Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Plaaslike aandele klop buitelandse portuurgenote
23 April 2021
Foto: Shutterstock

Die eerste kwartaal van vanjaar tot 31 Maart het met algemene sterk opbrengste geëindig, met die FTSE/JSE se top-40-indeks byna 12% hoër. (Alle dividenduitkerings word in hierdie artikel uitgesluit.)

Dit was ’n fantastiese begin van die jaar vir beleggers. Die plaaslike aandelemark se opbrengs is grootliks aangedryf deur die FTSE/JSE se Resi 10-indeks (wat die tien grootste hulpbronaandele naspoor), wat met byna 16% gestyg het. Die FTSE/JSE se Indi 25-indeks (wat die 25 grootste nywerheidsaandele naspoor) het met 11,7% gestyg, grootliks aangehelp deur Naspers*, wat met byna 17% gestyg het.

Dis noemenswaardig dat Prosus (wat die Tencent-belang hou) slegs met meer as 2% gestyg het, terwyl Tencent, wat in Hongkong genoteer is, met 6,5% gestyg het. Hier is twee interessante tendense.

Eerstens het Naspers die waardasiegaping tussen Prosus en Tencent deels verklein. Wat interessanter is, is dat toe Prosus in Oktober 2019 uit Naspers ontknoop is, Naspers-beleggers die keuse gehad het om hul aandele te behou of die Prosus-aandele, wat op die JSE en in Amsterdam genoteer is, op te neem.

Die meeste beleggers met wie ek gepraat het, het Prosus gekies omdat hulle gemeen het die aandeel sou beter vaar omdat dit in die buiteland is. Vanjaar het dit nie.

Prosus het sedert sy notering met sowat 64% gestyg terwyl Naspers met byna 73% gestyg het. Dis nie geweldig beter nie, maar tog beter. Dis ’n voorbeeld van ’n plaaslike aandeel wat ’n buitelandse portuurgenoot oortref het. Dit het ook met die S&P500 gebeur wat sover vanjaar met net 5,5% gestyg het. Die plaaslike top-40 het dit ver oortref.

Die eerste kwartaal was selfs nog moeiliker vir die tegnologieoorheersde Nasdaq, wat met net 1,6% gestyg het nadat dit die grootste gedeelte van Maart negatief teenoor die begin van die jaar was. Ek het al baie oor sulke omkerings geskryf. ’n Mens kan maklik dink dat buitelandse aandele beter as plaaslike aandele en buitelandse tegnologie selfs nog beter as algemene buitelandse aandele sal vaar.

Die FTSE/JSE se indeks middelkapitalisasie-indeks het die jaar goed begin deur met 8.5% te styg. Ek verwag dat dié tendens sal voortduur.

Die probleem is dat daar die afgelope dekade reuseopbrengste by buitelandse aandele en selfs meer by die tegnologiegelaaide Nasdaq was. Dié geweldige buitengewone prestasie kan geensins vir altyd aanhou nie. Vroeër of later sal daar na die gemiddelde teruggekeer word – en daarvoor sal die buitelandse en tegnologieaandele in ’n stadium beskeie opbrengste van lae enkelsyfers moet begin oplewer. Is dit dalk die begin?

Een kwartaal se datastel is beswaarlik genoeg om my teorie te bevestig, maar dit verbaas my nie en ek verwag dat dit die grootste deel van die dekade sal voortduur. Ek laat vaar nie buitelandse aandele nie, maar belê vir eers meer in plaaslike aandele om die verwagte omswaai te benut. Nadere ondersoek van die JSE se subindekse toon dat die banke (deur die FTSE/JSE se Fini 15-indeks) slegs ’n opbrengs van 1,5% behaal het en goedkoop bly. Die vraag is wat hulle sal laat styg.

Die ekonomie bly onder druk en die monetêrebeleidskomitee verwag nou dat die bruto binnelandse produk in die eerste kwartaal met 0,2% gekrimp het. Dit bied min verligting vir banke. Die FTSE/JSE se middelkapitalisasie- indeks het die jaar goed begin deur met 8,5% te styg. Ek verwag dat dié tendens sal voortduur.

Dis veral die geval met die kleinkapitalisasie-indeks, waar baie hoëgehalte-maatskappye jare lank verwaarloos is. Danksy behoorlike resultate het sommige van die kleinkapitalisasie-aandele sterk gestyg, byvoorbeeld PPC, wat sedert sy laagtepunt in November verlede jaar met meer as 400% gestyg het. Eiendom bly bedruk, maar het in die eerste kwartaal met 4,5% gestyg.

Daar is waarde, veral in logistiek en in ’n mate sekere kleinhandel. Verhuurders van kantoorspasie moet egter bepaal wat werk-by-die-huis sal behels nadat Suid-Afrikaners ingeënt is. Dis noemenswaardig dat die rand in die kwartaal letterlik net ’n paar sent teruggesak het. Goud het 10% verloor ná ’n uitstekende 2020, toe dit tipies met die onsekerheid weens die pandemie gestyg het. Namate die wêreld inentings kry, neem goud se rol egter af, en ek verwag verdere swakheid.

* Stuur 'n boodskap aan terugvoer@finweek.co.za

* finweek is ’n publikasie van Media24, ’n filiaal van Naspers.


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.