betree het sedert Satrix die weg gebaan het, sê Conradie sy meen wel daar sal met verloop van tyd konsolidasie kom. “Die beste ding vir die belegger is om koste te bekyk en te vergelyk. Natuurlik is dit nie ’n goeie ding om ’n prysoorlog te hê nie, maar in die algemeen is dit goed wanneer koste en gelde laag gehou word vir die belegger,” sê sy.

Om die mark te besit

“Om die mark te besit” was nog altyd deel van die Satrix-storie, sê Conradie. “Besit die mark” is die frase wat dié beleggingsbestuursmaatskappy as sy slagspreuk aangeneem het.

Hiermee bedoel Conradie egter nie dit is die batebestuurder wat die mark besit of oorheers nie, maar kliënte. Dit is sedert sy ontstaan deel van Satrix se geskiedenis om kleinbeleggers die middelpunt van sy fokus te maak, veral wat koste en tariewe betref. ’n Groot aantreklikheid van ETF’s is hul lae koste vergeleke met aktief bestuurde fondse.

In wese stel ETF’s beleggers in staat om die prestasie van ’n indeks presies na te volg, maar anders as met konvensionele indeksfondse kan ETF’s enige tyd van die dag gekoop en verkoop word. Tien jaar gelede was Satrix-fondse se totalekosteverhouding sowat 0,45%, teenoor ’n destydse gemiddelde van sowat 1,7% vir ’n algemene aandelefonds vir kleinbeleggers.

Conradie beskryf ETF’s daarom as ’n produk wat vir gewone beleggers geskik is vanweë hul laekostevoordeel, deursigtigheid en die feit dat hulle genoteer is. Dit gee aan die gewone belegger ’n geleentheid “om die mark te besit”. Regstreekse kleinbeleggers kan aanlyn na platforms soos EasyEquities en SatrixNOW gaan om hul transaksies aanlyn te doen, sê Conradie, wat ook steeds verbaas is oor beleggers se reaksie op die Covid-19-krisis en die markafswaai wat daaruit voortgespruit het.

“Ofskoon daar markafswaaie was wat sou maak dat mense paniekerig raak en verkoop, het ons [Satrix] aanvanklik nie ’n grootskaalse onttrekking van fondse gesien nie,” sê sy. “Trouens, die teenoorgestelde het gebeur.” Conradie sê mense het dit as ’n koopgeleentheid beskou. Hoe dit ook al sy, teen die middel van 2020 het die nadelige gevolge van die inperkings baie duideliker begin raak toe ál meer mense hul werk en inkomste verloor het. Daar was onttrekkings toe sommiges die geld nodig gekry het om hulself te onderhou, sê sy. Hoewel meer uitvloeiings in dié tyd gesien is, het die invloeiings nie opgehou nie, sê Conradie.

“Mense wat steeds ’n inkomste en werk gehad het, het dié tydperk as ’n geleentheid beskou om te spaar, en omdat die mark effens herstel het, het hulle dit as ’n beleggingsgeleentheid beskou.” Terwyl die beleggings in ETF’s aanhou toeneem, beskou Conradie ETF’s nie net meer as ’n passiewe belegging nie; sy sê sy sien dat hulle in die rigting van ’n “toegangsvoertuig” beweeg. Sy verduidelik dat ETF’s “toenemend ’n toegangsvoertuig word om toegang te verkry tot internasionale en plaaslike markte, megatendense en kriptogeldeenhede, byvoorbeeld. ETF’s is ’n toegangsvoertuig wat doelmatig, deursigtig en kostedoeltreffend is”.

“Beleggers moet vra waar hulle hul beleggingsadvies vandaan kry”.

Om 20 jaar van 20 ETF’s te vier

Ter viering van sy 20ste verjaardag het die beleggingsbestuursmaatskappy verskeie feestelikhede beoog, waaraan maande lank beplan is. Die 20ste herdenking van die maatskappy se bestaan en die viering van sy 20 genoteerde ETF’s het toevallig egter met Covid-19 saamgeval en alles, selfs om kantoor toe te gaan, het tot stilstand geknars.

