Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
27 Augustus 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

CONSOLIDATED INFRASTRUCTURE

Kan val tot nul

Consolidated Infrastructure Group se aandeelprys is af tot 24c. Hierdie aandeel het in Oktober 2015 bo 3 500c verhandel, en dit dien as ’n waarskuwing dat die antwoord op die vraag “hoe laag kan hy gaan?” is altyd “nul”.


NASPERS

Teg-geveg tref JSE ook

Die Amerikaanse president Donald Trump het ’n uitvoerende bevel uitgereik wat monetêre transaksies met TikTok en WeChat verbied, maar hy het die inwerkingtreding van die bevel tot 20 September uitgestel.

Beleggers was aanvanklik onseker of die bevel na Tencent of WeChat verwys het, maar dit is later duidelik gemaak dat dit net op die mobiele toepassing betrekking het. Daar is ’n paar miljoen WeChat-gebruikers in Amerika, meestal Chinese burgers. Dit is dus nie ’n groot probleem vir WeChat nie, wat meer as ’n miljard aktiewe maandelikse gebruikers in China het.

Maar Trump se aankondiging het Naspers* en Prosus op die dag met ongeveer 5% laat daal, wat ’n nuwe drama op die internasionale handelsoorlogtoneel ontketen het. Basies brei Trump sy aanval uit na die tegnologiesektor, al verteenwoordig nie een van die toepassings ’n bewysbare veiligheidsgevaar rakende die Chinese regering nie.

Die volgende vraag is of die verbod in September sal plaasvind en hoe dit sal werk. Die groter vraag is of, en hoe, China sal reageer. Kan China ’n maatskappy soos Apple teiken en sy produkte of dienste verbied? Ek vermoed China gaan eers wag en hoop dat daar dalk ’n nuwe Amerikaanse president in Januarie volgende jaar ingesweer sal word. Boonop het China genoeg ander probleme, met Japan en Indië wat ook terugveg teen wat hulle as Chinese aggressie in Asië beskou.

Dit is dus nie ’n groot probleem vir WeChat nie, wat meer as 1mjd. aktiewe maandelikse gebruikers in China het.


JSE BPK.

Regulatoriese druk

JSE Bpk. (eienaar van die aandelebeurs) het goeie resultate gepubliseer, veral as ons verskeie eenmalige koste uitlaat. ’n Mens moet egter ook vra hoeveel die hupstoot vir inkomste weens groter bedryfsaktiwiteit tydens die markineenstorting in Maart in die nuwe boekjaar sal voortduur. Ek dink handelsvolumes sal terugsak na normale vlakke; dan bly nog die kommer oor hoe die JSE kan voortgaan om dit te laat groei.

Dit is veral die geval as jy regulatoriese druk in die vorm van die “reël van beste uitvoering” oorweeg, waaroor ek in Julie geskryf het en wat na verwagting in die eerste helfte van volgende jaar in werking gestel sal word. Ek hou nie van ’n bedryf waar regulatoriese probleme teen hom werk nie, en daarom vermy ek steeds JSE Bpk. as ’n belegging.


CITY LODGE

Die regte wiskunde

City Lodge se regte-uitgifte sal reeds voltooi wees teen die tyd wat dié uitgawe van finweek verskyn het, en ek word gevra of dit tyd is om die aandeel te koop. Dit is nie my strategie om aandele te koop wie se prys afgeding is en dan te hoop op ’n herstel nie.

Ek wag eers vir bewys van ’n herstel. Natuurlik sal ek meer betaal, maar dit verminder my risiko. Ek het besluit om noukeurig na die syfers te kyk en met behulp van die jaareindresultate tot Junie verlede jaar te probeer bepaal wanneer City Lodge weer na die gelykbreekpunt sal terugkeer. Die maatskappy het ’n inkomste van R1,5 miljard en ’n besettingsyfer van 55% gehad.

Ek het eenvoudig die besettingsyfer deur die inkomste gedeel en ongeveer R28 miljoen aan inkomste per persentasiepunt besetting gekry. Ek neem aan dat die maatskappy se koste vas is. Natuurlik is dit nie heeltemal vas nie, maar dis amper. Ek het toe die vollejaarkoste van R1 miljard vir City Lodge gebruik.

Deur R1 miljard deur R28 miljoen te deel, kry ek ’n besettingsvlak van 35,7% vir die gelykbreekpunt. Dit sluit rente, depresiasie, amortisasie, SEB-koste, belasting en dies meer uit. Maar dit gee ons wel ’n aanduiding dat ’n besettingsvlak van meer as een derde nodig is voordat die maatskappy begin geld maak.

Die vraag is dus: wanneer sal City Lodge hierdie gelykbreekbesetting bereik? Ek dink hy kan dit vir die jaar tot Junie volgende jaar doen, al is dit nie met veel nie. Ons moet egter onthou daar is nou 13 keer meer uitgereikte aandele ná die regte-uitgifte, dus sal die wesensverdienste per aandeel (WVPA) klein wees. Ek verwag mettertyd ook ’n konsolidasie van aandele. As City Lodge nie die gelykbreekbesettingsvlakke bereik nie, verwag ek ’n verdere regte-uitgifte.


