Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Pers tot Prosus: Hoe Naspers sy aanlyn vastrapplek uitbrei
16 Julie 2020
Prosus is deel van Naspers. Foto: Getty Images

Met die uitreiking van Naspers se jaarresultate ontleed Brendan Peacock die vertoning van en vooruitsigte vir dié JSE-reus en die maatskappye waarin hy belê is. 

Naspers* vorm al meer as ’n dekade lank die grondslag van die meeste Suid-Afrikaners se aftreefondse. Deur verlagings van soewereine graderings, randswakheid en korporatiewe skandale wat die plaaslike ekonomie afgemaai en welvaart vernietig het heen, het Naspers die JSE van die rampgebied weggesleep bloot vanweë sy reuseomvang in die FTSE-JSE se top-40-indeks en Tencent se voortgesette groei.

Terwyl beleggers Naspers se jongste stel jaarresultate verwerk, is dit die moeite werd om te kyk hoe die maatskappy geposisioneer is, terwyl die wêreld aanhou worstel met die ekonomiese gevolge van ’n onverwagte en ongekende gesondheidspandemie.

Naspers het MultiChoice, sy satellietvermaakafdeling, in Februarie verlede jaar ontknoop en genoteer, en in September ’n nuwe entiteit genaamd Prosus op die Amsterdamse aandelebeurs genoteer, wat al die maatskappy se internetgegronde ondernemings hou – met die grootste en opmerklikste sy belang van 31% in die Chinese internetreus Tencent. Die hoofdoel hiermee is dat die bestuur wil toegee aan aandeelhouers se eise dat waarde ontsluit word deur Naspers se afslag op die netto batewaarde te verklein.

Nadim Mohamed, beleggingsontleder by First Avenue Investment Management
Die afslag

Sedert die vooruitsiende en uiters suksesvolle spekulatiewe belegging van Koos Bekker, destyds uitvoerende hoof, in Tencent twee dekades gelede, het die Chinese maatskappy se vinnige groei gou die waarde van die res van Naspers verdwerg – wat die mark effektief teen minder as niks gewaardeer het. Aandeelhouers het by die bestuur aangedring dat die res afgeskei word om die afslag te hanteer. Prosus is ’n beduidende stap in dié rigting, maar Naspers se afslag bestaan voort – en Prosus het sy eie afslag op die netto batewaarde ontwikkel. Naspers se afslag is tans sowat 40% en Prosus s’n nader aan 30%.

Is die afslag ’n kwessie as die aandeelprys aanhou presteer? Dit hang af van waar jy woon, sê Nadim Mohamed, beleggingsontleder by First Avenue Investment Management.

“Dis duidelik dat die wêreldekonomie se toekoms aangedryf word deur groot tegnologiemaatskappye, soos Apple, Google en Facebook, wat nou amper die helfte van die S&P 500 verteenwoordig. As jy in die toekoms van digitale transformasie en die toekomstige ekonomie wil belê, het jy in Suid-Afrika nie ’n ander keuse as om in Naspers en Prosus te belê nie.”

As jy in die toekoms van digitale transformasie en die toekomstige ekonomie wil belê, het jy in Suid-Afrika nie ’n ander keuse as om in Naspers en Prosus te belê nie.

Plaaslike aftreefondse, wat ’n mandaat het om die meeste van hul geld plaaslik te belê, het volgens hom ook nie ’n keuse nie. “Dis waarom Naspers soveel beter vaar as ander aandele. Uit ’n nie-SA oogpunt hou Tencent se toekoms egter sekere wesenlike risiko’s in wat belangriker word. Jy sou ook beter gevaar het as jy Tencent regstreeks gehou het, en sou nie die dividende opgeoffer het nie.”

Klein plaaslike poel

Mohamed sê die plaaslike beleggingsomgewing is veel kleiner as ’n dekade gelede, met Covid-19 wat die maatskappye bedreig wat sover kon oorleef, maar al hoe minder koste aan sukkelende verbruikers kan deurgee. “Met min beleggingsdiepte is dit dieselfde as ’n voorbeeld soos Richemont – internasionaal is daar beter spelers, maar plaaslike beleggers het net toegang tot Richemont in sy klas.

