Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
MTN lyk goedkoop, onvoorspelbaarheid kan dit daar hou
18 Maart 2021

Die onlangse aankondiging dat MTN se Siriese onderneming onder geregtelike voogdyskap geplaas is ná beskuldigings dat hy sy lisensievoorwaardes oortree het, is een van ’n reeks probleme wat Afrika se grootste selfoonoperateur probeer agterlaat deur sy bateverkoopsprogram en sy besluit om die Midde-Ooste te verlaat en op Afrika te konsentreer.

MTN het voor die jongste probleme daar reeds die onafgehandelde verkoop van sy belang van 75% in MTN Sirië vir $65 miljoen aangekondig. Hy beplan ook om sy bedrywighede te verkoop in lande soos Afganistan (waar hy beskuldig word van omkopery en die oortreding van Amerika se antiterrorismewet) en Iran (waar hy van omkopery aangekla word en vanweë Amerikaanse sanksies nie geld kan onttrek nie).

Die Midde-Oosterse streek, wat vroeër ’n belangrike fokuspunt in MTN se waaghalsige strategie van internasionale groei-uitbreiding was, is blykbaar nie die moeite werd nie. MTN se ervaring in verskeie Afrikalande was nie veel makliker nie.

Hy het verskeie probleme in Nigerië ondervind, waaronder ’n stewige boete van $5,2 miljard wat later tot $1,5 miljard verminder is. Nigerië, wat ’n derde tot sy inkomste en byna 40% tot sy wins bydra, is beslis die moeite werd, en MTN werk aan sy verhouding met die Nigeriese owerheid en het sy Nigeriese bedrywighede op die plaaslike beurs genoteer.

Die laaste paar jaar het die groep daarop gekonsentreer om in verskeie liggings vure dood te slaan, sy Suid-Afrikaanse onderneming om te swaai en om wat hy sy bateverkoopstrategie noem (wat in Maart 2019 aangekondig is), uit te voer om skuld en risiko te verminder. Die groepverdienste het geleidelik verbeter terwyl hy aan dié kwessies gewerk het. Hy is, ondanks die positiewe ontwikkelings, minder gewild by beleggers as sy plaaslike en internasionale mededingers.

Sy bateverkoopstrategie en besluit om die Midde-Ooste te verlaat, kan skuld en risiko verminder, maar sy skuldvlak bly hoog en groeigeleenthede min, en die pandemie het sy bateverkope vertraag. Nigerië, ’n belangrike bydraer tot die groep en ’n saak wat vir MTN noodsaaklik is om reg te kry, hinder beleggers steeds. In dié stadium konsentreer MTN minder op groei as op die konsolidasie van sy posisie en om die balansstaat reg te kry, sê Karl Gevers, portefeuljebestuurder by Benguela Global Fund Managers.

“Ons dink nie die bateverkoopprogram verminder MTN se groeigeleenthede nie. Ons meen MTN se groeigeleentheid is by MTN Nigerië vanweë sy groot belegging in die land. Dis noodsaaklik dat die groep Nigerië regkry vanweë die relatiewe bydrae daarvan. Die bydrae is byna 40% van die groepverdienste voor rente, belasting, depresiasie en amortisasie (ebitda).”

Gevers sê sy hoë skuldvlak en beperkte moontlikhede om geld uit Nigerië en Iran te repatrieer, het hom grootliks gedwing om die bateverkoopprogram aan te pak. Die verkoop van bates “verminder finansiële risiko beslis – ’n faktor wat MTN se markaanslag of -waardasie al ’n ruk lank beperk”.

Die onttrekking aan die Midde-Ooste sal van die geopolitieke risiko verminder omdat hy bedrywighede het in wisselvallige lande wat ’n klein gedeelte van die inkomste verteenwoordig, met die Midde-Ooste, Noord-Afrika en die gesamentlike onderneming in Iran wat sowat 11% van die groepinkomste bydra.

“Die druk deur Amerika met beskuldigings dat MTN terroristebedrywighede ondersteun, sou ook motivering gebied het om die streek te verlaat,” sê hy. Gevers voeg by dat die groep aan beduidende valutarisiko blootgestel is omdat hy inkomste in plaaslike geldeenhede verdien terwyl ’n beduidende hoeveelheid skuld in dollar is. Gevers sê hy sal ook nie “die druk onderskat wat met bewerings van terroristefinansiering deur Amerika verband hou” nie.

“Die geopolitieke risiko en negatiewe publisiteit weens die besit van bedrywighede in die Midde-Oosterse streke weeg veel swaarder as dié streke se relatief klein bydrae tot die ebitda. Met sy huidige beleggings in die Midde-Ooste beskou Amerikaanse beleggers MTN nie as belêbaar nie,” sê hy. Gevers meen die onttrekking aan die Midde-Ooste kan kontantinvloei van R7 miljard tot R10 miljard tot gevolg hê wat nie by die bateverkoopprogram van R40 miljard ingesluit is nie en die balansstaat verder sal verbeter.

Peter Takaendesa, aandeelhoof van Mergence Investment Managers, sê die verkoop van Midde-Oosterse bedrywighede (wat lankal moes gebeur het) sal die groep help om skuld en reputasierisiko te verminder, terwyl dié bedrywighede nou “min opbrengs op bestuursinspanning” beteken omdat hulle minder as 10% van die groepwins bydra.

