Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon Brown se aandele-wenke
7 Februarie 2019

Kleinhandelsyfers

Dit lyk nie sterk nie

Vanjaar het goed afgeskop met sterk November-kleinhandelsverkope, wat 3,1% hoër was, terwyl die konsensusverwagting 2% was. Maar toe het die kleinhandelaars se handelsverslae begin inkom, met die einde van enige hoop vir ’n sterk verbruiker.

Ons sal moet wag vir die Desember-kleinhandelsverkope, maar dit lyk asof baie Desember-vakansie-inkopies na November se Swart Vrydag-aanbiedings geskuif het.

Kleinhandelsektor

TFG kry dit reg

Die kleinhandel se handelsverslae was swak, veral Massmart. Die voorloper was TFG met sterk vergelykbare winkelgroei oor al sy afdelings. Teen ’n prys-verdienste-verhouding (p/v) van minder as 15 maal is TFG ook een van die goedkoopste in die sektor.

Die vraag is hoe TFG dit regkry, terwyl ander klerekleinhandelaars soos Mr Price, Truworths en Woolworths* swaarkry. Die antwoord moet die bestuur wees.

Maar is dit geluk of vaardigheid? Klere is moeilik omdat aankopers moet seker maak hulle het die regte voorraad teen die regte prys. Bestellings word lank vooruit gedoen; as jy dit verkeerd kry, is jy in die pekel. Dan is verbruiker boonop onder druk. Maar TFG kry dit gereeld reg. Geluk speel waarskynlik wel ’n rol, maar vaardigheid ook. Mr Price het dit vroeër ook reggekry, maar nie meer in die laaste paar jaar nie.

Coronation

Nog aantreklik

Coronation* se bates onder bestuur (BOB) vir die einde van verlede jaar is bygewerk en die totaal is nou R550 miljard, ’n syfer wat aansienlik laer is as die R587 miljard aan die einde van die derde kwartaal.

Dit verteenwoordig ’n daling van 7%, terwyl die indeks gedurende die tydperk ongeveer 5% laer was. Uitvloei het dus gedurende die tydperk met die helfte gedaal (die vorige uitvloei was sowat R30 miljard, en vir die derde kwartaal is dit laer as R15 miljard).

Indien wesensverdienste per aandeel (WVPA) met 20% daal (en dit is meer as wat ek verwag), plaas dit die aandeel op ’n dividendopbrengs van 8% en ’n prys-verdienste-verhouding (p/v-verhouding) van ongeveer 12 maal. Dit is aantreklik; en as dit die uitvloei kan stopsit en BOB en winste kan verhoog, sal Coronation vanjaar vir my steeds een van die gunstelinge onder die plaaslike aandele wees.

AVI

Verwag nog moeilike tye vir Tiger Brands

AVI is een van die bes bestuurde plaaslike voedselvervaardigers. In ’n onlangse handelsverslag vir die ses maande tot Desember verlede jaar, het die maatskappy gesê hy verwag plat inkomste en laer verkope. Hy het sy marges beskerm, maar die WVPA sal steeds 6% tot 7% laer wees.

Dit kan ook ’n aanduiding wees dat ons ’n stel baie moeilike resultate vir Tiger Brands moet verwag. Die listeriose-krisis van verlede jaar het deur-gewerk en benadeel die resultate nie meer nie (Tiger Brands se volgende resultate is vir die ses maande tot einde Maart), maar die marges was nie so sterk nie, en hulle sal onder druk bly.

Avior Capital Markets

Vereis stygende markte

Avior Capital Markets is ’n klein genoteerde aandelemakelaar (met markkapitalisasie van minder as R100 miljoen), en omtrent niemand dek hom nie. Maar die resultate vir die ses maande tot einde Oktober (hul resultate is baie laat ingelewer) toon dat inkomste 22% laer is en dat WVPA en wins ’n verlies toon.

Dit is ’n moeilike tyd vir aandelemakelaars omdat volumes stadig opgedroog het, aangesien markte verlede jaar gedaal het. Dié soort saak vereis stygende markte om beleggersvertroue te inspireer (wat meer transaksies en natuurlik groter BOB beteken, en daarom hoër gelde).

Die redenasie geld ook vir batebestuurders en versekeraars wat hul groot “los kontant” in die aandelemark belê. Wanneer markte begin styg, sal hulle almal beter inkomste verdien, en as hulle hul koste onder beheer kan hou, kan winste aansienlik styg. Maar eers het ons stygende markte nodig.

MultiChoice

Ontknoping van aandele is aanloklik

Naspers** het die besonderhede van die MultiChoice-ontknoping aangekondig – die notering vind einde Februarie plaas. Naspers-N-aandeelhouers sal een MultiChoice-aandeel kry vir elke Naspers-N-aandeel wat hulle besit. Die belang van die bemagtigingskema (Phuthuma Nathi) sal van 20% tot 25% styg.

