Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
MTN: Pasop vir afgeleide instrumente
13 September 2018
’n MTN-voorafbetaalde SIM-kaart-pakket by ‘n padstalletjie in Lagos, Nigerië.

Einde Augustus was daar verder slegte nuus vir MTN. Die sentrale bank van Nigerië beweer dat MTN dividende onwettig van Nigerië na Suid-Afrika gestuur het en dring daarop aan dat MTN $8,1 miljard moet terugbring.

Die land dring ook aan op ’n belastingbetaling van sowat $2 miljard. Hou in gedagte dat MTN se Nigeriese boete in 2015 sowat $5 miljard was; dit is dus groot geld. MTN ontken enige misdryf, en in teenstelling met in 2015 het hulle ten minste ’n Sens-aankondiging betyds uitgereik.

Wat ek wil bespreek, is egter nie MTN nie, maar eerder handelaars wat afgeleide instrumente* (hefboomfinansiering) gebruik en die risiko van enkelaandele. Ek het die rubriek geskryf die oggend toe die MTN-nuus aangekondig is, en die aandeel het toe 22% laer as die vorige dag se sluitingsprys verhandel.

Vir my was die oplossing vir die risiko van ’n enkelaandeel eenvoudig om heeltemal op te hou met aandeelverhandeling.

Iemand wat MTN verhandel, sou dalk die aandeel verkoop het en verwag het om ’n goeie wins te maak weens die daling in die prys. Maar dit sou die teenoorgestelde gewees het vir die handelaar wat oornag ’n lang posisie op MTN gehou het en verwag het om voordeel te trek uit ’n prysstyging. Hy sou groot verliese op sy portefeulje gely het.

Veronderstel ’n handelaar se hefboomverhouding was 7 en 10 maal met behulp van termynkontrakte of verskilkontrakte. Sy verlies daardie oggend sou sowat 150% tot 220% gewees het. Daar was geen werklike manier om homself te beskerm nie, aangesien hierdie ontwikkeling oornag plaasgevind het sonder ’n geleentheid om voor die ineenstorting te onttrek.

Dit is ’n groot ramp vir ’n verhandelingsportefeulje – vir die kontantbalans van die portefeulje, maar ook vir die emosionele welstand van die handelaar. Dit is onmoontlik om jouself teen so iets te beskerm. As baie slegte nuus breek, kan ’n handelaar dalk aan die korrekte kant van die handel wees en ’n goeie wins verdien, maar die een of ander tyd sal hy aan die verkeerde kant wees en dan moet aanskou hoe sy portefeulje vernietig word.

Dit is ook belangrik om te besef dat dit met enige aandeel kan gebeur dat slegte nuus breek wat ’n verhandelaar se portefeulje sal vernietig, net soos die portefeulje se waarde die hoogte kan inskiet weens ’n oorname-aankondiging – wat handelaars sal seermaak wat kort posisies op die aandeel hou.

Een moontlike oplossing is baie kleiner handelsposisies binne ’n handelsportefeulje, maar dit word baie moeilik om te bestuur. In my dae van aandeleverhandeling kon ek nooit meer as vier oop posisies bestuur nie, dus was die risiko van ’n enkele gebeurtenis steeds beduidend. Vir my was die oplossing vir die risiko van ’n enkelaandeel eenvoudig om heeltemal op te hou met aandeelverhandeling. Ek verhandel nou net handelsindekse en buitelandse valuta (FX).

’n Indeks kan natuurlik ook ineenstort, maar dit is ’n baie seldsame gebeurtenis. Selfs in die slegste dae van die 2008-’09-krisis was daar nooit ’n verskil van meer as 5% tussen ’n sluitings- en ’n openingsprys nie, en daardie vlak van risiko kan ek darem hanteer. Ek wil ook twee belangrike punte rakende FX-handel beklemtoon.

Eerstens, moenie met FX-handel begin nie. Dit is waar die internasionale beroepshandelaars uithang, en hulle sal met jou geld verdwyn voordat jy jou oë kan uitvee. Kry ondervinding van (winsgewende) handel van ’n indeks (ALMI is uitstekend teen R1 per punt) voordat jy FX geleidelik betree.

Tweedens, verhandel slegs die groot FX-eenhede; die jen, Amerikaanse dollar, pond sterling en euro. Nog ’n laaste punt: Ek skryf hier oor handelaars. Beleggers se vingers is natuurlik ook verbrand deur hierdie nuus, maar aangesien hulle nie hefboomfinansiering het nie, is hul verlies darem net die 22% – dit is nie vermenigvuldig met die hefboomverhouding wat handelaars in afgeleide instrumente gebruik nie.

* Stuur 'n e-pos aan terugvoer@finweek.co.za

* ’n Afgeleide instrument stel ’n handelaar in staat om ’n posisie van sê maar R100 000 te verhandel met slegs R10 000 tot R15 000 kontant, maar om wins of verlies op die volle R100 000 te neem.

* Foto: Gallo/Getty Images

Meer oor:  Mtn  |  Finweek  |  Beleggings  |  Simon Brown  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.