Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Gebeure wat die ekonomie in 2019 sal bëivloed
20 Desember 2018

Die Amerikaanse president Donald Trump se wittebrood met finansiële markte nader sy einde omdat onsekerheid oor sy handelsoorlog met China vertroue ondermyn en daar tekens is dat die groei, veroorsaak deur grootskaalse belastingverlagings en besteding, begin afneem.

Hoewel Amerikaanse aandele herstel het, het die drie vername indekse – die Dow Jones, S&P 500 en Nasdaq – in die eerste week van Desember meer as 4% laer gesluit, die ergste begin vir Desember sedert die wêreldwye resessie in 2008.

Nog erger, Amerikaanse voorspellers glo nou die ekonomie sal in 2020 in ’n resessie verval – ironies genoeg, die jaar waarin Trump herkiesbaar word.

Maar die herstel sal waarskynlik nie voortduur nie.

Die uitslag van ’n drie maande lange opskorting van bedrywighede rakende tariewe tussen Amerika en China is steeds onseker, en al hoe meer ontleders waarsku dat die dekade lange bulmark – die langste in die geskiedenis – sy keerpunt begin bereik.

Trump se tariewe

Die tariewe wat die Trump-administrasie op invoer uit China en ander lande gehef het, het meer skade as goed gedoen – die Amerikaanse handelstekort op goedere en dienste was in Oktober 11% teenoor dieselfde van 2017.

As dié neiging aanhou, sal dit teen die einde van 2018 ’n ongeëwenaarde $600 miljard bereik, 20% hoër as toe Trump aan bewind gekom het.

Nog erger, Amerikaanse voorspellers glo nou die ekonomie sal in 2020 in ’n resessie verval – ironies genoeg, die jaar waarin Trump herkiesbaar word.

Teen hierdie agtergrond sê finansiële ontleders plaaslike beleggers moet vergeet van die idee dat die Amerikaanse mark volgende jaar steeds die beste opsie sal wees. Hulle stel voor dat beleggers eerder meer geld in plaaslike aandele belê.

Peter Brooke, hoof van MacroSolutions by Old Mutual Investment Group

Dit bied beter waarde, veral aangesien die dollar binnekort waarskynlik sal verswak. “Nou is nie die tyd om jou gebalanseerde fonds te verkoop en in die buiteland te belê nie. Dit sal wees om van die wal af in die sloot te beland,” het Peter Brooke, hoof van MacroSolutions by Old Mutual Investment Group, op 4 Desember tydens ’n voorlegging gesê.

“Ons het geld teruggebring en is nou ’n bietjie ondergewig in die buiteland.”

Daar is konsensus dat die rand onderwaar- deer is, selfs nadat van die verliese van vanjaar teruggewen is.

Baie ontleders glo die plaaslike geldeenheid kan volgende jaar verder verbeter, wat winste van oorsese beleggings sal demp.

Die dollar sal waarskynlik waarde verloor omdat Amerikaanse rentekoerse volgende jaar minder sal styg as wat verwag word – in ooreenstemming met die land se stadiger tempo van ekonomiese groei.

Die rand se status as ’n verteenwoordiger van ander ontluikendemark-geldeenhede beteken egter dat hy gestraf kan word weens enige beleggingsonttrekkings as gevolg van die handelsoorlog, asook die vooruitsigte van swakker internasionale groei.

Die Verenigde Koninkryk se onvermoë om ’n gladde Brexit te onderhandel, dra by tot die onstuimigheid in die finansiële markte.

Die Verenigde Koninkryk se onvermoë om ’n gladde Brexit te onderhandel, dra by tot die onstuimigheid in die finansiële markte.

Markte is ook onkant betrap deur die politieke krisis in Frankryk, waar gewelddadige betogings president Emmanuel Macron gedwing het om ’n brandstofbelastingverhoging te skrap en ander lewenskoste vir ontevrede Franse burgers te verlaag.

Eskom hou die sleutel

Die verwagte verbetering in Suid-Afrika se omstandighede gedurende 2019 kan egter in die wiele gery word weens Eskom se verslegtende finansiële en bedryfskrisis.

Dit lyk al hoe meer waarskynlik dat dit gaan lei tot kredietafgraderings en ’n verlangsaming in die tempo van ekonomiese groei.

Die Fitch-graderingsagentskap het op 7 Desember gesê gerugte van regeringsplanne om R100 miljard van die kragverskaffer se skuld te absorbeer, sal nie op sigself lei tot ’n afgradering nie, maar sonder ’n oortuigende regrukstrategie is daar steeds ’n risiko van verdere finansiële inspuitings, wat die land se verslegtende skuldprofiel sal vererger.

Annabel Bishop, hoofekonoom van Investec

Dié planne sal eers aan die begin van volgende jaar aangekondig word, en die komende algemene verkiesing in Mei sal die regering se vermoë beperk om die ongewilde stappe te doen wat nodig is om Eskom se finansies weer in orde te kry.

Dit sluit in die vermindering van sy vergrote arbeidsmag en die skerp verhoging van elektrisiteitspryse.

Annabel Bishop, hoofekonoom van Investec, het haar groeivoorspelling vir Suid-Afrika gedurende 2019 van 1,9% tot 1,4% verlaag weens strukturele swakhede.

Dit sluit in Eskom se onvermoë om die kragvoorsiening stabiel te hou, asook die risiko wat die kragverskaffer vir die land se finansies inhou.

