Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Geduld word beloon, veral tydens markdalings
13 September 2018
Illustrasie: Shutterstock

'n Mens hoor dikwels dat mense sê iemand is soos ’n groot vis in ’n klein dammetjie, of soos ’n klein vissie in ’n groot dam. Ek het dit letterlik in my eie visdam by die huis ervaar. Ek het ’n paar koivisse gekoop en hulle in my piepklein visdammetjie gesit.

Gou het hulle nogal groot (en met groot bedoel ek omtrent 4 cm tot 5 cm lank) vergeleke met die grootte van die dammetjie geword, maar een was effens groter as die res (omtrent 6 cm lank) en hy het rondgeswem asof hy die dammetjie besit.

Ná ’n ruk het ek besluit om die dam groter te maak, en het sommer ook ’n paar groter koivisse gekoop. Die nuwe koivisse was gemiddeld omtrent drie keer so groot soos die res. Skielik was die een van 6 cm nie meer die groot kokkedoor nie en dit het gelyk of hy sukkel om by die nuwe, groter dam aan te pas.

Kortom: Die voormalige grootmeneer van 6 cm het uiteindelik bygekom en die ander met grootte, krag en selfvertroue ingehaal. My boodskap vir dié uitgawe het egter niks te doen met wie wen of verloor nie, maar is eerder om op die uitwerking van eendimensionele denke te wys.

Ons beskou Suid-Afrika maklik in afsondering en dink dat al die probleme en foute wat ons ervaar, hier ontstaan het. Sodoende verskil ons nie juis van die koivis van 6 cm nie wat glad nie geweet het dat daar ’n veel groter wêreld bestaan nie. Ek het onlangs ’n baie interessante artikel deur Ben Carlson getiteld “Buying Emerging Markets during a Disaster” gelees waarin hy op MSCI se indeks vir ontluikende markte met pryse in dollar fokus.

Die goeie nuus vir dié wat tans weens swak markprestasie oor die afgelope vier jaar in ’n groef is, is dat die opbrengs die afgelope 20 jaar in die jaar ná ’n daling van 20% in dollarwaarde op die JSE gemiddeld 5,53% was, 45,49% in die daaropvolgende drie jaar, en 121% in die daaropvolgende vyf jaar.

Hy fokus in die besonder op wat gebeur het ná tydperke waarin die indeks met onderskeidelik 20% en 30% van sy hoogtepunte gedaal het. Sy bevinding, in kort, is dat elke keer wanneer die indeks in die afgelope 20 jaar (sedert September 1998) met 20% of meer gedaal het, was die opbrengs in die volgende jaar gemiddeld 25,66% in dollarwaarde, gemiddeld 59,27% ná drie jaar, en gemiddeld 93,17% ná vyf jaar.

FTSE-JSE-indeks table

In die afgelope 20 jaar het die indeks nege keer met 20% of meer gedaal. Wat het dié data egter met Suid-Afrika te doen? Veel meer as wat jy dink! Ja, ek stem saam dat ons teen 15 Augustus 6,5% laer as die mark se hoogtepunt teen einde Januarie vanjaar en 6,9% laer as in November verlede jaar verhandel het.

Maar om net hierop te konsentreer, is om presies soos ’n groot vis in ’n baie klein dammetjie op te tree. Bekyk ons die FTSE-JSE-indeks van alle aandele (JSE) in dollarwaarde, sien ’n mens dat die JSE tussen Januarie en 15 Augustus vanjaar met 23,83% gedaal het. Dié wat steeds gretig vir ’n regstelling op die plaaslike mark wag, het dit waarskynlik reeds gemis.

Deur dieselfde beginsels op die JSE toe te pas as wat Carlson vir die MSCI-indeks van ontluikende markte gebruik het, word dit duidelik dat die JSE oor die afgelope 20 jaar agt keer met 20% of meer in dollarterme gedaal het.

Schalk Louw

Die goeie nuus vir dié wat tans weens die swak markprestasie oor die afgelope vier jaar in ’n groef is, is dat die opbrengs die afgelope 20 jaar in die jaar ná ’n daling van 20% in dollarwaarde op dkie JSE gemiddeld 5,53% was, 45,49% in die daaropvolgende drie jaar, en 121% in die daaropvolgende vyf jaar.

Ek moet egter op dié punt weer benadruk dat historiese syfers hoegenaamd geen waarborg van toekomstige prestasie bied nie. Om af te sluit haal ek Mark Housel (Getting Rich vs. Staying Rich) aan: “Niks wonderlik of verskriklik sal waarskynlik lank só bly nie, want dieselfde kragte wat veroorsaak dat dinge wonderlik of verskriklik is, plant ook die saadjie om hulle in die ander rigting te stuur.”

Die werklikheid is dat Suid-Afrika ’n klein vissie in ’n reusedam is, en al voel ons dalk dat ons alleen die skuld vir die onlangse swak markgroei moet kry, is dit nie heeltemal waar nie. Die geskiedenis leer ons dat ons net geduldig moet wees.

* Stuur 'n boodskap aan terugvoer@finweek.co.za

* Schalk Louw is ’n portefeuljebestuurder by PSG Wealth

Meer oor:  Finweek  |  Markaanwysers  |  Schalk Louw  |  Markdalings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.