Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
7 November 2019

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Prosus: Die stormloop vir tegnologiemaatskappye

Prosus het aangekondig hy het ’n aanbod van byna R100 miljard vir die Britse kosafleweringsmaatskappy Just Eat gedoen. Just Eat het onlangs halfjaarwins van minder as £1 miljoen aangeteken, so dit gaan hier eintlik oor die koop van skaal in dié bedryf.

Die uitdaging is dat daar ’n ander aandelebod is wat Just Eat se direksie bó Prosus se kontantaanbod verkies. Prosus sal sy bod moet verbeter om minderheidsaandeelhouers te oortuig.

Prosus kan dit bekostig. Die groter prentjie is die stormloop vir lonende omset in die nuwe, tegnologiegedrewe bedrywe. Prosus is positief oor kosaflewering en meen om tuis kos te maak, sal mettertyd wees soos om jou eie klere te maak – dit sal as eienaardig beskou word. Die pad na winsgewendheid bly egter onseker, al is daar ’n lonende omset.

Altron: Wat ’n ommekeer!

Altron se resultate vir die ses maande tot einde Augustus dui op ’n ongelooflike regrukpoging. Die probleme by EOH het waarskynlik ’n bietjie gehelp, maar dit bly nogtans indrukwekkend. ’n Regrukpoging werk dikwels nie so goed soos beplan nie (dink aan Cell C vir ’n swakstegeval- voorbeeld) of neem tyd om op dreef te kom (dink Pick n Pay).

Maar Altron het in slegs twee jaar wondere verrig. Die maatskappy sê hy is ver voor met sy vyfjaarplan. Die vraag is hoeveel hoër sy wins (en aandeelprys) nog kan styg. My gevoel is dat sy winste nog oor sterk opwaartse potensiaal vir die volgende drie jaar beskik, ofskoon ’n herstel by EOH dit effens moeiliker sal maak.

Long4Life: ’n Oorwoë benadering

Long4Life* se tussentydse resultate tot Augustus was gangbaar, gesien die moeilike ekonomiese toestande. Waarvan ek tog gehou het, is dat die dividend oorgeslaan is om eerder aandele terug te koop.

Die aandele verhandel teen ’n groot diskonto op netto batewaarde (NBW), wat ryk bly aan kontant. Long4Life het die terugkoop op tot 435 sent per aandeel beklink en tot dusver byna 60 miljoen aandele opgeraap, en die getal aandele met sowat 7% verminder. Dit maak dat elke aandeel wat ons besit ’n bietjie meer van die maatskappy werd is.

Wat ons wel nie sien nie, is verkrygings deur die maatskappy. Blykbaar is die ondernemings wat te koop is, óf uitstekend maar duur, óf middelmatig en goedkoop. Dit is presies hoekom ons Brian Joffe aan die stuur wil hê. Wees eerder geduldig en soek gehalte-aandele teen ’n goeie prys as om in te storm en te koop wat jy in die hande kan kry.

Eiendom: Laaste in die ry

Balwin en Calgro M3 het albei resultate uitgereik (albei vir die ses maande tot einde Augustus), met laasgenoemde wat met verskeie nie-bedryfskwessies worstel. Balwin spog gevolglik met beter resultate as Calgro.

Nogtans is albei goed geplaas vir wanneer verbruiksbesteding verbeter. Om huis te koop, is egter iets wat in die laat stadium van ’n ekonomiese herstel gebeur, want dit vra vir groter vertroue.

Wanneer verbruikers ryker voel, begin hulle meer dikwels uiteet, koop huishoudelike toestelle en mag dalk selfs huisverbeterings aanpak.

Maar om huis te koop, moet mens ’n hoër mate van sekerheid hê. So, al lyk dié twee aandele miskien aantreklik, sal ek voorlopig nie een van hulle koop nie. Ek sal eerder wag totdat ons die laer verbruikersaandele sien beweeg. Ons kan hier begin kyk.

Clicks: Bes bestuurde JSE-aandeel

Clicks se resultate vir die jaar tot einde Augustus wys weereens waarom dit die bes bestuurde aandeel op die JSE is. Sy omset is 7,2% hoër, wesensverdienste per aandeel (WVPA) is 12,2% hoër, die dividend het met 17,1% gegroei en 19,5% meer bedryfskontant is gegenereer. Ek het al voorheen oor dié toonbeeld van bedryfsdoeltreffendhede geskryf.

Geen ander genoteerde maatskappy kom naby hom nie. Die probleem is dat mens ’n topwaardasie vir die aandeel moet betaal, aangesien hy op ’n prys-verdienste-verhouding (p/v) van meer as 35 keer verhandel (ofskoon met ’n dividendopbrengs van byna 2%, wat nie sleg is vir so ’n duur aandeel nie).

Maar nou ja, met ’n styging van sowat 38% die afgelope jaar – en byna 100% die afgelope drie jaar – demp geen vrese oor waardasies die aandeel se opbrengste nie, want beleggers is meer as tevrede om op te dok vir gehalte. Die p/v het ’n jaar gelede op 28 gestaan en was ook drie jaar gelede op 28.