Begroting

Die nasionale tesourie se begroting in Februarie sal wys hoe hy van voorneme is om die krisis te hanteer, en dit sal waarskynlik deurslaggewend vir kredietgraderingsagentskappe wees.

Fitch en Standard & Poor’s het Suid-Afrika se soewereine gradering reeds rommelstatus gegee, maar Moody’s Investors Service kan gedwing word om dieselfde te doen.

“Nou is nie die tyd om jou gebalanseerde fonds te verkoop en in die buiteland te belê nie. Dit sal wees om van die wal in die sloot te beland.”

Dit sal lei tot kapitaaluitvloei, en dus ’n verswakking van die rand, inflasie sal verhoog en die regering se skulddienskoste kan verder verhoog.

Die gevolge hiervan kan die Suid-Afrikaanse Reserwebank laat besluit om rentekoerse weer volgende jaar te verhoog, wat die verbetering van groei in die tweede helfte van vanjaar sal demp.

George Glynos, besturende direkteur by Econometrix Treasury Management

“Dit gaan regtig alles oor die begroting in Februarie – die regering sal nie ’n streng begroting voor die verkiesing voorlê nie,” het George Glynos, besturende direkteur van Econometrix Treasury Management gesê. “Dit kan ’n jaar later gebeur, maar teen daardie tyd is die koeël reeds deur die kerk – daar sal afgraderings wees.”

Benewens hierdie grensverskuiwende wêreld- en plaaslike gebeure, sê batebestuurders dat daar twee belangrike tendense is wat Suid-Afrikaanse beleggers volgende jaar moet onthou: die insluiting van omgewings-, maatskaplike en bestuurstandaarde (OMB) en die toenemende invloed van kunsmatige intelligensie (KI) op finansiële besluite. (Sien kassies.)

  • Stuur 'n boodskap aan terugvoer@finweek.co.za
  • Mariam Isa is ’n vryskutjoernalis wat in 2000 na Suid-Afrika gekom het as die finansiële hoofkorrespondent vir die Reuters-nuusagentskap nadat sy in die Midde-Ooste, Brittanje en Swede gewerk het. Sy het haar in 2007 as ekonomiese redakteur by Business Day aangesluit en het in 2014 bedank om oor ’n breër reeks onderwerpe vir verskeie publikasies in Suid-Afrika en Brittanje te skryf.

Belê vir volhoubaarheid

’n Verslag van die Amerikaanse Forum for Sustainable and Responsible Investment het getoon dat die totale bates met omgewings-, maatskaplike en bestuurstandaarde-strategieë (OMB) van $639 miljard in 1995 tot $1 200 miljard teen die begin van 2018 gestyg het. Dit is ’n saamgestelde jaarlikse groeikoers van 13,6%. Studies toon dat die toenemende aantal mense wat volhoubare beleggings maak, glo dat hulle beter langtermynopbrengste sal kry, aangesien verantwoordelike maatskappye voorberei op maatskaplike en omgewingsverandering en in die toekoms meer winsgewend sal wees. Daar word ook geglo dat hulle waarskynlik beter bestuur word en minder blootgestel is aan die risiko van omgewingsongelukke, maatskaplike onrus of straf deur reguleerders. Die bewyse stem blykbaar hiermee saam. Sedert 1990 het die MSCI KLD maatskaplike indeks beter as die S&P 500 gepresteer – ’n jaarlikse opbrengs van 11,2% teenoor 10,7% onderskeidelik. 

KI in die finansiële sektor

Kunsmatige intelligensie (KI) is nou oral die modewoord, en die finansiële bedryf is geen uitsondering nie. Masjiene kan binne ’n kwessie van minute die volle geskiedenis van ’n maatskappy ondersoek, tesame met ander in die bedryf, die land en die wêreld, en terselfdertyd twiets, aandelebeursaankondigings, nuusberigte en ander inligting, ontleed. Masjiene kan dalk nie op heeltemal onverwagte gebeurtenisse reageer nie, maar ’n batebestuurder kan KI gebruik om beleggingsbesluite te neem wat verbeterde opbrengste sal lewer, terwyl ’n onafhanklike finansiële raadgewer individuele kliënte meer geskikte advies kan gee. Alhoewel die aanvaarding tot dusver relatief stadig was, het dit begin. Institutional Investor Alpha se jaarlikse lys van die hoogs verdienende skansfondsbestuurders toon dat die meeste van die toptien reeds KI in hul beleggingsprosesse insluit, terwyl ’n onlangse opname van internasionale eerstevlakbanke aan die lig gebring het dat 67% aktief KI en masjienleer ontplooi het. Die gebruik van KI kan teen 2030 ’n bykomende $15,700 miljard tot die internasionale ekonomie bydra. Die wins in slegs die finansiëledienstebedryf sal waarskynlik met meer as 30% styg, volgens navorsing vanjaar deur PricewaterhouseCoopers. In Suid-Afrika is die finansiëletegnologiemaatskappy Jumo ’n baanbreker op die gebied van alternatiewe kredietpunte, gegrond op grootdata en KI om inligting uit selfoonstate, mobielebeursietransaksies en sosiale media te verwerk om entrepreneurs se gedrag te bepaal. 
Meer oor:  Eskom  |  Ekonomie  |  Donald Trump  |  Begroting
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.