Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Lemoensap tot rodium: Als skiet die hoogte in
30 Julie 2020
/

Min kommoditeite het tot dusver vanjaar beter as lemoensap gepresteer. Waar dit in New York in bevrore, gekonsentreerde vorm verhandel, het dit in die eerste klompie maande van die Covid-19-pandemie ’n uiters gesogte kommoditeit geword toe almal besonder gesondheidsbewus geraak het. Teen einde Junie was pryse meer as ’n vyfde hoër.

Dit kan ook nie net oor gesondheid gaan nie. Arabica, ’n hoëgraadse koffieboon, het ook ’n aansienlike verbetering in prys ervaar, nadat dit aanvanklik teruggesak het toe beleggers hulle begin kwel het oor die verbruik daarvan in koffiekroeë en kafees terwyl inperkings heers. Daarna het pryse skerp gestyg toe die kommer verskuif het na hoe om koffie in die hande te kry terwyl logistieke risiko’s toeneem, nog iets wat deur die Covid-19-pandemie teweeggebring is.

Gelukkig is dit nie die enigste kommoditeite wat sedert die pandemie steun geniet nie. Trouens, ontleders meen die verdienste van mynmaatskappye wat wedywerende kommoditeite soos platinumgroepmetale (PGM’e) en ystererts produseer, sal op die ou end nie so verpletter word as wat gevrees is toe die Covid-19-virus aanvanklik die wêreld getref het nie.

Die Australiese bank Macquarie sê in ’n onlangse verslag in die afgelope ses maande is een van die wêreld se vinnigste “ineenstortings” deur die vinnigste “herstel” ooit vervang. Wêreldwye BBP-groei sal waarskynlik met sowat 7% in die tweede helfte van die kalenderjaar toeneem, nadat dit met 8% in die eerste helfte afgeneem het. Die herstel kan egter in die vierde kwartaal verlangsaam wanneer regerings hier en daar nog inperkings in werking stel. “Agterna beskou was ons miskien te pessimisties,” sê die bank.

“Die oorgang met nywerheidsaandele se korreksie of herstel was vlietender as wat ons verwag het en het hoofsaaklik binne die eerste helfte van die 2020-kalenderjaar geskied,” sê die bank.

“Die oorgang met nywerheidsaandele se korreksie of herstel was vlietender as wat ons verwag het en het hoofsaaklik binne die eerste helfte van die 2020-kalenderjaar geskied,” sê die bank.

BMO Capital Markets, ’n Kanadese bank, het ook sy vooruitskouings van vroeër hersien en sy verdienstevoorspellings vir die produsente van nywerheidsminerale – ystererts en metallurgiese steenkool – onder die aandele wat hy dek, met 11% opgegradeer. Nog ’n bank, Goldman Sachs, meen ofskoon daar vir party oorverkoopte mynbouaandele nie meer algehele winskope beskikbaar is nie, bly waardasies nietemin op

“koop”-terrein mits marktoestande “genormaliseer” het. Uitskieters soos lemoensap in ag geneem, is die slotsom tog dat kommoditeite oor die algemeen goed vaar. Uraan sowel as rodium het beter as lemoensap gevaar; trouens, rodium was meer as 30% sterker wat prys betref en dit reeds vanaf ’n hoë grondslag.

Beleggers kyk dus taamlik afwagtend na Anglo American Platinum (Amplats), wat die verslagdoeningseisoen vir SA mynbouaandele op 27 Julie met sy tussentydse resultate afskop (sien ook bl.42). Die verwagting is dat die eerste helfte van Amplats se boekjaar deur welbekende, eenmalige gebeurtenisse beïnvloed sal wees: geaffineerde produksie is deur teëspoed met verwerkingsvermoë onderbreek en ontginning is vir vyf weke lank tydens die streng inperking tot 50% verminder. Die klem sal waarskynlik op ’n herstel in die tweede helfte val, met tekens daarvan reeds in Mei sigbaar.

Volgens Stats SA was PGM-produksie 148% hoër in Mei as in April. “Soos met talle ander kommoditeite die geval was, het Chinese invoer van PGM’e vir die jaar tot nou robuus gebly,” sê RMB Morgan Stanley.

“Daarby meen ons die mark het die toename in produksie ná die inperking begin inprys.” SA se PGM-produksie sal na verwagting in die tweede helfte van die jaar teen 90% plaasvind; ’n vlak wat die voortgesette skepping van sterk vryekontantvloei sal steun aangesien die randgedenomineerde mandjieprys 60% bokant die kostekrommesteun is, sê RMB Morgan Stanley.

SA se PGM-produksie sal na verwagting in die tweede helfte van die jaar teen 90% plaasvind.

Dis goeie nuus vir Anglo American, wat 80% van Amplats sowel as 70% van Kumba Iron Ore besit – laasgenoemde reik sy resultate ’n dag na Amplats op 28 Julie uit.

