Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Om lank en kort te gaan met ’n ETF
11 Junie 2021
Foto: Shutterstock

Die beleggingswêreld bestaan uit verskillende bateklasse. ’n Bateklas is ’n groep beleggings wat dieselfde eienskappe toon en bestaan gewoonlik uit kontant, geldmarkinstrumente, effekte en rentedraende bates, vaste eiendom, aandele, alternatiewe beleggings, kommoditeite, afgeleide instrumente en kriptogeldeenhede.

Dit is altyd raadsaam om die konsep van diversifikasie in werking te stel om jou portefeulje te balanseer en om die risiko te versprei. Elke bateklas het sy eie risikoprofiel. Hoe hoër die risiko van ’n bepaalde belegging, hoe hoër die moontlike opbrengs.

Maar baie individuele beleggers verstaan nie hoe om die toepaslike risikovlak te bepaal wat hul portefeuljes moet dra nie. ’n Mens moet jouself dus afvra: Watter tipe risikoprofiel het die bateklas waarin ek wil belê?

Geen risiko, laag, medium, hoog of baie hoog? Die bateklas waarna ek in hierdie artikel wil verwys, is dié van alternatiewe beleggings. Alternatiewe beleggings is ingewikkelder as tradisionele beleggings. Hulle het dikwels hoër gelde en die risiko is hoog tot baie hoog.

Wat is alternatiewe beleggings?

Dit sluit beleggings in soos private ekwiteit, waagkapitaal, vaste eiendom, kommoditeite, verskansingsfondse en antieke en versamelstukke, buitelandse valuta en bestuurde afgeleide instrumente. Alternatiewe verwys na beleggings wat buite die gewone klassifikasie van bateklasse val, maar wat tog oorvleuel met sommige van hulle.

Alternatiewe beursverhandelde fondse (ETF’s) het die deure oopgemaak vir hierdie tipe bateklasse wat lank net vir welgestelde en institusionele beleggers toeganklik was, en wat net ’n fraksie van die gelde hef, en gewoonlik minimum beleggingsbedrae vereis. Dit is waar die ProShares RAFI Long/Short my oog gevang het. Die kode is RALS en is op die New Yorkse aandelebeurs genoteer.

Dié ETF volg die FTSE RAFI US 1000 Long/Short totale opbrengsindeks. Dié ETF kan dien as ’n waardevolle komponent van ’n alternatiewe batetoewysing in ’n goed gebalanseerde kernportefeulje.

Die ETF streef daarna om die potensiaal vir beter opbrengste as die fundamentele metodologie van die RAFI-indeks te isoleer deur lang posisies in die RAFI US 1000-indeks en kort posisies in die Russell 1000-indeks te neem.

Verder ken dit gelyke dollarbedrae toe vir lang en kort aandeleposisies. “Lang posisies” beteken om ’n aandeel te hou of ’n lang blootstelling daaraan te hê met die verwagting dat die waarde daarvan mettertyd sal toeneem. “Kort posisie” beteken om ’n bate kort te verkoop of kort blootstelling daaraan te hê met die verwagting dat dit in waarde sal daal. Dus in een “portefeulje” is daar lang en kort posisies gelyktydig – maar dit word as ’n ETF gebied.

Wat maak die beursverhandelde fonds dus aanloklik?

Peet Serfontein is ’n onafhanklike markontleder en strateeg.

Deur ’n lang blootstelling aan ’n nie-kapitalisasie-geweegde “fundamentele” indeks en ’n kort blootstelling aan ’n geweegde indeks van die markkapitalisasie (onthou die gelyke dollarbedrag), poog die beursverhandelde fonds om die verskil in prestasie (uitprestasie teenoor onderprestasie) tussen die fundamenteel geweegde lang gedeelte van die fonds en die markkapitalisasie kort gedeelte van die fonds te lewer.

Dit is ’n mondvol, maar onthou hierdie tipe beleggings is kompleks. As jy meen dat die lang gedeelte die kort gedeelte sal uitpresteer dan is die beursverhandelde fonds vir jou. ProShare-adviseurs gebruik ’n wiskundige benadering tot beleggings.

Met behulp van hierdie benadering bepaal ProShare-adviseurs die soort, hoeveelheid en mengsel van beleggingsposisies wat hulle glo dat die fonds in kombinasie moet hou om opbrengste te lewer.

Maar moet ’n mens koop?

Die ETF verhandel bo sy 200-dag bewegende gemiddeld. ’n Prysaksie bo die 200-dag gemiddeld klassifiseer die langtermyntendens as bul. Opwaartse prysmomentum ondersteun die prysaksie.

Die blou lyn op die grafiek is ’n langtermynondersteuningstendenslyn. Let op hoeveel keer die prysaksie hierdie lyn al getoets het. Hoe meer kere die prysaksie die lyn toets, hoe belangriker word so ’n tendenslyn. Die prysaksie het onlangs hierdie lyn begin opwaarts breek, wat ’n vroeë aanduiding is dat interne sterkte besig is om in die aandeel te ontwikkel.

Die verwagting is dat die prysaksie die vorige laagtepunt in 2012 weer gaan toets en as ’n winsteiken dien. Hierdie prys is in die omgewing van $35. Los die opsie oop as die prys verby hierdie prysgebied beweeg en pas die teikenprys aan. Sodra die prys onder die vlak van $32 inbeweeg, sal ek bekommerd raak. Hierdie vlak sal ook as ’n stopverliesvlak dien en is ook die ondersteuningstendenslyn.

Die grafiek is die langtermyn- (maandelikse) grafiek van die beursverhandelde fonds se prys. Neem kennis dat die skaal nie ’n logaritmiese skaal is nie. 

* Stuur 'n boodskap aan terugvoer@finweek.co.za

* Peet Serfontein is ’n onafhanklike markontleder en strateeg.


Meer oor:  Finweek  |  Beleggings  |  Etf
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.