Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
5 November 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

BALWIN PROPERTIES

Residensiële hupstoot

Balwin Properties se resultate toon ’n moeilike ses maande tot 31 Augustus, omdat hy gesukkel het om tydens die inperkings te werk, en wesensverdienste per aandeel (WVPA) het met 56% gedaal.

Die maatskappy het egter ’n dividend van 19,6c per aandeel verklaar, wat die vertroue van die direksie toon wat kontantvloei betref. Balwin is ook goed geposisioneer met die toename in die vraag na huise in die mark onder R1,5 miljoen weens die laagste prima-uitleenkoers (7%) in dekades.

Die maatskappy het verskeie landgoedere wat ontwikkel word, en hoewel party van hulle in die duurder kategorie is, het die vraag verbeter, en ek dink Balwin se verkope sal verbeter. Hy sal die toename in die vraag beheer deur konstruksie te verhoog, en hoewel ek Calgro M3 lank in die huisboubedryf verkies het, lyk Balwin nou na ’n beter belegging.


CORONATION

Wins sal na verwagting styg

Coronation Fund Managers* het op 14 Oktober ’n markverslag uitgereik waarin getoon word dat bates onder bestuur einde September redelik plat gebly het in vergelyking met die einde van Junie.

Daarbenewens verwag die maatskappy dat WVPA 10% tot 20% hoër sal wees, met ’n eenmalige voordeel wat die WVPA 5% tot 15% hoër sou maak indien dit verwyder word. Die maatskappy betaal byna al sy WVPA as ’n dividend, dus is die geskatte dividendopbrengs ongeveer 9,5%. Die verslag is in lyn met my verwagtinge, en hy bly een van my gunstelinge in die finansiëledienste-sektor.

Die maatskappy verwag dat WVPA 10% tot 20% hoër sal wees.


METROFILE

Uitkoop stort induie

Kort ná die verskyning van die vorige uitgawe van finweek met my aanbeveling om Metrofile* te koop, is die denoteringsaanbod van 330c teruggetrek. In ’n Sens-aankondiging op 16 Oktober is die rede hiervoor aangegee as die kopers se onvermoë om van Australië af te kom om die omsigtigheidsproses te finaliseer. Om 330c elk vir my Metrofile-aandele te kry, sou wonderlik gewees het.

Maar, soos ek vroeër opgemerk het, is die maatskappy in ’n baie beter posisie as ’n jaar gelede, met skuld wat daal, groeiende dividende en ’n gesonde sakemodel. Hoewel ek dus nie 330c per aandeel sal ontvang nie, is ek heel tevrede om my belang vir die langtermyn te hou – wat ek verkies, eerder as om in ’n denotering vir ’n vinnige paar rand te verkoop.


CAXTON

Volop kontant

Caxton het die verkoop van Octotel en RSAWeb op 16 Oktober vir R433 miljoen aangekondig. Dit kan vergelyk word met Caxton se markkapitalisasie van ongeveer R1,7 miljard. Vir die jaar geëindig 30 Junie het die maatskappy volgens sy finansiële state R1,7 miljard kontant gehad.

Die tasbare netto batewaarde ná die verkoop sal 1 434c per aandeel wees, terwyl die aandeelprys met die skryf hiervan ongeveer 460c is. Het hierdie maatskappy waarde of is dit ’n waardelokval? Die antwoord, soos ek altyd sê, is om te vra wat die waarde sal ontsluit?

’n Spesiale dividend uit die opbrengs van Octotel en RSAWeb sal beslis help. Maar miskien koop die direksie eerder ’n nuwe bate in die digitale bedryf, waar hulle bedrywighede het, al is hulle meestal gefokus op drukkery en uitgewery. Dit hang dus regtig af van wat hulle koop, en ek sal die situasie van die kantlyne af fyn dophou.


OMNIA

Landboureus blom nou geld

Omnia het die voorgestelde verkoop van sy Amerikaanse onderneming, Oro Agri, vir net minder as $150 miljoen aangekondig. Oro Agri was ’n goeie winsmaker vir die groep, maar die verkoop is teen ’n gesonde wins nadat Omnia vroeg in 2018 ongeveer $100 miljoen betaal het. Die besigheid was nie ’n kernbate vir Omnia nie, en die verkoop beteken die maatskappy se bestuur kan nou op sy bedrywighede in Suid-Afrika fokus.

Die kontant sal ook die balans versterk ná die regte-uitgifte van R2 miljard aan die einde van verlede jaar. Die bestuur het hom uitstekend van sy taak gekwyt om ’n maatskappy op die randjie van sakeredding om te draai. Die mynbou- en landboubedryf het steeds sy uitdagings, maar Omnia is goed geplaas om in ’n mate na sy vroeëre glorie terug te keer.

Hy was op ’n tydstip ’n gunstelingaandeel vir die meeste beleggers in SA maatskappye met ’n plaaslike fokus en het in 2014 teen meer as R200 per aandeel verhandel, vergeleke met R42 tans.


ETF’S

Effektefonds keer nou uit

Absa het ’n verandering aangekondig aan sy plaaslike beursverhandelde fonds (ETF) in staatseffekte, die Newfunds GOVI ETF (aandelekode NFGOVI). Hy volg die tien vernaamste staatseffekte en het in die verlede nog altyd enige uitkerings herbelê in die effekte wat uitbetaal het.

