Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Die risiko’s van buitelandse belegging
18 April 2019

Daar is nie ’n perfekte tyd om in die buiteland te belê nie, hoofsaaklik omdat soveel faktore ter sprake is. Om buitelandse beleggingsmarkte te verken kan kompleks wees en hou verskeie risiko’s in.

Van dié risiko’s is wisselkoerswisselvalligheid, ’n gebrek aan likiditeit in kleiner markte, en die gevaar dat beleggers steeds blootstelling aan dieselfde onderliggende veranderlike of faktor sal hê al besit hulle baie aandele, asook belastingrisiko.

Chris Potgieter, hoof van Old Mutual Wealth Private Clients Security, sê die wêreld se ekonomiese kern verskuif na die suide en die ooste, maar die kern van die internasionale aandelemark is beslig nog in die noorde en weste.

Suid-Afrikaanse beleggers is oorgewig in plaaslike beleggings en ondergewig in die wêreld, terwyl internasionale markdeelnemers na Amerika oorhel en baie beperkte blootstelling het aan ontluikende markte, die wêreld se groeiaandrywers op lang termyn.

Ontluikende markte is egter baie wisselvallig, met ’n lang geskiedenis van ontluikendemark-krisisse. “Dis niks nuuts nie, en beleggers moet van die risiko’s bewus wees,” sê Potgieter.

Ontluikendemark-risiko’s

Al is dit ’n wonderlike idee om te diversifiseer deur in die buiteland te belê, is Suid-Afrika steeds ’n ontluikende mark. “Deur bloot bykomende buitelandse blootstelling aan ontluikende markte te kry, gaan nie noodwendig beteken dat jou portefeulje in ’n beter risikoaangepaste posisie is nie,” sê James Newell, beleggingshoof van Maitland Family Office.

Ontluikende en nuwe markte is aansienlik wisselvalliger, veel minder likied, en het wisselvallige geldeenhede vergeleke met ontwikkelde markte, sê George Herman, beleggingshoof van Citadel. Hy sê Suid-Afrikaanse beleggers is plaaslik reeds aan dié risiko’s blootgestel.

Wisselkoerswisselvalligheid

Volgens Newell beskou party mense blootstelling aan ’n ander geldeenheid as ’n geleentheid. Dis egter belangrik om wisselkoersrisiko’s in gedagte te hou, veral wanneer beleggers op beleggings vir inkomstebehoeftes in Suid-Afrika staatmaak.

Die land ondervind baie politieke risiko, baie ekonomiese risiko, en kommer oor nog ’n verlaging van die kredietgradering, maar Newell sê dié elemente is reeds in ’n mate by markpryse ingereken. Dit beteken “dat die rand nie noodwendig tans onderwaardeer is nie. Dis ’n belangrike risiko om te oorweeg,” sê Newell.

Belastingrisiko’s

Baie beleggers hou van randgedenomineerde voerfondse weens die persepsie dat dit ingewikkeld is om om belasting- en Reserwebankklaring aansoek te doen ten einde regstreeks in die buiteland te belê.

Paul Hutchinson, verkoopsbestuurder van Investec, sê egter vir diskresionêre beleggers (anders as om deur ’n aftreefonds of ’n produksaamvatfonds vir ’n lewende annuïteit te belê) is die belastinggevolge beter as daar regstreeks in die buiteland belê word, eerder as deur ’n randgedenomineerde voerfonds.

Die rand of buitelandse geldeenheid is daarom nie ter sprake by die bepaling van die kapitaalwins nie.

Hy sê wanneer beleggers die buitelandse struktuur (regstreekse belegging) beëindig, moet hulle die kapitaalwins in die buitelandse geldeenheid (dollar, euro of pond) bereken en die wins met die randwisselkoers op die datum van onttrekking vermenigvuldig. Die rand of buitelandse geldeenheid is daarom nie ter sprake by die bepaling van die kapitaalwins nie.

Wanneer hulle egter ’n belegging in ’n randgedenomineerde voerfonds beëindig, dra enige randdepresiasie wat die waarde beïnvloed van die buitelandse bates waarin die fonds belê is, egter tot die kapitaalwins by. “Jy sal daarom onderworpe wees aan kapitaalwins op die kapitaalgroei én die randdepresiasie,” sê Hutcinson.

In ’n voorbeeld waar ’n belegger R1 miljoen in ’n randgedenomineerde voerfonds belê het, teenoor ’n dollarweergawe van amper dieselfde fonds, was die opbrengsverskil meer as R90 000 vanweë randdepresiasie in die beleggingstydperk.

Waardasies

Radhesen Naidoo, sakeontleder van Allan Gray, sê ’n sleutelrisiko vir beleggers is om te veel vir ’n bate te betaal. “Die prys wat jy vandag betaal, bepaal uiteindelik jou toekomstige opbrengs en die risiko van permanente kapitaalverlies.

Ons het bevind dat deur bates te koop vir minder as wat ons meen hulle werd is, eerstens minder daalrisiko beteken, en dat dit gewoonlik ’n lonende strategie is om in verskillende beleggingsiklusse te gebruik.”

As daar sektore is wat uit ’n diversifiseringsoogpunt aantreklik is, sal Maitland nie noodwendig daarin belê as hulle meen dat die bates oorprys is nie.

Maitland se uitgangspunt is ook om waardasies – ’n aandeel se prys-verdienste-verhouding – te bekyk.

As daar sektore is wat uit ’n diversifiseringsoogpunt aantreklik is, sal Maitland nie noodwendig daarin belê as hulle meen dat die bates oorprys is nie.

Veilige bateklasse

Naidoo sê met groter wisselvalligheid op internasionale markte kan dit aanloklik lyk om nou in “veiliger” bateklasse, soos effekte en kontant, te belê. ’n Sleutelrisiko is egter om in ’n omgewing van lae rentekoerse nie reële opbrengs te kan behaal nie.

Een van die gevolge van ’n omgewing van lae rentekoerse is dat effektebeleggers ook die aandelemark betree op soek na “effekteagtige aandele”, soos defensiewe aandele wat ongeag die stand van die mark ’n konstante dividend en bestendige verdienste bied.

Dié aandele lyk nou duur vergeleke met die groter mark. “Insluiting van dié veilige bates by ’n portefeulje moet fyn saam met ander geleenthede oorweeg word, want dié strategieë bewaar nie noodwendig kapitaal oor langer tydperke nie,” sê Naidoo.

Meer oor:  Finweek  |  Risiko  |  Buitelandse Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.