Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Is Etsy se aandele ’n “koop”?
11 Junie 2021
Foto: Shutterstock

E-handel is in die verlede deur groot “horisontale” maatskappye oorheers. Dié maatskappye doen in verskillende kleinhandelkategorieë sake (“horisontaal”) eerder as om op ’n spesifieke kategorie te konsentreer (“vertikaal”).

Dat die aanlyn kleinhandel na enkele groot maatskappye neig, is ekonomies sinvol. Dis ’n bedryf met hoë vaste koste en taamlik min veranderlike koste. Om winsgewend te wees, is skaalbesparings gevolglik van kritieke belang.

Die belangrikheid van skaal in e-handel maak dat ’n handjie vol maatskappye dié mark oorheers. Amazon oorheers die Amerikaanse e-handelsmark sedert sy ontstaan. Alibaba is ook al lank die grootste aanlyn kleinhandelaar in China.

MercadoLibre gee die toon aan in Latyns-Amerika, terwyl Sea toonaangewend in Suidoos-Asië is. Die maatskappye in grafiek 1 is nie die enigstes nie, maar gee ’n idee van die skaal van die groot rolspelers. In ontluikende markte, soos Latyns-Amerika en Suidoos-Asië, is die penetrasie van aanlyn kleinhandel baie kleiner. MercadoLibre en Sea is baie kleiner as hul Amerikaanse en Chinese eweknieë.

Die afgelope jare het nis- of vertikale e-handelrolspelers na vore getree. Pleks daarvan om alles aanlyn te probeer bied soos Amazon of Alibaba, konsentreer dié maatskappye op ’n enkele nis- of vertikale produk. Wayfair fokus op huisraad, Asos is ’n aanlyn klerehandelaar, Farfetch se vertikale produkreeks is persoonlike weeldeartikels en Etsy se nis is unieke of handgemaakte goedere.

Dié maatskappye is ’n breukdeel so groot soos die groot e-handelmaatskappye. Hoewel ons steeds glo skaal is vir die aanlyn kleinhandel deurslaggewend, meen ons tog daar is ’n klompie nis- e-handelsrolspelers wat lewensvatbare, mededingende sakeondernemings opgebou het. Een daarvan is Etsy. Sy produkte is oor verskeie kategorieë heen versprei (sien grafiek 2).

Amazon het met die skep van sy eie reeks, Amazon Handmade, dieselfde kategorie begin najaag. Ondanks die bykomende mededinging, floreer Etsy egter steeds. Etsy raam dat sy 85 miljoen unieke handgemaakte items heelwat meer is as wat op Amazon te vinde is. Etsy is ’n derdepartymark waar kopers en verkopers ontmoet.

Die maatskappy dra of verkoop nie self voorraad nie. Kapitaalvereistes is gevolglik laag en opbrengs op kapitaal hoog. Die opbrengs op kapitaal word ook bevoordeel deur die feit dat hoëwins-markgelde (tariewe om te lys en transaksiegelde, buiteterreinreklame en die verwerking van betalings) die grootste deel van Etsy se sakeonderneming uitmaak. Bruto wins is gewoonlik bokant 65% en was in 2020 meer as 70%.

Nogtans was Etsy se aandeelprys die afgelope tyd onder druk, skynbaar weens twee faktore. Eerstens het tegnologieaandele en sakeondernemings wat vinniger groei se aandele vanjaar onderpresteer weens inflasievrese en stygende effekteopbrengste.

Tweedens het die maatskappy se riglyne van 15% tot 25% inkomstegroei op ’n jaargrondslag vir die tweede kwartaal van 2021 beleggers blykbaar onbeïndruk gelaat. Ons meen dié riglyne moet teen die agtergrond van 2020 se hoë grondslag beskou word. Verlede jaar was vanselfsprekend ’n ongewone jaar weens die pandemie.

Die inperkings was ’n groot hupstoot vir Etsy en ander aanlyn handelaars in 2020. Dit wys duidelik in Etsy se historiese inkomstegroei, wat verlede jaar 111% bereik het nadat dit voor die pandemie gewoonlik in die mid-30% was. Ons meen dit is net natuurlik dat groei sal normaliseer en dalk op kort termyn selfs verlangsaam, terwyl verbruikers die verslapping van inperkingsmaatreëls in sekere streke geniet.

Ons glo op langer termyn het Etsy steeds ’n groot ruimte vir groei. Etsy het sy beskikbare mark in 2019 op $249 miljard geraam. Die bruto waarde van sy handelsware in 2020 maak op $10 miljard slegs sowat 4% van dié mark uit. In 2019 het Etsy die vyfjaarmikpunte soos in grafiek 2 hieronder gestel.

Op 27 keer vrye kontantvloei meen ons Etsy kan saamgestelde inkomste van sowat 20% per jaar aanteken, met totale opbrengs vir aandeelhouers nagenoeg in dieselfde koers van 20% per jaar.

Seleho Tsatsi is ’n beleggingsontleder by Anchor Capital.

Gegewe die maatskappy se grag van unieke en handgemaakte items, sy hoogs winsgewende sakemodel en baie ruimte vir groei, beskou ons Etsy as ’n aantreklike belegging teen die huidige aandeelpryse. Ofskoon ons steeds glo skaal is noodsaaklik vir e-handelrolspelers, bied party kleiner rolspelers, soos Etsy, tans interessante beleggingsgeleenthede.

* Stuur 'n boodskap aan terugvoer@finweek.co.za

* Seleho Tsatsi is ’n beleggingsontleder by Anchor Capital.


Meer oor:  Finweek  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.