Peter Takaendesa, aandeelhoof van Mergence Investment Managers

MTN moet nog baie doen voordat beleggers hom positief teenoor sy portuurgenote sal aanslaan. Dit kan deels toegeskryf word aan “onreëlmatige uitvoering omdat die leierskorps oor ’n tydperk verander het”, sê Takaendesa. Onder Phuthuma Nhleko, voormalige uitvoerende hoof, het MTN sterk leiersposisies in die meeste Afrikalande ingeneem, “maar het sedertdien grootliks markaandeel in sleutelbedryfslande verloor”, met Airtel, Etisalat en Vodacom as sy sterkste mededingers.

“Daar was onlangs tekens van verbeterde uitvoering,” sê hy, al is dit ’n bietjie laat met dié dat reguleerders MTN se oorheersende markposisies wil beperk. Hy is in Nigerië en onlangs in Ghana as oorheersend verklaar. Takaendesa sê ander operateurs het verhoudinge met sleutelbelanghebbendes beter as MTN bestuur, soos uit sy Nigeriese boete blyk. MTN het weens sy bedryf- en regulatoriese probleme “aansienlik swakker gevaar as sy groot portuurgenote in ontluikende markte, soos Vodacom, Bharti Airtel en American Movil”.

Dit kan volgens Takaendesa verander as sy uitvoering verbeter “om ten minste te keer dat hy markaandeel verloor, sy balansstaat herstel en belanghebbendes beter bestuur om onnodige boetes en reputasieskade te vermy”. MTN vestig sy hoop nou al hoe meer op Afrika, waar die belofte van ’n groeiende bevolking en ekonomiese uitbreiding en die werklikheid van omset en winsgewendheid geneig is om te verskil. Nigerië speel steeds ’n groot rol in MTN se bedrywighede, sê Gevers.

“Nigerië was die laaste jare die groot rede vir baie van MTN se pyn (van regulatoriese kwessies en boetes tot geldrepatriasie en valutadevaluasie). Die swak olieprys het ’n beduidende uitwerking gehad op Nigerië se ekonomie en sy vermoë om buitelandse reserwes te genereer. Dit het dit amper onmoontlik gemaak om geld te repatrieer.”

Die verhouding tussen MTN en die Nigeriese regering en reguleerders het egter verbeter, al waarsku Gevers dat ’n moeilike tyd kan voorlê met die komende lisensiehernuwing in Nigerië. Gevers sê daar is steeds beduidende groeigeleenthede in mobiele dienste (toenemende penetrasie), toenemende datapenetrasie en aanvullende dienste, soos mobiele finansiële dienste en digitale dienste.

Al het die pandemie blykbaar bateverkope vertraag, is sommige in ’n gevorderde stadium, soos die verkoop vir R1,8 miljard van Belgacom en die Siriese bedrywighede.

Volgens Gevers is die belangrikste verkoopstransaksie wat nog moet plaasvind die belang in IHS Towers, wat sy notering verlede jaar uitgestel het. Selfs al wil hy, sal dit vir MTN moeilik wees om ander gebiede te betree weens die relatief baie skuld op die beheermaatskappy se balansstaat en probleme met geldrepatriasie in Nigerië, sê Takaendesa. Daar is egter ruimte vir beduidende groei in data en mobiele geld in Afrika, “al hou dit ook groot risiko weens onsekere regulering in, asook voortgesette probleme met geldrepatriasie in sommige sleutelmarkte”.

“Daarom meen ons dat MTN se teiken om op Afrika te konsentreer, nie die beste uitkoms vir beleggers is nie, maar beter is as om Afrika sowel as die Midde-Ooste se kopsere te moet hanteer. Ons meen dat wanneer MTN die balansstaat herstel het, hy groeigeleenthede sal kry wat sy groot blootstelling aan Nigerië sal verklein en markte met relatief lae risiko sal betree of bestaande lande sal konsolideer.”

Takaendesa sê MTN se kernsake in Afrika is heel winsgewend en groei ná wisselkoersaanpassing teen dubbelsyfers. “MTN het in die meeste markte die voordeel dat hy eerste in die mark was en het aansienlik gegroei om in al sy belangrike bedryfslande een van die twee voorste operateurs te wees.”

In telekommunikasiesakemodelle is grootte belangrik vir winsgewendheid. Hy sê daar is nog ruimte vir beduidende groei in die inkomste uit mobiele data en mobiele geld in sy sleutelmarkte buite Suid-Afrika. Terwyl die aandeel goedkoop is, moet dit nie noodwendig nou gekoop word nie. “Dis altyd baie moeilik om MTN te waardeer weens baie groot voorspellingsrisiko en onvoorspelbare niebedryfsrisiko’s, soos regulatoriese boetes,” sê Takaendesa.

“Die aandeel lyk goedkoop as ’n mediumtermyn-belegging, veral as ’n mens meen dat hy die niebedryfsrisiko’s in Nigerië oorkom het en dat die bateverkoopprogram teen billike markwaardes afgehandel sal word.” Gevers sê die aandeel is dalk op die oog af goedkoop, met ’n verwagte prys-verdienste-verhouding van minder as agt en ’n dividendopbrengskoers van sowat 6,5%.

“Die hoë skuldvlak, regulatoriese risiko’s en wisselkoers- en geldrepatrasierisiko’s sal egter die opbrengs verhoog wat aandeelhouers vereis.” In baie lande waarin hy bedrywig is, is die risiko’s groot terwyl die vereiste kapitaalbesteding om die netwerk te onderhou ook beduidend is – wat die opbrengs raak, sê Gevers.

“Tog lyk MTN relatief aantreklik, veral met die fokus op die verbetering van die balansstaat en die regulatoriese voldoening en verhoudings in die bedryfstreke.” 

* Stuur 'n boodskap aan terugvoer@finweek.co.za


Meer oor:  Mtn  |  Finweek
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.