In dié uitgawe bespreek ek ’n paar van die risiko’s wat MultiChoice moet hanteer (dit sluit in sportregte en prysbepalingsmag). Die onbestendigheid van die verdienste was vir my ’n verrassing. Ek vermoed die wisselvalligheid is deels te danke aan valuta-bewegings in die res van die vasteland, asook die feit dat baie inhoud in dollar gekoop word en in rand, of in die geldeenhede van ander lande op die vasteland, verkoop word.

Veranderings in die wisselkoers van die dollar is dus baie belangrik vir MultiChoice se verdiensteprofiel. Ek vermoed ook dat baie mense wat MultiChoice-aandele ontvang dié aandele dadelik weer sal verkoop, omdat hulle Naspers vir die Tencent-diskonto besit.

Dit sal tot prysswakheid lei, iets wat die aandeel ’n aantreklike koop kan maak. ’n Dividend van R2,5 miljard word vir volgende jaar voorgestel, wat uitwerk op ’n dividend van sowat 400 sent per aandeel.

’n Waardasie vir ’n volwasse onderneming soos dié wys dat ’n dividendopbrengs van sowat 6% behoorlik is. Ek sal belang stel in ’n aandeelprys van 6 500 sent; as hy teen ’n laer prys as dit verhandel, sal ek koop.

JSE

Denoterings bly in 2019

’n Tendens vanjaar is die denotering van aandele, veral middel- en kleinkapitalisasieaandele. Verimark is een van die eerstes in middel Februarie, met die goedkeuring van sy denotering teen 150 sent, en daarna Clover.

Aandeelhouers kan teen ’n denotering stem, maar as dit goedgekeur word, sal ek nie ongenoteerde aandele koop nie. Hulle het nare likiditeit, en dikwels verdwyn korporatiewe bestuur vinnig as toesig deur die JSE nie meer geld nie.

Shoprite Holdings

Wag maar liefs vir die resultate

Shoprite* sukkel steeds met hiperinflasie in Angola, sowel as swakker geldeenhede oor die res van die vasteland heen. Vroeër in Januarie het hy ’n bedryfsverslag vir die 26 weke tot Desember verlede jaar uitgegereik. Shoprite het ’n goeie Desember beleef, maar het steeds gesukkel, omdat sy interne voedselinflasie vir Suid-Afrika ’n baie lae 0,2% was.

Die probleem is dat koste toegeneem het, maar sonder inflasiestyginkomste. Die Gauteng-verspreidingsentrum se probleme val in dié tydperk, maar dit is eenmalig en verspreiding is nou weer normaal.

Dit sal dus nie die komende jaar beïnvloed nie. Ek was van mening dat al hierdie dinge bestuur kon word, en was gemaklik daarmee om oor die langer termyn vas te hou aan die aandeel. Maar ’n handelsverklaring aan die einde van Januarie dui aan dat WVPA met tussen 19% en 39% gedaal het (die daling word vererger wanneer die impak van hiperinflasie in Angola ingesluit word). Ek hou steeds die aandeel, maar ek wag vir die resultate voordat ek verder byvoeg.

Woolworths

Klereafdeling stel weer teleur

Volgens ’n handelsverslag vir die ses maande tot 23 Desember was Woolworths* se plaaslike klere-afdeling weer teleurstellend. Australië het verbeter, maar David Jones het ’n beskeie 1%-verhoging in verkope ervaar. Woolies sê egter daar was beter verkoopsgroei in die laaste kwartaal van verlede jaar.

Hy sê ook daar was laer verkoopsgroei weens kleiner winteruitverkopings. Die kleiner winterverkoopsvoorraad is eienaardig omdat Woolies ook swak verkope in die vorige tydperk aangemeld het. Ek weet dus nie waarom hulle minder verkoopsvoorraad sou hê nie. Voedsel bly die een sterk punt vir die groep.

Vergelykbare winkelverkope het met 4,2% gestyg. Maar onthou dat prysbeweging (of inflasie) 1,2% was. En: Hulle het een minder sakedag gehad. Voedselinflasie sal na verwagting vanjaar styg weens hoër insetpryse (die mielie- en koringpryse styg, en as die droogte voortduur, sal hulle verder styg). Dit sal die voedselkleinhandel weer help.

Ascendis Health

’n Onsekere toekoms

Ascendis Health se meerderheidsaandeelhouer, Coast2Coast, verkoop steeds aandele teen ’n lening, en nou onderhandel die maatskappy ook om sy Remedica-onderneming te verkoop.

Die Ascendis-model was om duur aandele te gebruik om groot verkrygings te finansier. Hierdie model werk ’n tyd lank baie goed, maar as hy eers ophou werk, is dit moeilik om die sakemodel weer reg te stel. Hoewel die aandele goedkoop is, is die toekoms dus onseker, en ek sal wegbly.

* Stuur 'n boodskap na terugvoer@finweek.co.za

* Die skrywer besit aandele in Woolworths, Shoprite en Coronation.

** finweek is ’n publikasie van Media24, ’n filiaal van Naspers.

* Foto: Gallo Getty Images/Reuters

Meer oor:  Finweek  |  Aandele-Wenke  |  Simon Brown
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.