Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Nuwe hoogtepunte vir mynbou-aandele
4 Februarie 2021
Foto: Gallo/Getty Images

Die internasionale finansiële krisis van 2008-’09 word hoofsaaklik onthou weens die ineenstorting van banke en hul aandeelpryse. Daar word egter dikwels vergeet dat dit ook ’n einde gemaak het aan die styging in kommoditeitspryse en mynbouaandele.

In die eerste dekade van die eeu het kommoditeitspryse in die algemeen gestyg, met platinum wat ’n hoogtepunt van ongeveer $2 000 per ons bereik het en olie $150 per vat .

Plaaslik het die FTSE/JSE se indeks van top-10 hulpbronaandele (Resi 10) in Mei 2008 ’n hoogtepunt van net onder 78 000 indekspunte bereik, terwyl hy nou rondom 64 000 punte staan. In die 12 jaar sedert daardie hoogtepunt het die mynboumaatskappye goed verstewig. Hulle het hul skuld afbetaal, was versigtig met nuwe projekte, het verliesmakende of marginale bedrywighede gesluit en groot transaksies vermy.

Tesame met een van die antwoorde op die probleem van die pandemie, naamlik die bou van infrastruktuur, kan dit lei tot ’n wonderlike situasie vir mynbou-aandele wat die Resi 10 na nuwe hoogtepunte en verder sal bring. President Joe Biden sal waarskynlik groot bedrae geld bewillig om Amerika se verouderende infrastruktuur op te knap. China bestee reeds geld aan infrastruktuur, en as die wêreld se grootste ekonomie (Amerika) ook tot die vraag bydra, kan kommoditeitspryse verder styg.

Die mynmaatskappye self lyk ook besonder goed, en sommige mynboukenners het al aan my gesê dat mynbou-aandele met hul sterk balansstate en lae skuldvlakke dalk beter lyk as ooit tevore.

Kommoditeitspryse is inherent siklies. Namate die vraag groei, styg pryse, en dié toename in pryse bring ’n groter aanbod na die mark, wat die vraag neutraliseer en pryse laat daal. Met “sagte” kommoditeite, soos mielies of suiker, is die siklusse kort, want die toevoeging van nuwe kapasiteit is maklik, en dus word enige prysstyging vinnig gevolg deur ’n groter aanbod.

Die verhoging van die aanbod van “harde” kommoditeite soos platinumgroepmetale (PGM’e), koper, ystererts en dies meer is baie stadiger, aangesien die aanlooptyd baie langer is. Dit kan tot ’n dekade duur om ’n nuwe myn in produksie te stel, en om net die vermoë van ’n bestaande myn te verhoog, is ’n projek wat baie jare lank kan neem.

Die siklusse is dus nou baie langer, en die prysstygings wat ons in kommoditeite gesien het, kan dus moontlik nog ’n paar jaar duur voordat die vraag begin afneem of nuwe produksie die pryse begin afdruk. Die mynmaatskappye self lyk ook besonder goed, en sommige mynboukenners het al aan my gesê dat mynbou-aandele met hul sterk balansstate en lae skuldvlakke dalk beter lyk as ooit tevore. Alles in ag genome kan ons dalk goed geposisioneer wees vir ’n goeie herstel in hierdie sektor wat minstens twee of drie jaar en miskien langer sal duur.

Die lae skuld beteken ook dat ons goeie dividendbetalings sal kry, hoewel lae skuld ook kan meebring dat sommige mynmaatskappye sal besluit om groot projekte aan te pak, wat hul balansstate in gevaar kan stel. Ons kan ook dalk ’n paar groot samesmeltings en verkrygings sien, as mynbase besluit die maklikste manier om die aanbod te verhoog, is om ’n mededinger te koop.

Dit maak my altyd bekommerd, en ek sal dit dus fyn dophou. Die maklikste manier om in die mynbedryf te belê, is met die Satrix RESI ETF, maar jy kan ook direk aandele in die mynmaatskappye self koop. Ek sou egter wegbly van goudmyne. Goud word deur vrees meer as enigiets anders aangedryf en in ’n wêreld wat entstowwe vervaardig, al is dit stadig en met sommige gebiede wat agterbly, kan goud se groei dalk begin stilstaan.

Ek sou eerder op PGM’e en nywerheidsmetale fokus. Een newe-effek van hoër kommoditeitspryse is dat ons ook ’n sterker geldeenheid kan verwag, soos ons in die eerste jare van hierdie eeu gesien het. Kommoditeite verhandel in Amerikaanse dollar, en plaaslike mynmaatskappye skakel dit dan om in rand, wat ’n vraag na die geldeenheid skep en dus pryssterkte veroorsaak.

* Stuur 'n boodskap aan terugvoer@finweek.co.za


Meer oor:  Mynbou  |  Finweek
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.