Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Die eiendomsektor: Vooruitsigte lyk al hoe beter
7 Februarie 2019

Die twee plaaslike toonaangewende eiendomsindekse het albei sedert die begin van die jaar bokant hul vergelykingstandaard van die 200-daagse bewegende-gemiddelde-handelspatroon uitgestyg en bied hoop vir beleggers in die beleërde sektor dat ’n ommeswaai aan’t gebeur is.

Daar was reeds ’n aantal vorige uitbrekings deur die bewegende gemiddelde sedert die hoogtepunte van Januarie 2018. Hulle was egter marginaal gewees en verdere terugsakkings het daarna plaasgevind. Dié uitbreking kan egter volhoubaarder wees.

Dié beweging was egter duideliker in die Indeks van Alle Eiendom (die Alpi of J803), wat ’n breër internasionale blootstelling bied en in Oktober 2018 bekendgestel is.

Die tradisionele SA Eiendomsindeks (die SAPY of J253) is verklein tot ’n meer plaaslike blootstelling ná talle uitdagings wat strek van kommer oor onteiening sonder vergoeding tot hoër rentekoerse in Amerika, lae ekonomiese groeivooruitsigte in Suid-Afrika en die negatiewe Viceroy-verslag oor Resilient en sy verwante maatskappye.

Goeie nuus vir beleggers is dat die futlose Britse eiendomsektor, met maatskappye soos Capital & Counties, Hammerson en Intu, ook skynbaar in ’n herstelfase is.

Dit is gegrond op optimisme dat Brittanje ’n chaotiese scenario van ’n Brexit sonder ooreenkoms kan vryspring, wat die pond in die jongste tyd gesteun het. Hoe realisties dié sienings is, sal eers oor die volgende paar maande duidelik word.

Maar die mark het tydelik die benadering gevolg dat ’n 12-maandelange terugsakking van 21% in die aandeelprys by Capital & Counties, 38% by Hammerson en 50% by Intu, die risiko van Brexit voldoende by die hoëgehalte-maatskappye inprys, al word daar erken dat Brexit steeds groot gevaar vir die sektor inhou.

Plaaslik het al die aandele van 12-maandelange laagtepunte herstel. Hoewel hulle nog nie uitermatig goed herstel het nie, het die mark blykbaar minder risiko-afkerig geword. Dit is verstaanbaar, gegewe die aantreklike opbrengs van 9,3% wat die sektor tans bied, die beste in ’n dekade en ongeveer 0,5 persentasiepunte hoër as die huidige opbrengs op die R186.

Sommige eiendomsaandele bied tans selfs ’n dividendopbrengs van 38%. Dit volg op die rampspoedige prestasie van 2018 met die SAPY wat 25% op kapitaalgroei en dividende verloor het, die swakste sedert 2008. Dié sektor was ’n toppresteerder onder die hoofbateklasse oor die afgelope paar jaar.

Sommige eiendomsaandele bied tans selfs ’n dividendopbrengs van 38%.

Maar los die makietie vir later. Hoewel die herstel werklik blyk te wees, lê daar nog ’n lang pad voor. Growthpoint het met 11% vanaf sy 12-maandelaagtepunt van R22,20 gestyg, maar is steeds 21,6% laer as sy vergelykbare hoogtepunt van R31,50. Hyprop, met sy uitgebreide blootstelling aan die hoëvlak-kleinhandelsektor, verhandel 10% hoër as sy laagtepunt van R79,40 maar is steeds 28% laer as sy vorige hoogtepunt van R123,50.

Party van die topaandele het merkwaardig bokant hul persentasieverliese van verlede jaar se bloedbad herstel. EPP het met 33% herstel vanaf sy vorige laagtepunt en is net 5,7% onder sy vorige hoogtepunt. Sirius is 25% hoër nadat hy 12% verloor het. Die logistiekmaatskappy, Equites, se terugsakking vanaf sy hoogtepunt het tot 5,2% gekrimp en bied beleggers 23,9% met opwaartse potensiaal vanaf sy laagtepunt van R16,82 in 2018.

Selfs die sukkelende plaaslike aandeel, Rebosis, wat deur ’n hoë skuldvlak en strategiese verwarring geteister word, het met 3,7% gestyg nadat hy ’n absolute laagtepunt van R2,43 bereik het. (Hy staan steeds op 75% laer as sy vorige hoogtepunt van R10,40.) Die gehalte plaaslike maatskappy, Emira, het met 14,4% gestyg, maar is steeds 11,8% laer as sy vorige hoogtepunt van R17,19. Accelerate het voordeel getrek uit die langverwagte opening van die opgeknapte Fourways Mall, wat vir April 2019 beplan is.

Die aandeel het met 34% gestyg vanaf ’n laagtepunt van net minder as R3 per aandeel. Die SAPY-indeks bevat 21 maatskappye, maar word oorheers deur Growthpoint en Redefine, wat sowat 40% van die indeks beslaan. Die Alpi verdien 50% van sy verdienste in die buiteland. Beleggers in die Alpi kan voordeel trek uit ’n groter verspreiding van risiko omdat hulle gekoppel is aan groter blootstelling aan buitelandse markte en aan die hoër ekonomiese groei in Europa vergeleke met Suid-Afrika.

Maar SAPY-beleggers gaan sonder twyfel voordeel trek uit ’n plaaslike herstel wat verteenwoordig word deur beter BBP-groei en bestendige kleinhandelsverkope. Vergeleke met wêreldstandaarde, is Suid-Afrika se belêbare eiendomsektor klein, met bestuurde bates van sowat R550 miljard, skaars 3% van die JSE se totale markkapitaal.

Maarten Mittner is ’n vryskut- finansiële joernalis en markdeskundige.

Die ruimte vir verdere uitbreiding is enorm, veral aan die residensiële kant. Party ontleders het groei van 10% in 2019 vir dié sektor voorspel, kapitaal en inkomste ingesluit. Dit sal ’n merkwaardige herstel vanaf verlede jaar wees toe sommige maatskappye met tussen 40% en 50% onder hul netto batewaarde in risiko-af-handel gedaal het.

Dit het koopgeleenthede beteken omdat die uitgebreide terugsakking op sentiment en emosie gegrond was eerder as die maatskappye se werklike inherente waarde. Daar is steeds uitstaande sektorale kwessies: die Gedragsowerheid vir die Finansiële Sektor het nog nie uitspraak gelewer oor die binnehandel- aanklagte teen Resilient nie.

Dapper beleggers het egter gekoop, gegrond op Resilient se aantreklike bates. Resilient, wat tans teen ongeveer R60 verhandel, het ’n opbrengs van 51% vir beleggers gelewer vanaf sy laagtepunt van R39,75, maar hy verhandel steeds baie laer as verlede jaar se hoogtepunt van R120, wat bereik is voor die Viceroy-verslag.

Die vraag na Nepi Rockcastle is meer getemper en sy aandele verhandel tans 20% bokant die laagtepunt van R96,92 maar dit is 40% laer as die hoogtepunt van R194,78 in 2018.

* Stuur 'n boodskap aan terugvoer@finweek.co.za

* Maarten Mittner is ’n vryskut- finansiële joernalis en markdeskundige.

Meer oor:  Finweek  |  Eiendomsbeleggings  |  Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.