Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon Brown se aandelewenke
30 Augustus 2018

Esor wys werk is te min

Konstruksie

Konstruksie

Esor het aangesluit by ’n baie lang lys konstruksie-ondernemings wat in sakeredding betrokke is. Dié maatskappye is nou nog onder redding of reeds amptelik bankrot verklaar.

Met minder maatskappye wat nou sake doen, behoort dit in teorie vir die ander konstruksiemaatskappye makliker te wees omdat daar nou minder mededinging is. Maar ek vermoed die realiteit is dat daar nog te veel konstruksiefirmas is vir die hoeveelheid werk wat hier beskikbaar is.

En ons fokus op genoteerde konstruksie, maar daar is boonop ’n groot nie-genoteerde konstruksiesektor – die beste is om van dié sektor weg te bly.

Teleurstellende eerste verslag

Libstar

Libstar het in Mei met groot belofte teen 1 250 sent genoteer. Maar ek het nog nooit van die aandeel gehou nie en beskou hom as baie duur.

’n Slegte teken was die verkopers wat hulself ’n groot spesiale dividend voor die notering betaal het om hulle private- ekwiteitsbesigheid te probeer red (wat nou in elk geval ineengestort het). Die eerste handelsverslag is teleurstellend, met wesensverdienste per aandeel (WVPA) wat na verwagting tussen 44% en 56% laer sal wees.

Die skuld word geplaas op ’n ooraanbod van vars sampioene, maar ’n diverse maatskappy behoort nie probleme te ervaar as daar ’n ooraanbod in een bedryfsegment is nie.

Wag eers vir ’n herstel in die ekonomie

Southern Ocean

Eurolux

Southern Ocean Holdings se resultate toon dat hy steeds geld verloor op Radiant (sy elektrisiteits- en ligonderneming). Ná die resultate is daar bevestig dat ARB Holdings die besigheid gaan koop teen ’n prys van sy tasbare netto batewaarde plus R20 miljoen, maar nie meer as R117 miljoen nie.

ARB het met sy vorige resultate kontant van R259 miljoen gehad. Hoewel Southern Ocean gelukkig sal wees om ontslae te raak van ’n verliesmakersaak en kontant daarvoor te kry, is die wenner ARB Holdings, aangesien hy ’n waardevolle bate teen ’n goeie prys kry.

Boonop behoort hy dit ’n winsgewende onderneming te maak wanneer hy dit saamsmelt met sy Eurolux-saak. ARB se aandeelprys was oor die afgelope drie jaar baie eenvormig, afgesien van dividendbetalings. Hoewel hy dus ’n goeie maatskappy is, bly die bedryf waarin hy werk taai. Gevolglik sal ek nie belê voordat ons ’n sterk herstel in die breër ekonomie sien nie.

Lastige naamsverandering

ABSA

Absa Bank-groep se resultate het genormaliseerde WVPA getoon wat sowat 3% beter was ná die koste van die skeiding van Barclays verwyder is, asook die koste van die oorskakeling van die IAS39- tot die IFRS 9- rekeningkundige standaarde.

Leningswaardedalings bly laag, maar die koste-tot-inkomste-verhouding is in die hoë 50’s (afhangende van watter syfers jy gebruik) en bly hoog. Plaaslik sukkel banke om enige werklike groei te behaal, en die res van die vasteland gaan die slagveld wees vir ware groei.

Hier het Absa goeie bates, maar ná Barclays moet hy sy handelsmerk hernieu, en dit kan veroorsaak dat Absa op kort termyn sukkel en Standard Bank laat as die leier in bankwese in die res van Afrika

Beskeie groei

NEDBANK

Nedbank se resultate het groei getoon wat ná sy Oos-Afrika-onderneming na wins terugkeer. Afgesien daarvan was dit maar weer baie beskeie enkelsyfergroei met ’n hoë koste-tot-inkomste-verhouding. Die probleem wat Nedbank het, is dat hy ’n minderheidsvennoot is in sy ambisies in die res van Afrika.

Na my mening is Nedbank dus nie ’n ernstige deelnemer in die res van die vasteland nie, wat hom agter ander soos Absa en Standard Bank plaas. Albei het volfiliale in Afrika.

Steeds swak

MTN

MTN se tussentydse resultate was swak, met WVPA wat tot 215 sent van 231 sent in die vorige tydperk daal. Maar selfs as ons al die eenmalige kwessies (die Nigeriese boete, hiperinflasie en buitelandsevalutaverliese) in ag neem, sou die WVPA slegs 280 sent gewees het.

Verdubbel dit vir die volle jaar, en ’n WVPA van 560 sent is beskeie vir ’n aandeel wat teen sowat R100 verhandel. Ek hou lank nie van die sektor, en veral van MTN, nie. En ek hou steeds nie hulle nie.

Sal koppe rol?

