Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
22 Oktober 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

CAPITEC

Slegte skuld styg

Capitec* se finansiële resultate vir die ses maande tot 31 Augustus het die impak van die streng inperking en gevolglike werkverliese getoon, met slegte skuld wat tot rekordvlakke gestyg het.

Capitec het gereageer deur lenings te verminder en terugbetalings uit te stel. Hierdie uitstellings (en betalingsvakansies deur die groot banke) is kommerwekkend want dit lyk of die probleem net tot later uitgestel word.

Maar as ons aanneem dat die ergste verby is – al is dit ’n lang pad terug na ’n ekonomie voor Covid-19, sal die banke die volgende paar moeilike jare oorleef. Waardasies van die vier grotes bly goedkoop (Capitec is nooit goedkoop nie), maar moenie oorhaastig koop nie – ek dink hulle sal nog ’n jaar of langer goedkoop wees.


BARLOWORLD

Oornameteiken?

Zahid Tractor & Heavy Machinery (’n Saoedi-Arabiese maatskappy) bou sy belang in Barloworld, nou 15%, stadigaan op. Zahid Tractor & Heavy Machinery, besit deur die Zahid-groep, bedryf ’n Caterpillar-handelaarskap, motorhuuragentskap in Saoedi-Arabië en belange in groenenergie in Duitsland, asook in Kenia, sowel as ander besighede.

Waarom wil hy dus 15% van Barloworld hê? Die Zahid-groep is ’n ongenoteerde maatskappy, dus is daar min inligting oor hom beskikbaar. Maar dit lyk nie asof die groep minderheidsbelange opneem nie, en hy het die afgelope dekade wêreldwyd uitgebrei. ’n Belang van 15% is van geen waarde vir iemand soos die Zahid-groep wat nie ’n belegger is nie. Is Barloworld dalk ’n oornameteiken?


MURRAY & ROBERTS

Aton lek dalk weer sy lippe af

Gepraat van oornames, Aton se aanbod om Murray & Roberts te koop, het ’n jaar gelede op niks uitgeloop nie. Aton kan dus weer probeer – teen ’n aansienlik laer prys, aangesien Murray & Roberts nou teen ongeveer 650c verhandel. Die vorige keer het reguleerders die transaksie stopgesit, maar Aton het nie geappelleer nie en kan dalk instem om Murray & Roberts se plaaslike mynboubates te verkoop, aangesien Aton slegs sy oliebedrywighede wil hê. Persoonlik verwag ek nog ’n aanbod, maar hierdie keer teen minder as 1 000c.


MULTICHOICE

Oh là là, hier kom die Franse

’n Moontlike oorname is die nuus dat Canal+ ’n belang van 6,5% in MultiChoice verkry het. Die aankondiging op die aandelebeurs het dit vreemd gestel: “As ’n publieke maatskappy is MultiChoice gereeld in gesprek met sy strategiese vennote en voer hy ’n oop dialoog met die beleggingsgemeenskap. Die groep se beleid is om nie kommentaar te lewer nie.”

Dit lyk asof die mark glo Canal+ (wat deur die Franse Vivendi besit word) gaan ’n aanbod maak, maar ek twyfel. Eerstens laat ons wet nie buitelandse eienaarskap toe van meer as 20% in uitsaaidienste nie, wat DStv beslis is – wat nie enige moontlike oorname toelaat nie, tensy MultiChoice korporatiewe herstrukturering doen – wat nie onmoontlik is nie, maar ek dink dit is onwaarskynlik. Ek dink egter ’n strategiese vennootskap sal baie sinvol wees.

Canal+ is meestal in Franssprekende Afrikalande bedrywig, terwyl MultiChoice op Engelssprekende lande fokus. En MultiChoice bots ook met ander in die vasteland. As hulle ooreenkom om buite mekaar se gebied te bly en fliek- en sportregte te deel, sowel as oorspronklike inhoud, sal dit albei partye baat.


SASOL

Verkoop bates

Sasol het aangekondig dat hy 50% van die basis-chemikalieë-eenheid by sy Lake Charles Chemicals Project (LCCP) vir $2 miljard gaan verkoop. Na dié nuus het Sasol se aandele geval, terwyl die voornemende koper, LyondellBasell, s’n gestyg het – ’n duidelike sein van wie die mark glo die beter transaksie beklink het.

Die basis-chemikalieë-eenheid vorm deel van die $13 miljard wat aan LCCP bestee word, maar dit lyk tog of die koper ’n goeie prys gekry het. Die geld sal gebruik word om Sasol se skuld tot ongeveer $8 miljard te verminder. Maar selfs met ander verkope en besparings deur Sasol, sal ’n regte-uitgif volgende jaar steeds gedoen moet word; ’n enorme kapitaalverkryging van waarskynlik $2 miljard.

Die geld sal gebruik word om Sasol se skuld tot ongeveer $8 mjd. te verminder.


SPUR

Bemoedigende tekens

Die omset in die Spur-groep se restaurante het in September “die bestuur se verwagtinge oortref”, hoewel dit steeds swakker as die ooreenstemmende maand ’n jaar gelede was. Dit is volgens ’n handelsverslag vir die tydperk Mei tot September wat op 9 Oktober uitgereik is.

