Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
10 September 2020

DOW JONES-INDEKS

Die fyn puntjies

Ek het al voorheen gesê die Dow Jones is die vreemdste indeks ter wêreld, aangesien hy daagliks eenvoudig die prysbeweging (net die sente, nie persentasies nie) van die 30 aandele waaruit hy bestaan, gebruik om die indeksvlak te bepaal. Hy het ook nie ’n gereelde hersieningsproses nie. Nou is daar ’n vernuwing van sy aandele weens Apple se aandeelverdeling.

Dit sal Apple se aandeelprys viervoudig verlaag, terwyl die getal aandele viervoudig verhoog word. Dit sal die tegnologiekomponent van die indeks verminder weens Apple se laer aandeelprys.

ExxonMobil, wat sedert 1992 in die Dow Jones is, vertrek saam met Pfizer en Raytheon Technologies. Nuwelinge is Salesforce.com, Amgen en Honeywell International.

Dit het op 31 Augustus in werking getree. Soos met ander indeksveranderinge, sal dit nie die indeksvlak beïnvloed nie, maar dit kan diegene wat vertrek, benadeel en diegene wat binnekom, bevoordeel.


PHUMELELA GAMING & LEISURE

Stryd in die dobbelbedryf

Dit lyk asof Phumelela Gaming and Leisure met twee aanbiedinge op die tafel uit sakeredding sal kom – een van Mary Oppenheimer Daughters, terwyl ’n gewaagde aanbod ook kom van Betfred, ’n Britse beroepswedder.

Laasgenoemde het ’n aanbodsperdatum van 1 September, maar dit sal waarskynlik opsy gedruk word of sal verval. Hoe dit ook al sy, aandeelhouers sal waarskynlik baie min ontvang, aangesien nie een, soos verwag word, iets vir huidige aandeelhouers insluit nie.


MURRAY & ROBERTS

Die byt van die korona

Murray & Roberts se resultate vir die hele jaar is ernstig getref deur die koronavirus-pandemie – met ’n geraamde impak van R622 miljoen. Sonder hierdie invloed sou die groep ’n moeilike, dog winsgewende, jaar gehad het.

Die maatskappy het sy resultate op 26 Augustus bekend gestel. Murray & Roberts se plaaslike krag- en waterinfrastruktuur-afdeling het nouliks ’n wins gemaak, aangesien die groot Medupi- en Kusile-projek vir die maatskappy nou geëindig het.

Maar die maatskappy hou die afdeling aan die gang in afwagting van nuwe projekte in die waterbedryf, wat vir baie jare lank goeie verdienste sal lewer sodra die tenders toegeken word.


STANDARD BANK

Hoe sleg is slegte skuld?

In Standard Bank se resultate vir die ses maande tot Junie het wesensverdienste per aandeel (WVPA) met 43% gedaal en is geen dividend verklaar nie (soos die SA Reserwebank vroeg in die pandemie versoek het).

Die bank se kredietverliesverhouding (slegte skuld) het van 0,76% in dieselfde tydperk verlede jaar tot 1,69% nou gestyg. Sy koste-tot-inkomste en netto batewaarde (NBW) het albei effens verbeter.

’n Kredietverliesverhouding van 1,69% tydens die streng inperking vir die helfte van die verslagtydperk is nie sleg nie, maar die vraag is hoeveel slegter dit gaan word.

Die bank het ’n ekstra R500 miljoen opsy gesit vir bykomende slegte skuld. Aangesien Liberty, waarvan Standard Bank 53,6% besit, ’n wesensverlies van meer as R2 miljard aangemeld het, was die bankgroep se algehele resultate nie sleg nie.

Daarbenewens verhandel die aandeelprys tans onder die NBW en teen die grootste afslag in twee dekades, en die aandeel lyk goedkoop. Dit is egter vir ’n rede goedkoop: die risiko van slegte skuld. ’n Kredietverliesverhouding van 1,69% tydens die streng inperking vir die helfte van die verslagtydperk is nie sleg nie, maar die vraag is hoeveel slegter dit gaan word.

Die bank het kliënte met betalingsvakansies en verlengde terugbetalingstydperke gehelp, en baie van die potensiële pyn is na die tweede helfte gestoot. Ons het dus geen duidelike idee van hoeveel van diegene wat gehelp is, nog steeds nie sal betaal nie.

Daar moet ook besef word dat verskeie leners hard probeer het om die betalings te doen, maar dat hulle steeds kan agterraak. Hoewel die aandeel dus dalk goedkoop is, is die risiko’s, veral weens van slegte skuld, ’n werklike risiko, en ek sien dus geen goeie rede om banke binnekort te wil koop nie.


BANKE

Die ergste is verby

Absa en Nedbank het nou ook resultate vir die halfjaar geëindig Junie 2020 aagekondig, en ek dink Standard Bank het die beste van die drie gevaar, hoewel al drie weens slegte skuld en ekstra skuldvoorsienings gely het.

