Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Prysvergelykings maak aanlyn inkope deursigtiger
21 Maart 2019

Kevin Tucker het PriceCheck in 2006 begin, dit in 2010 aan Naspers* verkoop en in 2015 teruggekoop.

Kevin Tucker, stigter van PriceCheck

Vandag lys PriceCheck meer as agt miljoen produkte van sowat 800 handelaars en blaai meer as 2,3 miljoen gereelde besoekers elke maand op sy webwerf rond. Tucker het met finweek oor sy reis met dié maatskappy gesels.

Wat het jy gedoen voordat jy PriceCheck begin het?

Ná my graad in rekenaarwetenskap aan die Universiteit van Kaapstad is ek twee jaar lank vir ’n werksvakansie Engeland toe om ervaring op te doen.

Ek het byna ’n jaar lank tydelik hier en daar gewerk, totdat ek later by Totally PLC, ’n webontwikkelingsmaatskappy, as ’n webontwikkelaar aangestel is.

Gedurende my tydjie in Londen het ek ’n aanlyn veilingsplatform ontwikkel waar mense moes betaal om te bie om verkoopspryse laag te hou. Ek het die platform ná ’n jaar en ’n half aan ’n Europese maatskappy verkoop.

Waar het jy die idee vir PriceCheck gekry?

Ek het in Londen baie dinge aanlyn gekoop, maar terug in Suid-Afrika het ek ontdek daar is nie webwerwe waar ek pryse kon sien of vergelyk, soos dié wat ek oorsee gebruik het om met koopbesluite te help nie.

Waar het jy aanvangskapitaal gekry?

Ek het die eerste jaar self reggekom, die platform in my slaapkamer geskryf en dit in Junie 2006 sonder bemarking of groot ophef bekendgestel.

Die webwerf het Onno Staal, ’n Nederlandse belegger wat ’n soortgelyke platform in Nederland bedryf het, se aandag getrek en ons het in 2007 ’n 50-50-vennootskap aangegaan. Die transaksie het kontant losgemaak om in die maatskappy se groei te belê.

Wat was aanvanklik jou grootste uitdagings?

Dit was moeilik om inkomste uit die platform te verdien, aangesien die gedagte van “betaal per kliek” nog nie ontwikkel was nie.

Ons het die meeste van ons inkomste gegenereer uit kommissie op verkope wat ons verwys het, veral na Kalahari.net. Hoekom het jy die maatskappy in 2010 aan Naspers verkoop?

Die omset het elke maand wesenlik toegeneem en ek het pas 30 geword en wou ’n bietjie meer van die “goeie lewe” ervaar.

Dit was vir albei partye ’n voordelige transaksie. Die omset het elke maand wesenlik toegeneem en ek het pas 30 geword en wou ’n bietjie meer van die “goeie lewe” ervaar.

Ek het nog tien maande aangebly en in dié tyd baie geleer, maar daarna besluit om ’n blaaskans weg van die korporatiewe lewe af te neem. Naspers het my egter oorreed om te bly en aan ’n verkoopsplatform baie soos Groupon te werk, maar na nog sewe maande het die afdeling toegemaak.

Hoekom het jy PriceCheck in 2015 teruggekoop?

Ek het gerugte gehoor dat Naspers dit oorweeg om PriceCheck toe te maak. Teen daardie tyd het ek al ’n ander platform genaamd Shoppingfeeder ontwikkel wat handelaars en maatskappye toelaat om hul produkte en dienste wêreldwyd op prysvergelykingswebwerwe te lys, en ek het besef hoeveel waarde PriceCheck by dié webwerf kon voeg.

Ek het Manuel Koser van Silvertree Internet Holdings genader vir finansiële steun. Dit het agt maande se onderhandeling gekos voordat Naspers ingestem het om PriceCheck te verkoop, en Silvertree Internet Holdings was daarna die meerderheidsaandeelhouer in PriceCheck.

In watter toestand was die maatskappy met jou terugkoop daarvan?

Naspers het nogal baie geld aan die uitbou van die handelsmerk bestee, wat heelwat handelsmerkaffiniteit gebring het. Die platform het nogtans teen ’n verlies gefunksioneer en ons moes herstruktureer om weer op dreef te kom.

Die koste om die webwerf te huisves was ver bokant markprys, te veel geld is aan bemarking uitgegee eerder as om doeltreffendheid te verbeter, en te veel saamryers het gratis uit die diens voordeel getrek.

Julle moes ook mense aflê, so die personeel se moreel was seker taamlik laag?

Toe ons die maatskappy aan Naspers verkoop het, het PriceCheck net vier werknemers gehad. Met die terugkoop, het dit op 40 gestaan en ons het dit tot 15 verminder.

Dit was ’n moeilike tyd, maar mense is vrywillig weg toe ons vir hulle wys in watter swak finansiële toestand die maatskappy is. Hulle het die keuse gehad om die skip te verlaat terwyl hulle nog ’n paar maande lank vergoed kon word, en terwyl ’n veilige landing later miskien nie meer moontlik sou wees nie.

Toe ons die maatskappy aan Naspers verkoop het, het PriceCheck net vier werknemers gehad. Met die terugkoop, het dit op 40 gestaan en ons het dit tot 15 verminder.

Die personeel se moreel het verbeter toe die maatskappy kort daarna begin geld maak en hulle kon sien ons volg ’n beter trajek. Eintlik het dit baie gou gebeur, want ons moes vir ons eerste Swart Vrydag-veldtog voorberei, wat sowat drie weke ná die oorname sou wees.