So, hy het nog duurder geword. Deels is dit momentum, maar dit is ook gehalte, want baie van die genoteerde aandele sukkel terwyl Clicks eenvoudig voortstoom.

Blue Labe Telecoms: Die Cell C-ramp hou net aan

Cell C het aangekondig dat die twee broers wat Blue Label gestig het, uit die Cell C-direksie bedank het. Dit beteken inderwaarheid dat Blue Label van ’n rampspoedige verkryging wegstap. Hulle het hul aandelebesit in Cell C tot ’n nulsyfer verminder.

Sou die maatskappy geherfinansier moet word, sal Blue Label verwater word – tensy hy ook met die finansiering help. Maar dit sal nie gebeur nie, want Blue Label het nie die geld nie. So, dit was ’n groot verkryging wat nou waardeloos geword het.

Adcorp: Nie aanpasbaar genoeg nie

Adcorp was jare lank een van my gunsteling geliefde aandele op die JSE, maar het altyd teleurgestel. Toe lyk dit of sy nuwe bestuur uiteindelik ’n verskil begin maak. Die jongste resultate (vir die ses maande tot 31 Augustus) wys egter sy herstel is op ’n end, met WVPA op 5,1 sent teenoor 88,3 sent in die ooreenstemmende tydperk van 2018. Dis ’n enorme daling.

Die maatskappy blameer hoofsaaklik die moeilike ekonomiese toestande, maar dis net deels geldig. Wanneer mense nie personeellede in diens neem nie, sal ’n werwingsmaatskappy soos Adcorp wel sukkel. Ek sou egter dink sy sakemodel verg groter aanpasbaarheid – om leniger te wees in die maer jare en uit te brei wanneer die vraag terugkeer. Sy resultate dui egter op minder buigsaamheid, wat in swaar tye seer knyp.

Wanneer mense nie personeellede in diens neem nie, sal ’n werwingsmaatskappy soos Adcorp wel sukkel.

Adapt IT: Fokus op skuldafbetaling

Adapt IT se resultate vir die jaar tot einde Junie toon ’n 8%-styging in inkomste. Die groep sê inkomste uit jaargeld “bly gesond”, met ’n verbetering tot 61% op die vorige verslagdoeningstydperk, teenoor 58% in 2018.

Kontantomskepping bly indrukwekkend teen bokant 100%, terwyl WVPA met 8% gedaal het. Die maatskappy se olie-afdeling het ’n moeilike tyd agter die rug weens ’n swak lys van nuwe werk, want die bestuur het op bestaande kontrakte gekonsentreer eerder as om nuwes te vind.

Skuld het ook merkbaar toegeneem aangesien die maatskappy aandele teruggekoop het (teen hoër pryse) en skielik sy skuldooreenkomste moes verbreek. Hy het kwytskelding vir ’n jaar gekry, maar dit beteken die huidige boekjaar sal deur die terugbetaal van skuld gekenmerk word.

Nuwe transaksies is dus onwaarskynlik en ons sal sekerlik nie sien dat nog aandele teruggekoop word nie. Op ’n p/v van sowat 4,5 keer is die aandeel beslis goedkoop. In dié sektor sal dit my aandeel van voorkeur wees as ek dit met EOH vergelyk – en selfs Altron, wat op ’n baie hoër waardasie is.

Vaue Group: Hou dié dinge in gedagte

Value Group se tussentydse resultate (tot Augustus) lyk op die oog af goed, want die WVPA is 30% hoër. Die dividend het met 23% gestyg. Lees mens die resultate was dit duidelik ’n moeilike tydperk, maar nuwe kliënte en bykomende kruisverkope aan bestaande kliënte het omset en wins aangehelp.

Die onwelkome ontdekking is egter dat die effektiewe belastingkoers wat weens ’n voorsiening in vorige resultate van 29,5% tot 22,8% afgekom het, nie herhaal sal word nie.

Hoewel dit sekerlik die resultate ’n hupstoot gegee het, sal dit nie in die volgende voljaar weerspieël word nie. Ons sien ook dat kontant effens onder druk verkeer, asook koste. Die groep het ook met IFRS16 begin, wat sake kompliseer (maar ook effens help). ’n Stewige stel resultate van die groep, dus, maar nie sonder komplikasies nie

/

Capital & Counties: Gehalte sal bly

Onlangse berigte oor ’n moontlike aanbod vir Capital & Counties Properties deur ’n derde party klink sinvol, selfs al blyk die berigte later verkeerd te wees. Die groep besit gehaltebates, wat onder druk verkeer terwyl Brexit langsamerhand voortsleep na ’n einde toe. Britse eiendomme verhandel tans grootliks onderkant netto batewaarde. Brexit sal egter na die een of ander kant toe opgelos word en die gehalte-eiendomme sal bly – selfs in moeilike ekonomiese toestande. En talle is op uitstekende waardasies.

* Stuur 'n boodskap aan terugvoer@finweek.co.za

* Die skrywer besit aandele in Long4Life.

Foto’s: Shutterstock, Cell C-jaarverslag 2019, Capco-halfjaarresultate 2019

Meer oor:  Finweek  |  Aandele-Mening  |  Beleggings  |  Simon Brown
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.