Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Relatiwiteit in die beleggings-wêreld
10 September 2021

Relatiwiteit is in die beleggingswêreld net so belangrik as wat dit in die regte wêreld is. Kom ons gebruik die Covid-19-pandemie as ’n voorbeeld: Suid-Afrika en Italië het albei ’n bevolking van sowat 60 miljoen mense.

Ons weet Italië was een van die lande wat aan die begin van die pandemie die swaarste getref is en tot aan die einde van 2020 gemiddeld 185 mense per dag weens Covid-19 aan die dood afgestaan het.

Suid-Afrika is ewe hard getref, maar het relatief minder mense weens Covid-19 verloor, met gemiddeld 100 sterftes per dag tot einde 2020. Italië was vanjaar egter suksesvoller met sy inentingsprogram en tot en met 16 Augustus 2021 (luidens die WGO) was 31,4 miljoen van sy mense volledig ingeënt.

SA was relatief stadiger met die uitrol van sy inentingsprogram en in dieselfde tydperk is hier slegs 3,7 miljoen mense volledig ingeënt. Terwyl Italië se Covid-19-verwante sterftes van gemiddeld 181 per dag aan die begin van vanjaar tot 47 per dag oor die afgelope drie maande afgeneem het, het SA se sterftesyfer tot gemiddeld 215 per dag vir die hele 2021 tot dusver toegeneem, met dié syfer wat nou verder styg tot gemiddeld 239 per dag oor die afgelope drie maande.

Dit is dus duidelik dat die tweede en derde golf SA swaarder getref het as wat Italië getref is, en ek wil aanvoer dat dit grootliks aan Italië se suksesvolle inentingsprogram te danke is. Ek weet dat veranderlikes soos seisoene, mutasies van die virus en demografiese faktore dié syfers sal beïnvloed, maar dit wys net hoekom die relatiwiteitsbeginsel (en die groter prentjie) so belangrik is wanneer vergelykings getref word. Dieselfde relatiwiteitsbeginsels kan in die beleggingswêreld gebruik word, waar dit ewe maklik toepasbaar is.

Dit kan gebruik word om vir jou meer te sê oor waar ons staan wat die mark betref, en al is dit meesal op historiese data gegrond, kan dit jou ook sê hoe goedkoop of duur ’n bepaalde aandeel, geldeenheid, kommoditeit, effek of sektor relatief tot ’n ander is. Studies toon dat meer as 90% van goeie langtermyn-beleggingsresultate danksy behoorlike batetoewysing behaal word, en slegs 10% danksy goeie tydsberekening in ’n sektor en mark.

’n Gebalanseerde portefeulje kan in vyf hoofbateklasse verdeel word: die geldmark, plaaslike effekte, eiendomsaandele, plaaslike aandele en buitelandse beleggings. Om dinge te vergemaklik deel ek 60% van die buitelandse belegging aan ’n indeks van wêreldaandele en 40% aan ’n indeks van wêreldstaatseffekte toe.

Diversifikasie bly ’n belegger se beste beskerming teen risiko en daarom is dit so belangrik om nie op net een van dié bateklasse te fokus nie. Al vyf hierdie bateklasse het ’n geskiedenis van historiese opbrengste. Deur die opbrengste met mekaar te vergelyk, kan jy ’n goeie aanduiding kry van hoe duur of goedkoop hulle vergeleke met mekaar is. As ons aandele as voorbeeld gebruik, sien jy dié bateklas se historiese gemiddelde verdiensteopbrengs (oor die afgelope 15 jaar) verhandel op 93% (0,93 keer) vergeleke met die gemiddelde verdienste van die ander vier bateklasse (geldmark, eiendomsaandele, plaaslike effekte en buitelandse beleggings).

Teen die huidige verhouding van 155% wys dit ons dat plaaslike aandeleopbrengste nog taamlik goedkoop verhandel vergeleke met die ander bateklasse, en dat dit nie die afgelope 15 jaar so relatief goedkoop was nie. Dit sluit natuurlik die regstelling van 2008 in. Nou beteken dit nie jy moet al jou kapitaal in dié een bateklas belê nie, maar eerder dat jy versigtig moet wees om dié bateklas nie heeltemal weg te laat uit jou portefeulje nie.

Ná die rentekoersverlagings van die afgelope byna twee jaar, bied die geldmark relatief min waarde. Buitelandse beleggings, veral in ontwikkelde lande, was ’n goeie plek om te wees die afgelope paar jaar.

Maar omdat hierdie model hoofsaaklik na relatiewe opbrengste kyk, wil ek beleggers waarsku om buitelandse beleggings met groot omsigtigheid te benader, eenvoudig omdat hierdie model nie regtig na valuta kyk nie.

Die relatiwiteitsaanwyser sê vir ons dié bateklas bied nou relatief minder waarde en dit kan beteken jy behoort dit te oorweeg om te herbalanseer om te verseker jy bly binne die perke van jou persoonlike risikoprofiel. Die relatiwiteitsaanwyser wys vir ons jy moet steeds versigtig wees wanneer jy dit oorweeg om in die SA eiendomsektor te belê.

Schalk Louw is ’n welvaartbestuurder by PSG Wealth Old Oak.

Die SA effektesektor lyk dieselfde as SA aandele – baie aantreklik. Dit is hoofsaaklik weens SA se afgradering na rommelstatus verlede jaar. Ten slotte: ons beleggingsomgewing bly vol uitdagings. Jy kan egter jou eie portefeulje bestuur mits jy eerstens op behoorlike diversifikasie let en tweedens oorgewigposisies beperk in bates wat min waarde bied relatief tot ander.

* terugvoer@finweek.co.za

* Schalk Louw is ’n welvaartbestuurder by PSG Wealth Old Oak

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.