Dis ’n groot debat in die pensioenfondsbedryf: Naspers is byvoorbeeld verreweg die grootste bestanddeel van die indeks van alle aandele, maar fondse wat hul konsentrasierisiko probeer beperk het, deur hul Naspers-gewig te verminder, sukkel. Daar word steeds verwag dat Naspers in die volgende dekade beter as die meeste plaaslike maatskappye sal vaar.” Chris Wood, portefeuljebestuurder by Prudential Investment Managers, sê Prudential het verkies dat Naspers in die buiteland noteer, eerder as die huidige komplekse struktuur en skepping van Prosus.

“Dis effektief ’n kloonmaatskappy wat nou die meeste van die bates hou wat Naspers vroeër gehou het. Naspers verhandel steeds teen ’n afslag op sy belang van 72,5% in Prosus, en Prosus verhandel teen ’n afslag op sy onderliggende belange. Dit beteken dat die saamgestelde afslag waarteen Naspers teenoor die onderliggende bates verhandel, nou groter is as toe Prosus in Amersterdam begin verhandel het.” Wood sê die gevolg is effektief ’n mislukking om waarde vir aandeelhouers te ontsluit. “Dis eerder Tencent se voortgesette prysstyging wat Naspers en Prosus se aandeelprys laat styg, selfs al word die afslag op die netto batewaarde groter.”

Chinese risiko

Oor die kwessie van risiko’s vir Tencent en daarom vir Naspers en Prosus sê Mohamed China se regeringsregulasies verander voortdurend en vergroot die burokratiese rompslomp om nuwe internetspeletjies uit te reik.

“Tencent se resultate vir die derde kwartaal van verlede jaar toon dat die maatskappy gesteun het op ’n paar speletjies waarvoor mense moeg geword het. Dit was in werklikheid vir Tencent ’n gelukkige hupstoot dat die vraag na mobiele speletjies weens Covid-19 en die inperking met 40% toegeneem het. Dis moeilik om te raai waar dié inkomste sal stabiliseer.”

Hy sê Tencent se uitbreiding na ander dele van China se hoogs mededingende verbruikersekonomie om te vergoed vir speletjie-inkomste wat ’n plato bereik, kom ten koste van veel kleiner marges.

“Daar is nie ruimte om teen dieselfde pas te groei nie. Tencent moet $3 uit ander dienste maak om die wins te dek wat hy uit $1 uit speletjies sou maak.“

Tencent sal nie in die komende jare opbrengs van 40% aan die nieverbruikerkant van die internet volhou nie. Daarby is ByteDance, wat TikTok wêreldwyd besit, na my mening tans die opwindendste tegnologiemaatskappy ter wêreld. Hy het daarin geslaag om die eerste posisie in reklame in China in te neem, en maak vordering met speletjies, waar hy teen maatskappye soos Alibaba, Tencent en Baidu meeding,” sê Mohamed.

Byron Lotter, direkteur van Vestact Asset Management

Byron Lotter, direkteur van Vestact Asset Management, stem saam dat Tencent verwarrend kan wees vir beleggers wat hom nie in aksie sien nie. “Ons het nie juis ’n idee van hoe ongelooflik sy bates is nie – wat nou eiendomsverhuring, kosbestelling, speletjies, reklame, kommunikasie en meer behels. Tencent moet eenvoudig aanhou volg wat ander groot tegnologiemaatskappye doen, soos om in wolkdienste te investeer, in ’n mark waar hy reeds onmiddellike skaal en ’n reuseteikenmark het. Hy hoef nie die wiel van voor af uit te vind nie. Tencent het ook belange in ander ondernemings, waaronder Epic Games. “

Ek dink dis ’n fantastiese onderneming. As dit op die JSE genoteer was, sou ek Tencent gekoop het. En ek dink as Naspers in Hongkong genoteer was, sou beleggers hom dalk hoër aangeslaan het omdat hulle Tencent verstaan.” Wood sê Tencent se benutting van sy markleiersposisie as ’n Chinese verbruikerinternetplatform om na ander dele van die bedryf uit te brei, sal Naspers se vertoning bly aandryf, met ’n saamgestelde groeikoers van meer as 20% vir die onderliggende verdienste.