Dit het ook gehelp dat ek ’n gevestigde belang het by die maatskappy se sukses. Dit is baie beter as om vir ’n groot multinasionale maatskappy te werk waar die onderneming in sy geheel nie regtig beïnvloed word as ’n afdeling toemaak nie. Ons personeel het sedertdien weer tot 35 toegeneem.

Hoe sal jy jou bestuurstyl beskryf?

Met geen formele sakebestuursopleiding nie, is my benadering om dinge eenvoudig te hou, te doen wat gedoen moet word en deur my voorbeeld te lei.

Hoe voel jy oor fleksietyd?

Ons beleid oor fleksietyd het verander, want ek het begin besef hoe lank mense in die verkeer sit. Werksure is nou enige tyd tussen 07:00 en 18:00, solank almal tussen 10:00 en 15:00 op kantoor is.

Mense word toegelaat om een dag ’n week tuis te werk solank hulle dit vooraf gereël het, en ons het twee ontwikkelaars wat op hul eie werk.

Ek hou van die byvoordele van fleksietyd: Eerstens verbeter dit mense se sin van verantwoordelikheid, maar dit gee hulle ook ’n geleentheid om in voeling te kom met als wat rondom hulle gebeur. ’n Mens kry nie dié blootstelling as jy heeldag op kantoor sit nie.

Naspers het die maatskappy in Nigerië uitgebrei. Wat het daarvan geword?

Naspers het die Nigeriese mark rondom 2014 in vennootskap met MTN betree, toe Nigerië se ekonomie geblom het. Kort daarna het die olieprys ineengestort, wat e-handel en handel geknou het. Ons kan nog baie in Suid-Afrika groei, dus dink ons voorlopig nie verder aan uitbreiding in Nigerië nie.

Hoe is die mededinging in die mark?

Omdat ons die enigste aanlynplatform is wat prysvergelykings bied, het ons nie regstreekse mededinging nie, maar ironies genoeg ding ons indirek mee met Google, deur wie ons die meeste van ons webblaaiers genereer, en party van die handelaars wie se produkte ons lys. Wat ons uniek maak, is dat ons heeltemal onafhanklik is.

Hoe lyk jul bemarkingstrategie nou?

Ons gebruik hoofsaaklik Google Ads, e-pos en sosiale media, en ander bemarkingshulpmiddels soos Criteo, maar vir groot veldtogte sal ons ook radioreklame doen, soos met Swart Vrydag.

Hoe het die diensaanbod verander sedert jy PriceCheck begin het?

Eers het ons net prysvergelykings volgens handelaars se lyste gedoen, maar nou gee ons op grond van masjienleer ook aanbevelings oor aankope en resenseer produkte. Die oorhoofse doelwit is steeds om kopers te help om beter koopbesluite te neem.

Wie is jou grootste inspirasie?

Ek het nog nooit regtig ’n held of mentor in die sakewêreld gehad nie, maar ek hou van stories oor mense soos Elon Musk, wat groot sukses behaal het deur enorme risiko’s aan te gaan om ’n maatskappy te begin op niks meer as ’n ingewing nie. Die ding is dat soveel van die dinge wat die mark binnekom, veral aan die digitale kant, só nuut is dat dit byna onmoontlik is om die markpotensiaal te beoordeel.

Wat was van die grootste lesse wat jy sover geleer het?

Uit my oorspronklike vennootskap: moet nooit ’n 50-50-vennootskap aangaan nie. Dit het te veel dooie punte meegebring wat die onderneming lamgelê en ons vriendskap mettertyd versuur het. Uit my transaksies met Naspers: moet nooit suinig wees met goeie regshulp nie, veral nie wanneer jy as ’n amateur maatskappy te doen kry met ’n groot multinasionale maatskappy nie.

Dit is baie moeilik om op te hou mikrobestuur as jy van die staanspoor als vir ’n maatskappy gedoen het. As jy nie ophou nie, beïnvloed dit op die duur die maatskappy én jou eie welstand negatief.

Oor die afgelope twee jaar het ek geleer om ander nie met slegs die klein goedjies te vertrou nie, maar ook met belangrike aspekte van die onderneming.

Dit is baie moeilik om op te hou mikrobestuur as jy van die staanspoor als vir ’n maatskappy gedoen het. As jy nie ophou nie, beïnvloed dit op die duur die maatskappy én jou eie welstand negatief.

Wat is tans jul grootste uitdaging?

Om te bly groei. Ons sal dié uitdaging pak deur na die grondbeginsels terug te keer en soektogte doeltreffender en produkinhoud beter te maak.

Wat is jul toekomsplanne?

Met dié dat verbeterings in kunsmatige intelligensie maatskappye nou toelaat om binne maande te doen wat andersins jare sou neem, is dit baie moeilik om te voorspel waarheen die mark gaan.

As Amazon byvoorbeeld die plaaslike mark betree, sal dit ’n algehele ontwrigting in e-handel meebring, want kopers sal dan toegang hê tot ’n veel groter verskeidenheid van produkte sonder die koste om die produkte van oorsee af deur Amazon te koop. My doelwit is voorlopig om relevant te bly deur uitnemende dienslewering.

Het jy enige raad vir ander, ambisieuse entrepreneurs?

As jy voel jy het iets beet, veral met digitale innovering, doen iets daarmee. Moenie dit tot lamwordens toe ontleed nie – waag die sprong voordat iemand anders dit doen.

Meer oor:  Pricecheck  |  Produkte  |  Prysvergelykings  |  Finweek
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.