Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
13 September 2018

Groot verandering

Sasol

Sasol* se resultate vir die 12 maande tot Junie vanjaar verskaf die jongste inligting oor die Lake Charles Chemicals Project (LCCP) wat reeds 88% voltooi is en nog binne die opwaarts aangepaste begroting is.

Sasol beplan om die eerste drie vervaardigingseenhede in die tweede helfte van 2018 in bedryf te stel, en die res in die tweede helfte van 2019. LCCP is ’n groot verandering vir Sasol, met baie van sy skuld nou in Amerikaanse dollar en etaan wat nou ’n groot insetkoste verteenwoordig.

Die maatskappy het ook die verwagte interne opbrengskoers (IOK) vir die projek aangepas, met verskillende sienings wat ’n IOK van 5,2% tot 8,9% bied. Laasgenoemde is die maatskappy se hoër verwagting, en veronderstel ’n laer prys vir etaan van die Golf van Mexiko, en olie teen $60 tot $80 per vat. Dit is ’n groot projek vir Sasol en sal die maatskappy transformeer. My verwagtinge is positief, maar daar is steeds risiko’s omdat Sasol ’n prysnemer vir etaan én olie bly.

My verwagtinge is positief, maar daar is steeds risiko’s omdat Sasol ’n prysnemer vir etaan én olie bly.

Jy betaal vir kwaliteit

Bidcorp

Bid Corporation (Bidcorp) het sterk resultate vir die jaar tot einde Junie, met stygings van net meer as 9% in wesensverdienste per aandeel (WVPA), 12% in die dividend én sterk kontantgenerering.

Dis ’n gehaltemaatskappy teen ’n goeie prys, met die verwagte prys-tot-verdienste-verhouding (p/v) net onder 21 maal. Nie goedkoop nie, maar goeie gehalte. ’n Sterk rand hou risiko's vir plaaslike beleggers in. Dit kan verdienste demp.

Wag vir die stof om te gaan lê

Blue Label Telecoms

Cell C se kantoor by Waterfall Business Estate, Midrand.

Blue Label Telecom en Cell C (waarvan Blue Label 45% besit) se resultate het veroorsaak dat die mark Blue Label verkoop. Sy aandeelprys het ’n ongeëwenaarde laagtepunt van 678 sent bereik.

Daar is twee algemene menings oor die resultate. Dit is baie ingewikkeld – twee fondsbestuurders het vertel hulle sukkel om al die inligting te verwerk. Die grootste probleem is egter Cell C se skuld en sy toekomstige kapitaalvereistes. Dit maak die mark bekommerd dat Blue Label te duur vir Cell C betaal het.

Met dit in gedagte gaan die maatskappy waarskynlik ’n paar moeilike jare in die toekoms ervaar. ’n Pryssprong is waarskynlik, maar ek sal eerder wag vir die stof om te gaan lê voordat ek ’n posisie in hom opneem.

Verstandige sakebesluit

Long4Life

Long4Life* het aangekondig hy gaan nie voort met die verkryging van Rage Distribution nie. Ek was nooit ten gunste van die transaksie nie, aangesien dit duur lyk, en skoene is baie mededingend – veral met Tekkie Town-stigter Braam van Huyssteen wat ’n nuwe skoenonderneming begin.

Ek het gesê dat as jy Long4Life besit, moet jy Brian Joffe vertrou, en gelukkig het hy blykbaar saamgestem dat dit nie ’n goeie transaksie is nie. My vertroue was dus weldeurdag.

Steeds beste koshandelaar

Shoprite

Shoprite* se resultate het die eerste daling in wesensverdienste per aandeel (WVPA) in sowat 20 jaar getoon, met die verwaterde WVPA wat 3,8% laer is vir die jaar tot 1 Julie vanjaar.

Dit het gevolg ná baie moeilike handelstoestande, hiperinflasie in Angola en interne inflasie van slegs 0,5%. Dié lae interne inflasie maak seer, omdat Shoprite se eie koste soos sy personeel, verspreiding en huurgeld teen ’n hoër koers styg en dus druk op sy bedryfsmarges plaas.

Sy bedryfsmarge is egter steeds ’n indrukwekkende 5,5%. Ek besit die aandeel en koop steeds daarvan as die prys onder R220 is. Hoewel hierdie resultate nie uitstekend is nie, is Shoprite steeds die topvoedselhandelaar in die land, en ek is heeltemal tevrede om die aandeel te besit. Shoprite sal meer as sy mededingers baat wanneer toestande verbeter, veral met voedselinflasie wat beslis onderweg is.

Sy bedryfsmarge is steeds ’n indrukwekkende 5,5%.

Nie heeltemal in die kol nie

Woolworths

Woolworths se resultate vir die jaar tot 24 Junie vanjaar was omtrent so swak as wat ek verwag het. Plaaslik vaar kos goed genoeg, met dieselfde winkelverkope 4,8% hoër. Prysinflasie was 3,2%, met reële groei van 1,6%. Dit is beskeie, maar bevredigend in vergelyking met die res van die voedselkleinhandelaars.

