Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Petra Diamonds wil sy rieme na die vel sny
2 Augustus 2018
Petra Diamonds se Finsch-myn in Kimberley

Sommige beleggingsontleders benader Petra Diamonds – ’n maatskappy wat in Brittanje genoteer is en byna uitsluitlik in Suid-Afrika diamante ontgin – deur diep asem te haal en op die mediumtermynverwagting te konsentreer. Die afgelope twee jaar was vir Johan Dippenaar, Petra se langdienende uitvoerende hoof, en die maatskappy ’n moeilike tyd.

Johan Dippenaar, Petra se uitvoerende hoof

Nadat die maatskappy jare lank van byna niks af nie ’n jaarlikse produksie van 5 miljoen karaat per jaar nagejaag het, het hy sy visier nou laer gestel. Die rede is dat die skuld wat hy in sy verkrygings- en uitbreidingsveldtog aangegaan het, buite beheer ontplof het. Lewering by Cullinan en Finsch – twee voormalige De Beers-myne – was ondanks die oorskakeling na ’n hoër rat, minder as optimaal.

Die rand het ook vroeër vanjaar verstewig, wat tot ’n mate die kantelpunt was met pogings om die skuldvlak laer te kry. Die gevolg was ’n lywige regte-uitgifte van sowat R2,2 miljard en die verkoop van die gesamentlike onderneming Kimberley Ekapa Mining vir sowat $16 miljoen.

Die doel was om skuld in te kort en van kontantvretende, hoëkoste bedrywighede ontslae te raak. Probleme met lewering by Finsch en Cullinan duur voort. Dippenaar het wel die druk op die maatskappy, wie se aandele op ’n twaalfmaandegrondslag met sowat ’n derde gedaal het, in ’n mate verlig.

“Ons reken die mark sal waarskynlik negatief op die aankondiging reageer,” sê RBC Capital Markets met verwysing na Petra se jaarlikse produksieverslag. Daarin het die maatskappy sy mikpunt vir die 2019-boekjaar tot tussen 3,8 miljoen en 4 miljoen karaat verlaag.

Nadat die maatskappy jare lank van byna niks af nie ’n jaarlikse produksie van 5 m. karaat per jaar nagejaag het, het hy sy visier nou laer gestel.

En ja, die aandeel het teen einde Julie skerp gedaal. Terwyl die koers-verandering waarskynlik op kort termyn meer vrae sal ontlok, behou die bank sy “uitpresteer”-aanbeveling rakende Petra se aandele, al is dit bloot omdat die diamantmark aan die verbeter is. Laer hekkies om in die 2019-boekjaar oor te spring, steun ’n positiewe vooruitsig.

Dippenaar sê: “Die toekomsfokus van die groep sal op die voortgesette optimalisering van produksievolumes en kosteraamwerke oral in ons portefeulje wees om kontantgenerering te maksimeer.” Dit is maatskappytaal vir “om binne jou vermoë te leef”. “Ons hou steeds van die groei en gehalte van die werksaamhede wat Petra bied, maar die maatskappy het die afgelope jare gesukkel om alle mikpunte te haal en sal waarskynlik ’n paar konsekwente kwartale moet lewer om nuwe beleggers se belangstelling te wek,” sê BMO Capital Markets in ’n onlangse nota oor die diamantmaatskappy.

Dié finansiële diensverskaffer sê verder: “Die vooruitsig vir diamante is tans taamlik aantreklik en Petra bly een van die maatskappye wat die beste geplaas is om uit ’n omgewing van stygende diamantpryse munt te slaan.”

*terugvoer@finweek.co.za

Foto's: Verskaf, www.petradiamonds.com

Skouspelagtige dividend in die vooruitsig?

Nie te lank gelede nie was Merafe Resources ’n klein maatskappytjie met ’n groot skuldlas. Hy was midde-in uiters gedempte marktoestande weens ’n afname in die vraag na vlekvrye staal, die produk waarin die chroom wat Merafe produseer meesal gebruik word.

Die rede vir sy skuld was dat hy daartoe verbind was om sy aandeel van een vyfde in Lion II, ’n groot ferrochroom-uitbreiding, te finansier met die res van die aandele wat Glencore besit.

Glencore, ’n enorme groep wat uit Switserland werk, het geen probleem gehad om sy deel te finansier nie, maar Merafe was anders. In ’n stadium het hy skuld van R600 miljoen op sy balansstaat gehad.

’n Aanduiding van hoe vinnig die hoër chroomprys Merafe gehelp het, is dat sy skuld op 31 Desember op net meer as R400 miljoen gestaan het. Teen Maart was sy netto kontant R600 miljoen en kon hy ’n dividend van R226 miljoen - sowat 150% beter as sy eerste dividend die vorige jaar betaal. Die hoop is dat Merafe gereed maak vir iets meer skouspelagtig met sy dividend.

Ontleders sê die aandeel is om dié rede die moeite werd om te besit. Dit is ondanks Merafe se aanduiding van matig laer tussentydse verdienstes ná ’n daling in chroompryse. Ontleders meen egter bestendiger chroompryse op mediumtermyn en Merafe se kostevoordeel noudat die opbou van Lion II afgehandel is, beteken die maatskappy sal in staat wees om in die toekoms bestendige voorbelaste verdienstes te lewer.

Vrye kontantvloei van R400 miljoen word van die 2018-boekjaar tot die 2022-boekjaar voorspel. “Die bestuur het voorheen op die moontlikheid van ’n spesiale dividend of terugkoop van aandele gesinspeel as ’n bykomende manier om aan aandeelhouers kontant terug te gee,” sê ’n bank wat nie toegelaat word om met die media te praat nie.

“Uit onlangse interaksie met beleggers merk ons dat die moontlikheid van ’n hoër uitkeerverhouding in die lig van bestendige sakeprestasie ’n belangrike oorweging in die saak vir ’n belegging in Merafe is."

Meer oor:  Petra Diamonds  |  Finweek  |  Diamante  |  Mynwese
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.