Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Fonds in fokus: Konsentreer op spesialisvaardighede
10 September 2021

Dié fonds is ’n plaaslike algemene aandeleportefeulje wat hoë langtermyn-kapitaalgroei najaag. 

Wat die fondsbestuur sê:

Die PortfolioMetrix BCI SA Equity Fund soek aantreklik gewaardeerde aandele uit van maatskappye wat op die JSE genoteer is en op die duur sterk beleggingsgroei kan behaal. Die portefeulje kan ook in deelnemende belange en ander vorms van deelname in portefeuljes van kollektiewe beleggingskemas belê, soos hy gedoen het met die Coronation-, Fairtree-, 36ONE- en Satrix-fondse wat onder sy tien topbates tel.

“Ons glo die spesialis sal oor ’n tydperk beter as die veelsydige presteer,” sê Brendan de Jongh, hoof van navorsing by PortfolioMetrix, oor die toewysing van eksterne kollektiewe beleggingskemas in die portefeulje.

“Ons verkies gevolglik om na gespesialiseerde vaardighede binne bateklasse te soek en portefeuljes met dié stelle vaardighede te bou, eerder as om alle funksies intern te probeer verrig. Ons meen dié strategie is pragmaties en behoort oor ’n tydperk uitmuntende risiko-aangepaste prestasie tot gevolg te hê.”

Terwyl die fonds vir die jaar tot nou toe en oor langer tydperke sterk absolute en relatiewe prestasie geniet het, beklemtoon De Jongh dat dit belangrik is om te verstaan wat dié opbrengste dryf, want om die redes vir uitprestasie te ondersoek, is net so belangrik as om onderprestasie te ontleed. By die samestelling van portefeuljes is die fonds veral gesteld op gekonsentreerde risikoneming en die waarskynlikheid van sukses. “Ons het ’n mark gehad wat deur sterk kommoditeitsopbrengste aangedryf is, wat siklies van aard is.

Aan die ander kant het jy plaaslik gefokuste maatskappye wat as baie goedkoop aangeslaan word, maar met moeilike bedryfsomstandighede te kampe het.” Om risiko’s tussen dié twee temas deur te bestuur, is volgens De Jongh ’n uitdaging. Die fonds gebruik ’n multibestuurde strategie wat na aktiewe bestuur in die Suid-Afrikaanse mark oorhel.

“Diversifisering van die fonds se strategie, uiteenlopende standpunte en verskille in posisionering sorg vir ’n portefeulje wat dié risiko’s bestuur en steeds kan uitpresteer ná aftrekking van koste,” sê hy. Prosus het onlangs aangekondig daar is voldoen aan al die voorwaardes vir sy aanbod om Naspers-aandele te koop en dat ’n ooreenkoms om ’n kruisbesitstruktuur tussen die twee maatskappye te vestig, sal voortgaan.

PortfolioMetrix sê die ingewikkeldheid van die oorkruisaandeelhouding tussen Prosus en Naspers is nie ideaal nie en, soos die meeste aandeelhouers, skram die fonds weg van kompleksiteit. “Hoewel die transaksie nie tot ’n onmiddellike ontsluiting van waarde sal lei nie, is ons van mening dat die transaksie ’n stap in die regte rigting is en die geleentheid bied vir verdere transaksies om die ingebedde diskonto’s te verminder.” Die fonds het as gevolg hiervan nie ’n wesenlike herposisionering van die Naspers-bate in die portefeulje aangepak nie.

Hoekom finweek die fonds sal oorweeg:

Die fonds bied blootstelling aan aandele wat in SA genoteer is. JSE-aandele verhandel ook teen ’n 50%-diskonto op die MSCI-wêreldindeks en is op hul laagste relatiewe aanslag in byna twee dekades. Dit beteken heelwat negatiwiteit is reeds ingeprys in die mark en bied ’n goeie beginpunt vir moontlike toekomstige opbrengste, sê De Jongh. ¦

* Stuur 'n boodskap aan terugvoer@finweek.co.za

Meer oor:  Finweek  |  Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.