Die probleme is David Jones in Australië en plaaslike klere. Bestuur aanvaar die blaam (hulle het te veel betaal vir David Jones en hulle het die mode verkeerd vertolk met plaaslike klere). Hulle het onderneem om dit reg te stel. Hoewel die oorbetaling vir David Jones ’n seer punt is, is die klere ’n bekommernis, want hulle kry dit herhaaldelik verkeerd. Ek hou die aandeel, en is tans tevrede met my posisie en sal derhalwe nie in die huidige omstandighede byvoeg nie.

Die probleme is David Jones in Australië en plaaslike klere.

’n Kans werd

Grindrod

Grindrod se tussentydse resultate vir die tydperk tot Junie vanjaar (nou sonder verskeping) toon netto batewaarde (NBW) van 1 257 sent sonder skuld, en ’n aandeelprys van net onder 900 sent. Dié NBW sluit in sowat R11 miljard kontant, met ’n markkapitalisasie van R6,5 miljard.

Gemeet hieraan lyk dit asof die aandeel teen ’n yslike afslag verhandel. Hoewel die verskepingdeel van die onderneming ’n probleem vir Grindrod was, sal verdienste ’n uitdaging bly.

Die aandeel verdien op sy huidige vlak ’n kans, terwyl ons wag vir die mark om sy potensiële waarde uit te werk. Ek sê potensiële waarde, want só ’n transaksie is dikwels ’n waardestrik, maar Grindrod het winsgewende bates in die res van Afrika wat hoofsaaklik op die logistiek van kommoditeite fokus.

Wag vir beter likiditeit

HomeChoice

HomeChoice het weer uitstekende resultate gepubliseer, met inkomste 16,1% hoër vir die ses maande tot Junie vanjaar. WVPA is 14,7% beter en die dividend het gestyg met 15,9%.

Die aandeel verhandel teen ’n p/v van net meer as 7 maal en ’n dividendopbrengs van net meer as 5%. Die probleem hier is likiditeit, met slegs 29 transaksies in Augustus en agt daarvan vir minder as 10 aandele. Om die aandeel te koop, is moeilik, en om daarvan ontslae te raak amper onmoontlik.

Daar is tans sowat R160 000 van die aandeel wat teen 4 000 sent aangebied word, meer as genoeg vir die meeste van ons. Daar is egter ’n koper vir minder as R20 000 teen 3 700 sent, en die volgende koper is op 2 042 sent. Die uiteinde is dat ’n koop hier inderdaad neerkom op die verkryging van ’n uiters illikiede private belang in die onderneming. Die maatskappy wil graag likiditeit verbeter, en ek sien reikhalsend uit daarna.

Sakemodel en vernuf moet oortuig

Advanced Health

Advanced Health het met groot gewag die mark betree, maar het sedertdien teleurgestel. Die sakemodel van daghospitale is wonderlik, maar die groot hospitaalgroepe veg terug.

Hoewel die inkomste styg, styg die koste van verkope ook, en die maatskappy ly ’n verlies van 14,12 sent per aandeel. Die maatskappy moet sy sakemodel en bestuurskundigheid bewys voordat hy die moeite werd is om te oorweeg.

Die maatskappy ly ’n verlies van 14,12c per aandeel.

Skole onder druk

ADvTech

ADvTech* se resultate vir die ses maande tot einde Junie vanjaar was beskeie en het weer die twee verskillende dele van die besigheid uitgelig. Die hoërprysskole bly onder druk, terwyl goedkoper tersiêre instellings steeds goed vaar.

Sommige mense stel voor dat die maatskappy in twee verdeel moet word, soos Curro met Stadio gedoen het, maar ek stem nie saam nie. Skole sal weer winsgewend word sodra verbruikersbesteding verbeter. Die probleem is dat ouers wat die druk voel, minder bestee. ADvTech se tersiêre aanbod bly goed geprys en in groot aanvraag.

Die voorkeur reit

Hyprop

Hyprop se portefeulje sluit in Canal Walk in Kaapstad.

Hyprop is al lank een van my voorkeur- eiendomsbeleggingstrusts (reits) met ’n gehalteportefeulje van plaaslike winkelsentrums en ’n mate van blootstelling aan Afrika suid van die Sahara en Suidoos-Europa.

Hyprop het onder moeilike omstandighede sy dividend vir die jaar tot einde Junie met 8,8% verhoog, met NBW per aandeel van R102,98 – wat omtrent is waarteen die aandeel verhandel – en met ’n dividendopbrengs van 7,4%. Plaaslike kleinhandelaars is onder druk en winkels sluit, veral groter kleinhandelaars.

Dit laat groot gapings. Totale leegstaansyfer is 1,9%, wat ’n baie goeie syfer is. Dit kan egter styg as ’n paar groot huurders die pad vat. Maar as jy ’n soliede reit soek met goeie blootstelling aan Suid-Afrikaanse besighede, is dit die een om ’n oog op te hou. Goeie bates en gehaltebestuur. ¦ terugvoer@finweek.co.za *Die skrywer besit aandele in Long4Life, ADvTech, Shoprite, Sasol en Woolworths.

Foto’s: www.waterfallcity.co.za en www.hyprop.co.za

Meer oor:  Finweek  |  Aandele-Mening  |  Simon Brown  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.