ANCHOR-GROEP

Handelsyfers lyk gesond

Die Anchor-beleggingsgroep het op 13 Augustus ’n gesonde handelsverklaring vir die ses maande tot einde Junie uitgereik. Die maatskappy verwag dat sy aangepaste WVPA tussen 2% laer en 14% hoër sal wees, met ’n sprong van 13% in bates onder bestuur (BOB). Ek hou nie van aangepaste WVPA nie, want dit kan baie dinge wegsteek, maar Anchor het wel ’n ekstra inkomste van R70,4 miljoen gehad gedurende die vergelykbare tydperk sedert die beëindiging van ’n bestuursooreenkoms met Astoria.

Makelaars en batebestuurders (en die JSE) het ’n toename in handelsaktiwiteit, kliënte-registrasies en BOB-invloei beleef. Ek besit Coronation** en Purple Group**, met laasgenoemde 16% hoër sedert ek dit in Junie as ’n koop aanbeveel het; dit bly my voorkeur in dié sektor, al het die prys beweeg. Coronation behoort ook goed te vaar, met die vlak van 4 100c in ’n aantreklike koopgebied.


INPERKING

Ontspanning se vooruitsig beter

Verskeie aandele het positief gereageer op die regering se aankondiging dat inperkingsregulasies verder verslap gaan word. Die ontspanningsektor het nog ’n agterstand om in te haal, maar alkohol-aandele behoort vinnig te herstel, met Distell die plaaslike genoteerde opsie. Dobbel en ontspanning sal daarby baat vind, hoewel Distell nog ver van gewone handel is.

Die verslapte vlak 2-inperkings beteken beslis beter vooruitsigte in hierdie sektore, terwyl wegneem- en tradisionele restaurante ook beter handelstoestande sal beleef. Hierdie ontspanningsaandele sal dit egter steeds moeilik vind omdat die SA verbruiker onder finansiële druk bly.


SIBANYE-STILLWATER

Vryf hande oor dividend

Sibanye-Stillwater** het in Augustus ’n handelsverklaring uitgereik wat die aandeel met meer as 10% laat styg het om op vierjaarhoogtepunte te verhandel. Dit is presies wat jy sou verwag, aangesien die maatskappy skuld verminder en voordeel trek uit beter metaalpryse en ’n swakker rand.

Die inperking het die glans van sy omset effens verdof, maar die maatskappy verwag steeds dat WVPA vir die eerste helfte ongeveer 351c sal wees. As hy in die tweede helfte dieselfde doen en WVPA van 700c verdien, sal dit die aandeel op ’n vooruitgeskatte prys-tot-verdienste veelvoud (P/V) van minder as agt keer plaas.

As Sibanye-Stillwater die helfte van die WVPA as dividend betaal, word sy vooruitgeskatte dividendopbrengs op 4% bereken. Die vooruitgeskatte P/V en dividendopbrengs is goedkoop vir ’n mynmaatskappy wanneer kommoditeitspryse styg.


RICHEMONT

Slaan liewers dividend oor

Richemont gaan voort om skatkisbewyse uit te reik in plaas van ’n dividend in wat hy ’n “aandeelhouerlojaliteitskema” noem. Die prys moet nog bekend gemaak word en die verstryking van die bewyse (en dus die reg om Richemont-aandele te koop) is beplan vir September 2023. Ek verstaan wat hulle doen: kapitaalbeskerming tydens ’n pandemie wat groot onsekerheid bring in die mark vir luukse goedere.

Maar die maatskappy het baie kontant en het einde Maart op €2,3 miljard gesit. Daarna het Richemont in Mei ’n reeks effekte ter waarde van €2 miljard uitgereik, met vervaldatums van 2028, 2032 en 2040. Die vooruitsigte is dus baie somber en die groep tree uiters versigtig op. Maar waarom nie net die dividend heeltemal oorslaan nie? Aandeelhouers sal mos verstaan. En as die volgende drie jaar baie moeilik is, en die bewyse verval met geen waarde nie, sal dividende in elk geval nie betaal word nie.


PPC

Probleme op die vasteland

Sementvervaardiger PPC se ellendes duur voort met sy uitbreiding in Afrika wat probleme ondervind en die afdeling in die Demokratiese Republiek van die Kongo wat ’n kapitaalinspuiting nodig het. Die uitbreiding in die res van die vasteland was veronderstel om die groep teen moeilike marktoestande in SA te beskerm.

Maar PPC International (waarin die res van die Afrika-bedrywighede gehou word) het waarskynlik vars kapitaal nodig - wat PPC self nie sonder ’n regte- uitgifte kan voorsien nie. Terwyl onderhandelinge met uitleners en potensiële kapitaalverskaffers voortgaan, sal PPC waarskynlik ’n verminderde belang in PPC International besit.

En al verhandel die aandeel onder 100c, sien ek geen waarde in hierdie aandeel nie. ¦ terugvoer@finweek.co.za *finweek is ’n publikasie van Media24, ’n filiaal van Naspers. **Die skrywer besit aandele in Sibanye Stillwater, Coronation en Purple Group.

Terwyl onderhandelinge met uitleners en potensiële kapitaalverskaffers voortgaan, sal PPC waarskynlik ’n verminderde belang in PPC International besit.

* Foto’s: Gallo/Getty Images

* Foto’s: Argief

Meer oor:  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.