Leiersposisie

Naspers se probleem is om seker te maak dat die res van die maatskappy se onderliggende portefeulje wins begin maak en dat die afslag op die netto batewaarde krimp. “Naspers is in presies die regte posisie. Onder Bob van Dijk het die maatskappy die talle klein ondernemings begin uitsny wat hy besit het, en het baie duidelik geword oor die maatskappye waarin hy belê: aanlyn geklassifiseerde advertensies, voedselaflewering en tegnologiegegronde ondernemings. Wat kapitaaltoewysing betref, verskil internetondernemings se groei en uitbreiding van tradisionele nywerheidsmodelle.

Naspers se probleem is om seker te maak dat die res van die maatskappy se onderliggende portefeulje wins begin maak en dat die afslag op die netto batewaarde krimp.

Bemarking en ontwikkeling is uitgawes, en daarom toon die ondernemings chroniese verliese. Naspers het al sowat $12 miljard bestee om onderliggende ondernemings in oorheersende posisies in hul markte te probeer kry sodat hulle geld kan maak,” sê Mohamed. “Hy besef ook dat vertikaal geklassifiseerde advertensies, wat spesifieke markte teiken, eerder as veralgemening, beter geld maak. Hy beweeg in die regte rigting, maar vir baie aandeelhouers nie vinnig genoeg nie.

Bob van Dijk, uitvoerende hoof van Naspers en Prosus

Wat ek van Van Dijk se leiding hou, is dat hy bereid is om met ander operateurs te konsolideer om die verliesgewende fase van mededinging deur afslag te stop. Dit maak dit dan vir die ondernemings moontlik om wins teen gesonde marges te maak,” sê hy.

Om dit te illustreer: Die maatskappy het WeBuyCars in SA probeer verkry, maar die Mededingingskommissie het dit vroeër vanjaar gekeer op grond van monopoliekwessies. Naspers se SA bates, wat Takealot en Mr D insluit, beslaan steeds minder as 1% van die groep.

Prosus doen na berig word ’n aanbod vir die eBay-snuffeladvertensieonderneming, wat na raming $8 miljard tot $10 miljard werd is. Dit sal die maatskappy een van die bekendste aanlyn markhandelsmerke ter wêreld gee. “Dit sal beslis Naspers se status as die wêreld se voorste speler vir aanlyn snuffeladvertensies vestig, en al oorvleuel dit eintlik min met sy bestaande bates, kan daar moontlikhede wees om tegnologieplatforms te deel om die aanbieding te optimaliseer,” sê Mohamed.

Lotter sê: “Om eBay te kry, sal ’n groot transaksie wees. Hy het ’n paar onlangse teleurstellings gehad in die vorm van mislukte verkrygings, maar eBay is ’n baanbrekernaam in aanlyn geklassifiseerde advertensies en sal ’n fantastiese toetrede tot ’n paar nuwe markte verteenwoordig.

Dis te laat om van niks af te begin, want elke land het reeds gevestigde spelers, en daarom sal groei uit verkrygings kom, en hul kans is groter om teen die regte grootte winsgewend te wees. Ek dink hy kan baie geld maak met eBay, en dit sal goed inpas.”

“Om eBay te kry, sal ’n groot transaksie wees. Hy het ’n paar onlangse teleurstellings gehad in die vorm van mislukte verkrygings, maar eBay is ’n baanbrekernaam in aanlyn geklassifiseerde advertensies.”