Toe die inperkingsmaatreëls effens verslap, sê Conradie, moes die span eers weer op ’n plek kom “waar ons gevoel het ons het genoeg vertroue om iets te doen”. Pleks van soos gewoonlik te noteer, wat altyd by die JSE met groot fanfare gepaardgegaan het, het Satrix sy eerste virtuele notering van ’n ETF in Mei 2020 gehad en daarna ook ’n klompie ander ETF’s genoteer, “tot by die punt waar ons op die ou end 20 ETF’s in die 20ste jaar van Satrix gehad het,” sê Conradie.

“Met die virtuele noterings het ons besef ons bereik in werklikheid meer mense. Meer mense kon bywoon en meedoen. Dít was van die uitdagings waarby ons moes aanpas. Ek dink nie die uitdagings sal ooit verander nie; die aard daarvan sal egter van die sakekant na die mensekant toe verander. ’n Mens moet jou vinger op die pols hou om jou sakeonderneming en sy mense te monitor ten opsigte van waar hulle hul bevind,” sê sy.

Produkuitbreiding

Terwyl die pandemie oral ter wêreld verwoesting gesaai het, het Satrix nie toegelaat dat dit hom verhinder om sy verjaardagdoelwitte, wat lank vooruit beplan was, te bereik nie. Eerstens was daar die virtuele notering van die Satrix SA Bond ETF in Mei 2020, gevolg deur die MSCI China, Global Aggregate Bond en MSCI ESG ETF.

Ook het die beleggersaptyt, soos Conradie gesê het, nie heeltemal verdwyn nie. “Invloeiings duur voort. Ons het ons fondse uitgebou,” sê sy. “Die China ETF is byvoorbeeld in Oktober 2020 bekendgestel. Binne vier maande het ons ’n miljard rand gehaal, meesal met kleinbeleggers. Ek reken dit vertel ’n verhaal van insig.

Kleinbeleggers besef die ekonomiese mag verskuif van Wes na Oos; hulle let op tendense en lees meer.” Conradie, wat sterk daaroor voel dat Jan Burger moet verstaan ETF’s is nie heeltemal sonder risiko nie, sê “beleggers moet vra waar hulle hul beleggingsadvies vandaan kry”. “Is dit van ’n Twitter-voer? ’n Instagram-plasing? ’n Finansiële adviseur of iets of iemand wat hulle vertrou? Beleggers moet dus vra waar hulle daardie inligting en advies vandaan kry. Wat ons wel weet, is dat daar beslis nie ’n gebrek aan inligting en veral onmiddellike inligting is nie,” sê sy.

“Alle belanghebbendes het ’n rol te speel. Ons as ’n bedryf verskaf baie meer toegang deur produkte en aanlyn platforms – en moet dit met die omsigtigheid hanteer waarmee ons dit verskaf.”

Conradie verduidelik jy behoort dit wat jy verskaf met opleiding en inligting aan te vul. “Wanneer jy geleenthede oopgooi, gaan dit met verantwoordelikhede gepaard.” Volgens Conradie beplan die beleggingsbestuursmaatskappy om bestendig voort te gaan om die beleggingsaanvraag en -situasie te bekyk en gepaste beleggingsprodukte te voorsien.

Sy sê aan finweek dat planne vir die nuwe jaar onder meer behels om na produkte te kyk wat blootstelling bied aan gesondheidsorg, infrastruktuur, slimstede, internasionale eiendom en ander streke, soos Indië. Satrix stel vanjaar ook ’n plaaslike ETF bekend wat op diversiteit en insluiting gerig is. Hoewel Conradie nie in dié stadium besonderhede kan uitspel nie, verduidelik sy die ETF sal veranderlikes soos geslagsgelykheid in die samestelling van SA maatskappye se direksies in ag neem.

* Stuur 'n boodskap aan terugvoer@finweek.co.za

* Foto: Verskaf

Meer oor:  Finweek  |  Satrix  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.