Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Hoe om die volgende Steinhoff te vermy
23 Mei 2019

Verwyte omdat die hoog aangeslane direksie, asook aandelemakelaars en vooraanstaande batebestuurders, die gevaarseine by Steinhoff International misgekyk het, is in die jongste tyd weer rondgeslinger nadat die skokkende hersiene resultate van die groep vir 2017 uitgereik is.

Dit is veel swakker as wat verwag is en vrae word gestel of die groep hoegenaamd sal kan oorleef. Op die JSE het die prys onmiddelik na die bekendmaking van die resultate vir die soveelste keer getuimel sodat hy by die skrywe hiervan 98,6% laer was as die hoogtepunt van Maart 2016 toe hy teen R97 verhandel het. Die pyn hiervan word steeds wyd in SA gevoel.

Elke keer wanneer beleggers sulke swaar verliese ly weens bedrog by ’n groot komplekse maatskappy word daar gepraat van nuwe maatreëls om die publiek te beskerm. Maar oor en oor is bewys dat dit slegs ’n beperkte uitwerking het. Finansiële bedrieërs is dikwels knap mense wat daarin slaag om reëls en regulasies te omseil.

Hulle dink anders

Daar was natuurlik wel mense soos Jean Pierre Verster van Fairtree Capital wat deur die valse voorspoed van die aandeleprys gesien het en waarskynlik groot wins gemaak het deur kort te verkoop.

Jean Pierre Verster, portefeuljebestuurder by Fairtree Capital

Ook Magda Wierzycka, uitvoerende hoof van Sygnia Asset Management, het ná ’n ontleding van Steinhoff besluit daar is ’n groot skroef los.

Magda Wierzycka, uitvoerende hoof van Sygnia Asset Management

Dan is dit ongelukkig so dat daar altyd mernse is wat oor beter inligting beskik as die gewone belegger.

Streng reëls

Ondanks streng reëls om te verhoed dat hulle dit benut, is dit onmoontlik om dit heeltemal te stop. Vir die kleiner belegger is daar egter wel een hulpmiddel wat hom nie sal mislei nie. Dit is om die prysgrafiek van ’n aandeel noukeurig te bestudeer. Want een ding kan ’n mens van seker wees: ’n grafiese voorstelling van die prysverloop van ’n aandeel vertel die waarheid van wat die verhouding is tussen vraag (bulle) en aanbod (bere), wat die fondament van transaksies op enige mark verteenwoordig.

Is die bulle in beheer, sal die prys neig om te styg.

Is die bere in beheer, dan daal die prys.

In die proses kom sekere pryspatrone na vore wat nie net ’n aanduiding kan gee van wat die stand van vraag en aanbod is nie, maar ook gevaarseine uitstuur dat iets nie pluis is nie

In die proses kom sekere pryspatrone na vore wat nie net ’n aanduiding kan gee van wat die stand van vraag en aanbod is nie, maar ook gevaarseine uitstuur dat iets nie pluis is nie. Kyk byvoorbeeld na die hoogtepunte A, B en C in 2016 op die grafiek.

B en C is elke keer teruggewerp voordat hulle A kon ewenaar of daarop verbeter. Dit dui op groot verkopers wat op daardie vlakke uitklim. Die bere oorkom dus elke keer die bulle se poging om ’n nuwe hoogtepunt aan te teken, soos ook tussen D en E opmerklik is.

Hulpmiddels wat as gevaartekens dui

Dan is daar nog ander hulpmiddels, soos die langtermyn-bewegende gemiddelde wat in Oktober moed opgegee het en begin daal het weens volgehoue verkoopdruk.

Wanneer so ’n langtermyn-gemiddelde afwaarts omkeer ná ’n geruime tydperk van sterk stygings is dit altyd ’n belangrike gevaarlig wat flikker. In Steinhoff se geval, asook by teenspoed-aandele soos Mediclinic en Aspen, het die lang gemiddelde sterk afwaarts beweeg. Om teen sy tendens te veg, is baie gevaarlik. 

Enigeen wie Steinhoff verkoop het toe die gemiddelde afwaarts omgekeer het, kon nog R75 tot R80 per aandeel in sy sak gesteek het.

Enigeen wie Steinhoff verkoop het toe die gemiddelde afwaarts omgekeer het, kon nog R75 tot R80 per aandeel in sy sak gesteek het. Daar is nog verdere tegniese seine wat die belegger kon gewaarsku het. Soos die kop-en-skouer-formasie wat hom uitgespeel het. Dit word as een van die betroubaarste tegniese formasies beskou.

Of om jou aan die boonste deel van ’n prysgrafiek te waarsku dat die risiko hoog is vir verdere dalings. Of, aan die onderkant waar ’n omgekeerde kop-en-skouer kan aandui dat die aandeel wil herstel.

Die formasie het ’n sogenaamde neklyn (XY). As die prys by hom deurval dan is dit, soos een ervare ontleder dit gestel het, ’n kanonskoot wat knal. Hierdie pryspatrone word oor en oor in die mark herhaal.

Tegniese ontleding is nie die begin en einde van belegging nie. Dit is slegs nog ’n hulpmiddel (en iemand soos Jean Pierre Verster huiwer nie om te bevestig dat hy dit gebruik nie).

Tegniese ontleding is nie die begin en einde van belegging nie. Dit is slegs nog ’n hulpmiddel (en iemand soos Jean Pierre Verster huiwer nie om te bevestig dat hy dit gebruik nie).

As Christo Wiese, gewese voorsitter van Steinhoff, iemand gehad het om hom te waarsku dat talle tegniese gevaarligte flikker, het hy dalk nie nodig gehad om te sê dat die hele bedrogspul en die ineenstorting van Steinhoff hom uit die bloute getref het nie.

  • Stuur 'n boodskap na terugvoer@finweek.co.za
  • Lucas de Lange is ’n voormalige redakteur van finweek en die skrywer van twee boeke oor belegging.
Meer oor:  Magda Wierzycka  |  Steinhoff  |  Finweek
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.