Daarteenoor meen Wood dat dit nie duidelik is watter voordele uit die eBay- verkryging sal spruit nie – juis weens die gebrek aan oorvleueling met ander aanlyn snuffeladvertensiebedrywighede in Prosus. “Ons verkies dat Prosus sy posisie in sy bestaande snuffeladvertensieportefeulje bly konsolideer deur sy ondernemings verder te rasionaliseer, soos met kostebesnoeiing, die sluiting of verkoop van verliesgewende bedrywighede, en deur vennote in gesamentlike ondernemings in strategiese gebiede uit te koop.”

Ontknoop advertensies

Wood sê in die algemeen wil hy hê dat die bestuur “aanhou om sy aandag te rig op pogings om die kerninternetbates se winsgewendheid aan te dryf, en om bedrywighede te verkoop of te sluit waarin die maatskappy nie ’n mededingende voordeel het nie.

Mohamed sê: “Ek sal wil hê dat Prosus die sake vir aanlyn geklassifiseerde advertensies in ’n afsonderlike notering ontknoop om waarde te ontsluit. Snuffeladvertensieondernemings is op grond van die veelvoude waarteen hulle tans verhandel, geneig om uiters kontantskeppend te wees, wat positief vir Naspers-aandeelhouers kan wees. Dis egter moeilik om te sê of die bestuur só dink.”

Lotter stem saam dat die kapitaaltoewysing onder Van Dijk goed is, selfs al word Tencent se skadu oor alle besluite in ag geneem.

“Om dit reg te stel: Ons is die afgelope dekade groot aanhangers van die onderneming, en groot maatskappye trek baie aandag. Hy doen goeie werk terwyl die Tencent-belegging self aangaan, en ná die verkoop van nog ’n persentasiepunt van Tencent het Naspers kontant om te gebruik sonder dat hy hom hoef te kwel hoe Tencent vaar. “

Die sake vir aanlyn geklassifiseerde advertensies het meestal amper na volle bedrywighede ná die inperking teruggekeer, en dis ’n fantastiese terrein. Die maatskappy teiken groot ekonomieë, en hy hou aan om te konsolideer en bates te bekom. En die tydsberekening vir die verkoop van Flipkart aan Walmart in Indië in 2018 was baie goed. Oor die hele wêreld heen begin mense kosaflewering aanvaar, en dit sal soos alle aanlyn kleinhandel gevestig raak. Naspers is bedrywig in al die sleutelsektore wat die toekoms aandryf, en baie gebeur agter die skerms.

Mense dink dalk die maatskappy kan net een ding doen, maar baie van wat hy doen, is ongelooflik suksesvol,” sê Lotter. Wood stem saam dat die onttrekking aan beleggings soos Allegro en Flipkart en die konsolidering van sy posisie deur uitgesoekte samesmeltings en verkrygings goeie vordering verteenwoordig om die maatskappy se portefeulje vaartbelyn te maak en sy strategie te fokus, maar sê dat die mark ondanks al dié stappe ongeduldig bly en ’n positiewe verdienstebydrae uit die nie-Tencent-belange wil hê.

“ ’n Belegging in óf Naspers óf Prosus het steeds tot gevolg dat ’n mens ‘Tencent-minus’ eerder as ‘Tencent-plus’ kry ten opsigte van die verdienste wat gelewer word vergeleke met ’n direkte belegging in Tencent,” sê hy.

Kosaflewering

Mohamed sê kosaflewering is in ’n selfs vroeëre fase van volwassenheid, en die mark is vol waagkapitaal wat probeer om die diens te wees wat oorleef – wat moontlik die “Tencent-minus”-situasie vererger. “In Amerika word die kosafleweringoorlog al jare lank aggressief gevoer, en dis nog nie duidelik wanneer konsolidasie sal plaasvind nie. Naspers hoop om een van die leidende konsolideerders te wees wanneer die geld uiteindelik opdroog en genoeg spelers hul vingers verbrand het.”

