Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Hoe defensief is defensief?
4 Julie 2019
Schalk Louw is ’n portefeuljebestuurder by PSG Wealth.

Wat ook al die ekonomiese klimaat, daar is dinge waarsonder mense nie kan klaarkom nie – aandele in maatskappye wat dié produkte lewer, is dus dikwels veerkragtig in swaar tye. Maar hulle is ook geneig om te sukkel as markte floreer.

Defensiewe aandele kom hoofsaaklik voor in nywerhede waar maatskappye fokus op die lewering van goedkoper produkte of dienste waarsonder verbruikers moeilik kan klaarkom.

Tipiese voorbeelde van die soort gebiede waar defensiewe beleggings gevind word, sluit in voedselvervaardigers en -kleinhandelaars, mediese sorg en die tabak- en alkoholbedryf. Die feit dat die lewering van hierdie produkte en dienste nie gestaak of uitgestel kan word wanneer die ekonomie swaar kry nie, is presies wat hulle defensief maak. En, ja, dit sluit die alkohol- en tabakmaatskappye in.

Soos my oupa altyd gesê het: “As kospryse styg, sal mense minder kos koop. Maar as alkoholpryse styg, sal hulle nog minder kos koop.”

Soos my oupa altyd gesê het: “As kospryse styg, sal mense minder kos koop. Maar as alkoholpryse styg, sal hulle nog minder kos koop.”

Maar alle grappies op ’n stokkie, die punt is dat mense moet eet en hulle moet mediese hulp kry as hulle ernstig siek of beseer word, ongeag die toestand van die ekonomie.

Defensiewe aandele

Defensiewe aandele is bekend vir hul vermoë om periodes van ekonomiese wisselvalligheid en markdalings te weerstaan, maar ongelukkig is die teenoorgestelde ook waar.

Historiese syfers toon dat defensiewe aandele gewoonlik sukkel om by te hou wanneer markte floreer.

Sikliese aandele

Aan die ander kant is besighede soos motorhandelaars, selfoonverskaffers, versekeringsmaatskappye en banke, wat baie meer sensitief vir markskommeling is, geneig om baat by ’n groeiende ekonomie te vind, maar om te sukkel as verbruikers se finansies onder druk is. Dus staan hulle bekend as sikliese aandele.

Defensiewe aandele is statisties herkenbaar omdat hulle ’n beta-aanwyser van minder as 1 het. As ’n aandeel ’n beta van 1 het, beteken dit dat vir elke persentasiepunt wat die mark styg of val, daardie spesifieke aandeel ook met presies dieselfde persentasie op of af sal beweeg.

’n Beta van 0,8 beteken dat die aandeel slegs met 0,8% sal styg vir elke 1% wat die mark styg, maar ook net met 0,8% sal daal vir elke 1% wat die mark daal.

Ek het na willekeur vyf aandele gekies wat as defensiewe aandele geklassifiseer kan word: Distell (alkohol), AVI (voedselvervaardiger), BAT (tabak), Mediclinic (mediese sorg) en Spar (voedselkleinhandelaar), en dan hulle prysbeweging oor die afgelope drie jaar teenoor dié van die FTSE/JSE se indeks van alle aandele geplaas.

Die idee was nie om hul prysbewegings te evalueer nie, want ons weet dat dié vyf aandele oor die afgelope drie jaar van tyd tot tyd nogal swaar deurgeloop het. Ek wou bepaal hoe dié vyf se werklike verdienste in die moeilike tydperk (afgelope drie jaar) gevaar het. Die resultate het ooreengestem met die definisie van ’n defensiewe aandeel.

Al het die defensiewe aandele met ’n gemiddelde beta van 0,69 nie so skerp gestyg het as die JSE nie, het hul verdienstegroei teen ’n baie stabieler en defensiewer tempo plaasgevind.

Ten spyte van die feit dat hierdie defensiewe aandele met ’n gemiddelde beta van 0,69 nie so skerp gestyg het in vergelyking met die JSE nie, was hul verdienstegroei teen ’n baie meer stabiele en defensiewe tempo.

Ek is meer bekommerd oor die onlangse teleurstellende BBP-syfers wat deur Stats SA gepubliseer is, en die moontlikheid dat die ergste nog nie verby is nie. En hoe meer beleggers wêreldwyd hieroor bekommerd raak en hoe hoër die markrisiko, hoe meer word sikliese aandele (banke byvoorbeeld) verruil vir defensiewe aandele.

As ons na die historiese prys-verdienste-verhouding (P/V) van dieselfde vyf defensiewe aandele die afgelope drie jaar kyk, sien ons dat hulle ook “goedkoper” geword het – net soos die JSE.

Trouens, in vergelyking met die JSE verhandel hierdie vyf aandele se P/V’s tans teen laer relatiewe vlakke as drie jaar gelede. Wat ek wil weet, is: As internasionale markte selfs meer wisselvallig sou word, sal dit nie ’n goeie manier wees om jouself te beskerm nie?

Ek sê nie dat beleggers al hul sikliese aandele vir defensiewe aandele moet verruil nie, maar dat jy jou portefeulje in heroënskou moet neem as dit slegs uit sikliese aandele bestaan.

Waarop dit uiteindelik neerkom, is dat mens ’n goed gediversifiseerde beleggingsportefeulje moet hê – die soort portefeulje wat by enige beleggingsomgewing kan baat.

Meer oor:  Finweek  |  Defensiewe Beleggings
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.