Famous Brands

Famous Brands* het ’n swak handelsverslag uitgereik wat aandui dat die Britse biefburgeronderneming steeds sukkel (verlies van meer as R1,5 miljoen per week), en toe het hy ’n omsigtigheidsaankondiging uitgereik oor oorwegings van strategiese opsies rakende ’n filiaal.

Dit lyk vir my hulle wil ontslae raak van die Britse Gourmet Burger Kitchen-besigheid. Dit sal waarskynlik teen ’n groot verlies wees. Dit sal beslis die regte ding wees – en vroeër eerder as later. Maar, aangesien dit waarskynlik teen ’n aansienlike verlies sal wees, is my vraag of koppe gaan rol?

Aandeelhouers het groot verliese gely weens hierdie ondeurdagte onderneming in die Verenigde Koninkryk, en uitvoerende bestuurders kan nie sommer ongedeerd daarvan afkom nie.

Aandeelhouers het groot verliese gely weens hierdie ondeurdagte onderneming in die Verenigde Koninkryk, en uitvoerende bestuurders kan nie sommer ongedeerd daarvan afkom nie.

Verbruikers koop minder

Tiger Brands

Tiger Brands

Tiger Brands verwag dat WVPA vir voljaar tussen 22% en 37% laer sal wees. Die aandeelprys verhandel tans meer as 40% onder die Januarie-hoogtepunte van amper R480 voor die listeriose-krisis. Die probleem hier is die verbruikersvraag na hul handelsmerkprodukte, want ek vermoed baie verbruikers koop tans goedkoper produkte.

Die swak verdienstes is vererger deur die terugroepingskoste vroeër vanjaar van produkte wat met die listeriose- uitbraak verband kon hou. Tiger Brands staar steeds die listeriose-groepsgeding in die gesig. Terwyl die maatskappy verseker is, bly dit maar ’n risiko.

Geen haas om te koop

City Lodge

City Lodge se hotel in Waterfall City.

City Lodge* se jaarresultate was swak, met besettings 59% laer weens korter reise deur sy hoofsaaklik sakekliënte. Dit is heelwat laer as die 63%-besetting vir die ooreenstemmende tyd verlede jaar. Dit is teleurstellend, maar nie onverwags nie.

Ek hou egter vas aan hulle, omdat hulle ’n vroeë begunstigde sal wees van enige verbetering in verbruikersvertroue wat nou miskien ligjare ver weg verwyderd is, maar mettertyd sal terugkeer. Die huidige prys van sowat R140 bied waarde volgens my metodologie, maar ek dink nie dit is nou nodig om te koop of by te voeg nie. Ek hou voorlopig vas aan wat ek het.

Die huidige prys van sowat R140 bied waarde volgens my metodologie

Bestuur van gehalte

Metair

Ek kyk dikwels na Metair. Dit is ’n goeie en eenvoudige onderneming wat voertuigbatterye voorsien, veral batterye vir kort afstande in Europa.

Maar sy onderneming in Turkye pla my. Tog toon onlangse resultate dat, hoewel Turkye beslis ’n uitdagende omgewing is, Metair nogtans goeie wins kan verdien, aangesien WVPA met 16% toegeneem het tesame met ’n 10%-styging in inkomste. Dit dui op gehaltebestuur, maar ook dat hoewel lande dikwels groot uitdagings ondervind, dit steeds moontlik is vir gehalteondernemings om ’n wins te maak.

Wag eers vir die resultate

Onelogix

Daar was ’n goeie handelsverslag van Onelogix, met die resultate wat aan die einde van Augustus verskyn (ná die vrystelling van dié finweek-uitgawe). Voertuigverkope is ’n groot aandrywer hier, en ons sien ’n baie beskeie opswaai in verkope, al is dit van ’n baie lae basis.

Hy het ’n minderheidsbelang in DriveRisk verkoop, wat meer kontant na sy balansstaat gebring het, en ons kon ’n meer aggressiewe aandeleterugkoop met die opbrengs van die verkoop gesien het. Maar ek sal wag om besonderhede van die resultate te sien voordat ek in die aandeel spring.

Ek wonder waarom dit drie maande duur ná die einde van die tydperk voordat die resultate verskyn. Vir ’n klein en eenvoudige saak lyk dit na ’n besonder lang tydperk.

In die knyp

Aveng

Nadat die spesiale oornamekomitee teen Murray & Roberts besluit het rakende sy voorgestelde oorname van Aveng, het Murray & Roberts aangekondig dat hy nie met die oorname voortgaan nie.

Dit plaas Aveng in ’n baie moeilike posisie, en met die aandeel wat met die skryf hiervan teen ongeveer 6 sent verhandel, lyk dit asof die mark besluit het dat Aveng onwaarskynlik op sy eie sal oorleef.

* Stuur 'n e-pos aan terugvoer@finweek.co.za 

* Die skrywer hou aandele in City Lodge en Famous Brands.

* Foto's: Gallo/ Getty Images, Shutterstock, www.eurolux.co.za

Meer oor:  Aandelewenke  |  Finweek  |  Beleggings  |  Simon Brown
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.