Maar van November sal hy nie meer die rente herbelê nie; in plaas daarvan sal hy dit uitkeer aan houers. In die geheel sal dit geen invloed op die totale opbrengs van die ETF hê nie, maar as jy spesifiek die uitkerings wil herbelê, kan jy na die NFILBI kyk. Hierdie ETF herbelê wel die dividende, maar hy is effens anders omdat hy in inflasiegekoppelde effekte belê eerder as in nominale staatseffekte.


CLICKS

Ware gehalte is gewoonlik duur

Clicks se jaarresultate tot 31 Augustus, wat op 22 Oktober bekend gemaak is, het weer die gehalte van hierdie maatskappy getoon. Die verkope het met 9,6% gestyg, WVPA het met 13,7% gespring en die dividend aan die einde van die jaar was 37,6% hoër, hoewel die maatskappy sy halfjaar-dividend oorgeslaan het.

Clicks het aan die einde van die jaar kontant van meer as R2 miljard gehad, met feitlik geen skuld nie. Soos altyd, sal ek egter waarsku dat die aandeel duur is – om eerlik te wees, was hy nog altyd duur. Ek het gekyk na my aantekeninge van vyf jaar gelede toe ek gesê het dat Clicks se aandele duur was teen ’n prys-verdienste-verhouding (p/v) van 27 maal. Nou is die p/v 30 keer, en die aandeelprys het oor die tydperk met 150% gestyg. Die antwoord is seker maar dat ’n mens vir kwaliteit betaal en dat ware gehalte sorg vir goeie beleggings.

Clicks het aan die einde van die jaar kontant van meer as R2 miljard gehad, met feitlik geen skuld nie.


CASHBUILD

’n Onderdrukte vraag?

In ’n bedryfsverslag vir die mark op 22 Oktober het Cashbuild gesê die inkomste vir die drie maande geëindig September (die eerste kwartaal van hul finansiële jaar) het met 22% gestyg. Dis baie, maar ek wonder wel of dit volgehou kan word want deel van hierdie toename kan toegeskryf word aan die onderdrukte vraag as gevolg van die streng inperking.

Ek dink egter baie mense wat nou van die huis af werk, was moeg vir daardie stukkende teël of ou verfwerk en het dinge self reggemaak, maar die oplewing sal ophou sodra al die opknapwerk klaar is. Die toename in huisverkope sal help, maar ek dink ons sal teen die einde van Cashbuild se finansiële jaar (Junie volgende jaar) waarskynlik net ’n inkomstestyging van ongeveer 10% tot 12% sien. Dit is nog indrukwekkend, maar nie so groot soos 22% nie.


EOH

Die mark verras

EOH se handelsverslag vir die jaar tot 31 Julie, wat op 22 Oktober uitgereik is, het die aandeelprys met meer as 17% laat gestyg. Die mark is verras deur die nuus. Hoewel EOH vir die verslagdoentydperk verliesmakend sal bly, is die kern van die verlies in die tweede helfte aansienlik kleiner as die eerste helfte, en EOH behoort winsgewend te wees in die volgende finansiële jaar wat op 31 Julie volgende jaar eindig.


DISTELL

Massiewe skuldvermindering

Distell het op 20 Oktober ’n bedryfsverslag vir die drie maande tot 30 September uitgereik. Dit het meestal goeie dinge gesê, maar een syfer was opvallend: die vermindering van netto skuld. Distell het die kwartaal met R5,9 miljard se netto skuld begin en met R4,2 miljard geëindig. Dit is ’n enorme verlaging, wat net die gevolg kan wees van kontantgenerering.

As dit voortduur, sal die skuld aan die jaareinde in Junie volgende jaar verdwyn het. Dit sal waarskynlik nie gebeur nie, omdat Distell kontant ook vir ander dinge gebruik. Dit lyk na nog ’n maatskappy wat ná die streng inperking in ’n beter toestand as voorheen is.


COMBINED MOTOR HOLDINGS

Maak gereed vir winste

Combined Motor Holdings het ’n baie moeilike resultate vir die ses maande tot Augustus gehad, omdat hy eers vroeg in Junie weer voertuie begin verkoop het. Maar wat ons hier, en in baie ander gevalle, kan sien, is dat maatskappye vanuit ’n bedryfsoogpunt uit die aanvanklike stadiums van hierdie pandemie in ’n gesonder toestand as voorheen kom.

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Koste is verlaag, verliesmakende bedrywighede is gesluit of verkoop en namate die ekonomie verbeter, sal dit in die komende jare tot beter marges en winste lei. In die geval van Combined Motor Holdings is die werklike harde werk gedoen in sy motorhuurafdeling wat nou ongeveer 50% kleiner is as voorheen, maar wat byna net soveel wins sal maak as toe hy twee keer so groot was. ¦ terugvoer@finweek.co.za *Die skrywer besit aandele in Metrofile en Coronation.

* Foto: RDF Photo vir Balwin Properties

* Foto’s: Argief | clicksgroup.co.za

Meer oor:  Finweek  |  Aandele-Mening
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.