Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Goud: Is daar iets aan die broei?
5 November 2020
Foto: Shutterstock

Data word deesdae werklik oral gebruik. Die komende Amerikaanse presidentsverkiesing is ’n perfekte voorbeeld hiervan. Peilings word letterlik elke uur bygewerk om te sien of Trump of Biden die volgende Amerikaanse president sal wees.

Net soos weervoorspellings, wat ook op data staatmaak, is peilings nie altyd korrek of akkuraat nie (vra maar vir Hillary Clinton), maar dit help ons tog om meer ingeligte besluite te neem.

Ek wil nie die komende Amerikaanse verkiesing hier bespreek nie: Daar is al meer as genoeg tyd en ruimte daaraan afgestaan. Ek wil eerder ’n sekondêre onderwerp bespreek wat ook met hierdie verkiesing verband hou, naamlik goud, en ook ’n paar interessante verskynsels wat tans in die data rondom die metaal gewaar word.

Is rooi die nuwe goud?

Nadat die Bretton Woods-stelsel in 1971 tot ’n einde gekom het, was dit basies ook nie meer vir sentrale banke nodig om goud te koop nie. Dit is presies om hierdie rede dat Amerika vandag nog dieselfde tonnemaat goudreserwes het as in 2006.

En Brittanje het dit ’n stap verder geneem en tussen 2000 en 2002 byna die helfte van sy goudreserwes verkoop, sodat hy nou nie meer onder die tien lande met die grootste goudreserwes is nie. Daar is al baie bespiegel oor die moontlikheid of ’n nuwe goudstandaard op die een of ander tyd in die toekoms weer sal verskyn.

Maar wat my regtig interesseer, is die feit dat Rusland en China die afgelope dekade albei massiewe goudkopers was (sien tabel). Van die 5 172 ton goud wat sentrale banke die afgelope tien jaar (tot 30 Junie vanjaar) gekoop het, het Rusland 1 544 ton gekoop en China 893 ton. Dit beteken dat hierdie twee lande saam byna die helfte van al die goud gekoop het. Dit laat mens wonder wat die rede hiervoor is.

56% van die totale goudaankope vir beleggingsdoel- eindes is deur ETF’s in die 12 maande tot 30 Junie gedoen.

Passiwiteit het ook gehelp

As ’n belegging prikkel goud steeds die belangstelling van groot beleggers, maar nie noodwendig in die vorm van direkte goudbeleggings nie. Selfs Warren Buffett was onlangs in die nuus met sy aankondiging dat Berkshire Hathaway 20,9% van die goudmynmaatskappy Barrick Gold se aandele (ter waarde van ongeveer R12,5 miljard) gekoop het.

Maar as dit kom by goudbeleggings bly die aankoop van goudstawe steeds die gewildste. Oor die afgelope dekade (tot 30 Junie vanjaar) was die vraag na goud vir beleggingsdoeleindes 13 280 ton, en hiervan is 66% in die vorm van goudstawe gekoop. Maar die interessante deel hiervan lê nie in die 66% nie. Dit lê in die feit dat slegs 11% van die totale vraag deur beursverhandelde fondse (ETF’s) gekoop is. Waarom is dit so interessant?

Wel, hoewel ETF’s die afgelope dekade slegs 11% van die vraag na goud uitgemaak het, is 56% van die totale goudaankope vir beleggingsdoeleindes deur ETF’s in die 12 maande tot 30 Junie gedoen. Is dit net die kudde- effek, of is daar miskien slimmer redes?

Mooi bly maar mooi, as jy dit kan bekostig

Dit is waar dat goud oor die jare heen ’n politieke speelbal geword het, maar die belangrikste gebruik daarvan is steeds vir juweliersware. Meer as 50% van alle goudaankope die afgelope tien jaar (tot 30 Junie) is gedoen om juweliersware te vervaardig.

Van die gemiddelde kwartaallikse vraag na goud van 1 110 ton is ongeveer 555 ton per kwartaal dus vir juweliersvervaardiging aangekoop. Wat ek wil weet, is watter uitwerking Covid-19 op juwelierswinkels en -vervaardigers gehad het, en oor die volgende paar maande nog sal hê. Ongelukkig, net soos met die res van die wêreld- ekonomie, was die uitwerking ongelooflik negatief.

Schalk Louw is ’n portefeuljebestuurder by PSG Wealth.

Vir die eerste kwartaal van vanjaar het die vraag na goud vir juweliersware tot 321 ton gedaal, en in die tweede kwartaal het dit verder afgeneem tot 252 ton. Dit verklaar waarom ’n aandeel soos Richemont tans (teen 19 Oktober) in Switserse frank steeds 25% laer verhandel, as sy aandeelprys van vyf jaar gelede (Oktober 2015).

Kan dit ’n moontlike beleggingsgeleentheid vir beleggers skep? Ek dink so. Dit maak nie saak of jy goud as ’n belegging sien of as ’n borrel wat gaan bars nie, dis belangrik dat dit gemonitor moet word. Die data dui slegs aan dat baie dinge onder die oppervlak aangaan.

* Stuur 'n boodskap aan terugvoer@finweek.co.za

* Schalk Louw is ’n portefeuljebestuurder by PSG Wealth.


Meer oor:  Finweek  |  Goud  |  Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.