Die herstel het gewissel van The Hussar Grill op 93,7% vir September (0,2% in Mei) tot Pizza and Pasta se 63,2% (11,1% in Mei), met die gemiddelde van 74,8% (teenoor 14,3% in Mei). Ek sou gedink het die wegneem- of afleweringsopsie van pizza en pasta sou hoër syfers opgelewer het. Maar oor die algemeen is dit ’n positiewe verslag.

Die vraag is hoeveel hiervan net gekom het omdat ons almal moeg is om self te kook. Al is dit meestal om dié rede, dui dit aan Suid-Afrikaners het die vertroue om uit te eet, en dit is belangrik. Wat ons egter regtig moet sien, is hoe dit in die vakansietydperk en daarna voortduur. Nietemin is dit ’n bemoedigende teken.


FIRSTRAND

Nuwe ETN’e vir oorsese reuse

FNB het verskeie nuwe beursverhandelde wissels (ETN’e) genoteer vir Amerikaanse aandele soos Netflix, Tesla, McDonald’s, Apple, Amazon, Microsoft en Facebook. Elk van hierdie ETN’e het ’n Q- en ‘n C-weergawe. Die Q-weergawe sal nie deur die geldeenheid beïnvloed word nie, terwyl die C-weergawe veranderinge in die rand-dollarwisselkoerse sal insluit.

Hulle is ook in kleiner dele verdeel en teen 1 000c elk genoteer, dus hoef jy nie R54 000 vir ’n Amazon-aandeel te hoes nie. Vir diegene met genoeg geld in die buiteland om ’n Amazon-aandeel teen meer as $3 000 stuk te koop, dien hierdie ETN’e dus geen werklike doel nie.

Maar vir kleiner beleggers verhandel die ETN’e op die JSE in rand en is dit ’n uitstekende toevoeging tot die bestaande beursverhandelde produkte wat op die beurs genoteer is. FNB is van plan om meer van hierdie produkte mettertyd uit te reik.


PSG KONSULT

Druk van inkomstebates

In PSG Konsult se resultate vir die ses maande tot einde Augustus is wesensverdienste per aandeel (WVPA) 5% hoër en die dividend en bates onder bestuur albei 7% hoër. Die batebestuursafdeling is swaar getref met ’n 39%-daling in WVPA toe kliënte hul geld onttrek het en prestasiegelde gevolglik tot nul gedaal het. PSG Konsult het dieselfde tendens aangemeld as Anchor Securities met kliënte wat na inkomstefondse beweeg het wat laer gelde hef.

Die vraag is: wanneer sal hierdie fondse terugkeer na aandelebeleggings waar hoër gelde deur bestuurders verdien kan word? Ek sou beslis meer van die groep verwag het, veral met sy groot taknetwerk van adviseurs, maar die resultate was nietemin goed. Ek wonder net hoe lank dit sal wees voordat hulle weer sal begin verbeter.

Aanstaande jaar kan te vroeg wees, afhangend van hoe die pandemie volgende jaar ontwikkel en wanneer kliënte weer in aandele belê. Maar dit lyk asof PSG Konsult se aandeelprys momentum het en ná die resultate deur belangrike opwaartse vlakke gebreek het en na 1 000c onderweg is.

Dit lyk asof PSG Konsult se aandeelprys momentum het en ná die resultate deur belangrike opwaartse vlakke gebreek het en na 1 000c onderweg is.


AANDEELHOUER-UITBETALINGS

Moenie asem ophou nie

Verskeie lesers het my gevra of hulle iets sal terugkry uit hul beleggings in aandele soos Comair, Phumelela Gaming and Leisure, Basil Read en Intu Properties. Die kort antwoord is waarskynlik niks nie en selfs as daar ’n uitbetaling aan aandeelhouers is, sal dit min wees.

Op sy beste miskien ’n paar sent per aandeel. Skuldhouers, personeel en SAID moet eers betaal word en dan bly daar gewoonlik min oor vir aandeelhouers.


PPC

Skuld lei tot probleme

Die sementvervaardiger PPC se voljaarresultate toon ’n maatskappy wat sukkel, met skuld wat tot R5,8 miljard gestyg het. Hy het ook ’n verlies van R2,4 miljard gely terwyl sy markwaarde slegs ongeveer R1 miljard is.

Maar hy het die meeste van sy probleme uitgesorteer, behalwe vir die dollarskuld wat verband hou met die Demokratiese Republiek van die Kongo, wat nog opgelos moet word voor ’n moontlike regte-uitgifte in Maart.

’n Regte-uitgifte maak my altyd bekommerd, maar met infrastruktuurbesteding nodig vir waarskynlik ’n groot deel van ons ekonomiese herstel, kan ’n ietwat riskante spekulatiewe waagkans met PPC dalk die moeite werd wees. Afrimat is egter ’n infrastruktuurbelegging van hoër gehalte en laer risiko. ¦

* Stuur 'n boodskap aan terugvoer@finweek.co.za

* Die skrywer besit aandele in Capitec.

* Foto’s: Argief

Meer oor:  Finweek  |  Aandele-Mening
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.