Naspers het die stryd verloor om die wenbieër vir Just Eat in Brittanje te wees, maar Mohamed sê die maatskappy, wat nou sowat $5 miljard kontant het, sal aanhou. “Ek dink hy kan maklik nog $10 miljard verkry. As aandeelhouers moet ons aanvaar dat ons geduldig moet wees met die res van Naspers, wat dalk nog ’n ruk lank deur die beleggingsfase sal gaan.”

Naspers het einde Maart sy syfers vir die volle jaar uitgereik en die mark se siening van die groep se sake bevestig deur ’n styging van 17% in die groepinkomste te verklaar, met die groep se handelswins 13% hoër en Tencent se inkomste 16% hoër. Naspers se belang in Tencent is nou sowat $186 miljard werd. Volgens segmente het e-handel se inkomste met 32% gestyg, kosaflewering se inkomste het met 99% toegeneem, en die inkomste uit geklassifiseerde advertensies was 48% meer. Die handelsverliese in e-handel het egter saam $964 miljoen bedra vanweë voortgesette investering om ’n markleiersposisie te behou en kosaflewering en finansiële tegnologie of betalingsdienste soos PayU te versterk. Prosus het ’n styging van 6,7% in die netto wins vir die jaar aangeteken.


Naspers en Prosus – ’n koop? En teen watter prys?

“Na my mening kan jy dit nie bekostig om nie dié maatskappye te hou nie. Hul langtermyn-vooruitsigte is soveel beter as die meeste ander opsies wat vir beleggers beskikbaar is omdat hulle blootstelling aan die digitale ekonomie het,” sê Nadim Mohamed, beleggingsontleder by First Avenue Investment Management.

“Die mark sal in die volgende paar jaar sy waardasies grond op wat Tencent doen, maar ek dink nie Tencent sal gou van HK$450 na HK$550 styg nie. Tencent se prys is basies in die boonste gedeelte van my waardasie. As dit egter nie verlede jaar duidelik was nie, sal dit vanjaar duidelik wees: Die volgende maatskappye wat wêreldgroei aandryf, is die tegnologiereuse, en veral as ’n randskansblootstelling aan die digitale ekonomie is dit ’n moet in enige portefeulje. Dit moet die kernaandeelbelang van enigiemand met ’n langtermyn- beleggingstydraamwerk wees. Om as ’n plaaslike belegger nie Naspers of Prosus te hê nie, is ’n groot risiko in dié mark,” sê hy.

Byron Lotter, direkteur van Vestact Asset Management, sê: “Naspers verhandel teen ’n groter afslag, maar dis weens die plaaslike mark se grootte.

Ek sal Prosus kies, want die Europese notering sal die aandeel in staat stel om sy markwaardepotensiaal te bereik. En op die JSE sal dit die europrys volg. Al klink ek dalk pessimisties oor die plaaslike ekonomie en politieke risiko, is dit die twee aandele wat ek eerste sal koop, en ek is nie ’n voorstander van prysteikens nie – ek sal meer teen vandag se pryse koop en dit vir ten jaar lank hou.”

Chris Wood, van Prudential Investment Management, verwag steeds beduidende waarde in Naspers.

“Ons meen die afslag teenoor die onderliggende waarde van sy portefeuljebelange waarteen hy tans verhandel, is te groot. Dus bly Naspers ’n kernbelang in ons kliëntportefeuljes, en ons behou ’n oorgewig posisie in die gekombineerde belange van Naspers en Prosus vergeleke met ons maatstaf,” sê hy.

“Ons verkies om die meeste van ons blootstelling deur Naspers te hê, en meen dis aantreklik om ’n ‘afslag op die afslag’ op die onderliggende portefeulje bates te besit. Ons kliëntportefeuljes het egter blootstelling aan sowel Naspers as Prosus, met die vermoë om die relatiewe afslag te benut tussen die twee genoteerde entiteite wat albei die meeste van hul waarde uit dieselfde portefeulje bates kry.”


Meer oor:  Finweek  |  Jse  |  Prosus  |  Naspers
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.