Twee opmerkings in die uitslae het my opgeval. Absa het gesê: “Die kredietverliesverhouding van die tweede helfte sal na verwagting aansienlik verbeter, maar sal waarskynlik bo die siklussyfer van 0,75 tot een persentasiepunte bly.”

Nedbank sê: “Voorspelling in die huidige omgewing is ingewikkeld, en ramings is onderhewig aan ’n baie hoër vlak van voorspellingsrisiko as gewoonlik, maar ons glo wel dat die ergste gevolge van Covid-19 en die GIK (groot inperkingskrisis) agter die rug is en dat waardedalings in die tweede helfte laer as in die eerste helfte sal wees”.

Hoewel geen bank dus ’n goeie tweede helfte van die jaar verwag nie, verwag hulle wel dat dit beter sal wees. Dit sluit aan by die feit dat die streng inperking van April en Mei die laagtepunt was. Ek het egter verwag dat slegte skuld sal aanhou styg, veral namate betalingsvakansies begin verval. As Absa en Nedbank korrek is, is die ergste verby vir die banke – en hul aandele is baie goedkoop – met Standard Bank wat miskien selfs dividendbetalings vir die volle jaar weer sal hervat, waaroor daar in Maart verslag gedoen sal word.



INKOPIESENTRUMS

Cell C vererger die pyn

Berigte dat Cell C 128 winkels gaan sluit, sal winkelsentrums meer pyn veroorsaak. Hierdie winkels is gewoonlik klein, maar dit sal bydra tot die leegstaansyfer, en soos ek voorheen al gesê het, begin nuwe ondernemings nie tydens die inperking of terwyl verbruikers onder druk bly nie.


ARB HOLDINGS

Goeie resultate in inperking

ARB Holdings, eienaar van ARB Electrical Wholesalers en Eurolux, het die mark op 24 Augustus met sy voljaarresultate tot 30 Junie verras. Die groep se inkomste het met 13,1% gedaal, maar bruto marges het van 24% tot 25% verbeter. WVPA het met 3% gestyg, terwyl die dividend teruggehou is. ARB sit ook op R151,9 miljoen kontant, terwyl sy markkapitalisasie ongeveer R916 miljoen is.

Hoewel die inperking slegs sy laaste kwartaal beïnvloed het, was die resultate oor die algemeen goed. Met ’n prys-verdienste-verhouding van ongeveer 6,5 maal, is die aandeel goedkoop. Maar hierdie aandeel was nog altyd goedkoop, en die direksie het gesê “dit sal minstens twee tot drie jaar neem om terug te keer na die aktiwiteitsvlak voor die inperking weens die Covid-19-pandemie”.

Dit is ’n veelseggende verklaring. Namate die land weer oopmaak, moet ons onthou dat die terugkeer na die pre-pandemiese ekonomiese aktiwiteit nog ver is en dat daar selfs vir ’n goedkoop aandeel soos ARB, met ’n goeie veiligheidsmarge, ernstige risiko’s in die komende jare lê. Belangriker: Wat is nodig vir ’n hoër waardasie van die aandeel? Ek dink regtig nie dit sal binnekort gebeur nie.

“Dit sal minstens twee tot drie jaar neem om terug te keer na die aktiwiteitsvlak voor die inperking.”


GOLD FIELDS

Wins is vier keer hoër

In Gold Fields se resultate het die tussentydse WVPA viervoudig gestyg tot $0,20, terwyl ’n dividend van 160c (in rand) verklaar is. As goud die res van die jaar ongeveer $2 000 per ons bly, sal die maatskappy se tweede helfte nog beter wees. Goudmyne se aandeelpryse was egter onder druk, met plaaslike goudaandele ongeveer 20% laer.

Dit is nie onverwags nie, aangesien die aandele sedert die begin van die jaar steeds meer as 200% (in sommige gevalle selfs meer) hoër is, en baie handelaars en beleggers wins sal neem terwyl hulle kan. Ek besit Pan African Resources* as my voorkeurgoudaandeel en sal dit steeds hou ingeval goud verder styg.


ITALTILE

Toonaangewer vir die opswaai

In Italtile se jaarresultate tot 30 Junie, wat einde Augustus bekend gemaak is, het inkomste met 7% en WVPA met 22% gedaal, terwyl die maatskappy ’n dividend van 33c verklaar het, wat 20% laer as ’n jaar gelede s’n was. Die opvallende opmerking was dat die groep sy kapitaalbestedingsprogram van R800 miljoen hervat het – ’n teken van vertroue dat die ergste agter die rug is.

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Dit is ook goeie bestuur, want om te konserwatief te wees en alle kapitaalbesteding te vries, terwyl mededingers groei, kan Italtile agterlaat. Omdat Italtile gekoppel is aan verbruikersbesteding, behoort verkope aan selfdoenwerkers ’n vroeë wenner te wees namate verbruikersvertroue verbeter en mense hul woonruimtes aanpas vir die nuwe werklikheid van tuiswerk.

* Stuur 'n boodskap aan terugvoer@finweek.co.za

* Die skrywer besit aandele in Pan African Resources.

* Foto’s: Gallo/Getty Images | Argief

Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.