Anglo American reik sy tussentydse resultate op 30 Julie uit. In ’n onderhoud met finweek in Junie het Mark Cutifani, uitvoerende hoof van Anglo American, gesê die oplewing in kommoditeite kan deur nog ’n inkrimping gevolg word, ’n sogenaamde W-vormige herstel in teenstelling met die V-vormige herstel wat blykbaar tans die konsensus is. “Ons moenie onderskat hoe gek mense uit die grendeltyd sal kom nie,” het hy oor die huidige herstel in die wêreldwye verbruikersvraag gesê. Dis ’n funksie van hoe mense “op onvanpaste wyse vrees ingeboesem” is oor die virus deur regerings, ofskoon Cutifani haastig byvoeg die SA regering het daarin geslaag om die krisis taamlik goed te hanteer.

Hy is egter optimisties oor die vooruitsigte vir kommoditeitsmarkte oor die volgende twee jaar, veral wat ystererts betref. “Pryse is nogal baie goed met als wat tans in ystererts aan die gang is, die Brasiliaanse uitdagings,” sê hy oor die dalende voorsiening terwyl Vale, die nasionale ertsprodusent, die gevolge moet hanteer van oorstromings weens sy ystererts-uitskotdamme wat gebreek en in 2017 en 2018 honderde mense gedood het.

Mark Cutifani, uitvoerende hoof van Anglo American

Cutifani meen die feit dat Rio Tinto in Australië per abuis ’n beskermde grot van groot kulturele en argeologiese belang vernietig het toe hy in Australië skietwerk gedoen het om sy ysterertsbedrywighede uit te brei, is nog ’n faktor wat nuwe produksie sal beperk. “Die potensiële ontwrigting in ysterertsproduksie is waarskynlik ernstiger as wat mense dink,” sê hy. “Koper is skraps met al die uitdagings, so ons meen die prognose vir mynbou is in die algemeen redelik goed.”

Die siening by Macquarie is dat die kommoditeitsmarkte vorentoe steeds beïnvloed sal word deur van die dinge wat voor Covid-19 al spanning veroorsaak het, soos die handelsoorlog tussen Amerika en China. “Handelskonflik wat met China verband hou, blyk ’n volgehoue tema in kommoditeite te wees,” sê die bank.

Sentrale banke se stimuluspogings om ekonomiese herstel in die breë te versnel, sal kommoditeite waarskynlik ook op kort termyn steun.

“Aangesien dit tussen 40% en 70% van die meeste kommoditeitstransaksies raak, probeer beleggers nou strategieë vind om hul blootstelling aan sulke konflik te bestuur,” voeg die bank by. Beleggers vermy dus minerale waarin China selfonderhoudend is, soos aluminium en steenkool, en verkies minerale wat ingevoer moet word, soos ystererts en koper.

Sentrale banke se stimuluspogings om ekonomiese herstel in die breë te versnel, sal kommoditeite waarskynlik ook op kort termyn steun, terwyl voorraadskokke – die onvermoë, om watter rede ook al, van die mynboumark om in ’n groeiende vraag te voorsien – na verwagting kommoditeitspryse sal ondersteun.

Sal daar ’n vraag na diamante wees ná die pandemie?

Die vooruitsigte vir dié sektor se herstel bly stram.

Die diamantmark is in ’n diep gat en kan tot twee jaar vat om daaruit te kom, sê Jack O’Brien, ’n ontleder van Goldman Sachs. Voorheen is gemeen China sou die vraag begin stimuleer met verkope van juweliersware vir verlowings en troues, eers in Vlak- 1-stede en dan in Vlak-2- en Vlak-3-stede.

Dit sou deur volgehoue bestaande vraag in Amerika, wat sowat 49% van die mark uitmaak, en dalende aanbod onderskraag word.

Min nuwe diamantmyne is in die vooruitsig, terwyl Rio Tinto se groot myn, Argyle, onvermydelik kort voor lank sal toemaak. Volgens O’Brien het die middelstroommark van slypers en poleerders egter in duie gestort in Indië weens ’n gebrek aan krediet, wat ’n aansienlike opgepotte voorraad agterlaat. Alrosa, die groot Russiese diamantprodusent, verwag om vanjaar met ’n diamantvoorraad van sowat 30 miljoen karaat af te sluit, ruweg dieselfde as ’n jaar se produksie.

De Beers, waarin Anglo American ’n aandeel van 85% besit, sal na verwagting nie in die huidige boekjaar ’n bydrae lewer tot die groep se verdienste nie. Anglo American se uitvoerende hoof, Mark Cutifani, is egter optimisties oor die tydlyn van herstel, aangehelp deur ’n bemarkingsveldtog van R250 miljoen. “Ek meen De Beers sal taamlik vinnig bykom,” sê hy.

“Ons moet aanhou investeer, so ons hou aan om in bemarking te investeer.” Hy hoop wanneer Covid-19 verby is, sal die groep daarin slaag om verbruikers te oortuig dat diamante die regte reaksie is, al druk dit in moeilike tye swaar op diskresionêre besteding. “Die lewe is kort en ’n mens moet daarom seker maak die mense wat jy liefhet weet jy het hulle lief. En jy kan dit nie op ’n beter manier sê as met diamante nie,” sê Cutifani. 


Meer oor:  Kommoditeitsmarkte  |  Finweek
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.