Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
18 Maart 2021

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.Sea Harvest

’n Wonderlike klein vangs

Sea Harvest is ’n wonderlike klein onderneming in ’n bedryf waarvan ek baie hou. Vis is ’n belangrike bron van proteïene en word deur visvangregte beskerm.

Die uitdaging vir deelnemers is die verspreiding en die werklike koste van die vangs, wat hoofsaaklik deur die dieselprys aangedryf word. Felix Ratheb, uitvoerende hoof van Sea Harvest, het aan my gesê die groot uitdaging was om goedere wat normaalweg vir die gasvryheidsbedryf bestem is, na die kleinhandel te skuif, iets wat hulle goed reggekry het.

Die maatskappy se Australiese eenheid het ook ’n uitklopjaar gehad, ná ’n paar probleme in vorige jare. Op ’n p/v van ongeveer 11 maal en ’n dividendopbrengs van byna 3%, bied hy goeie waarde, veral as Sea Harvest se akwakultuuronderneming weer begin werk. Die inperkings het beteken daar was nie genoeg internasionale vlugte vir hulle om hul perlemoen uit te voer nie.

En dan het inperkings in hul bestemmingsmarkte tot restaurantsluitings gelei. Dit is ’n klein deel van die onderneming, met ongeveer 2% van die inkomste in normale omstandighede, maar dit kan in die komende jare miskien tot soveel as 5% groei. Die maatskappy het sy resultate vir die volle jaar op 1 Maart bekend gemaak.


City Lodge hotels

Hotelle se stryd

City Lodge Hotels se tussentydse resultate tot 31 Desember, wat op 26 Februarie bekend gemaak is, het ’n besetting van 18% vir die plaaslike bedrywighede getoon, ongeveer die helfte van die gelykbreekpunt. Die wesensverlies per aandeel was 54,2c, aangesien ’n kwart van hul hotelle gesluit het.

Wat my veral bekommer oor City Lodge is sy kontantposisie, wat selfs ná die massiewe regte-uitgifte ’n negatiewe R35 m. beloop.

Die huidige kalenderjaar sal maar swak wees. Dit sal nie so sleg wees soos tydens die streng inperking van die tweede kwartaal van verlede jaar nie, maar dinge bly moeilik vir besighede én ontspanning.

Dit sal ernstig wees as SA ’n derde golf van koronavirusinfeksies moet verduur. Wat my veral bekommer oor City Lodge is sy kontantposisie, wat selfs ná die massiewe regte-uitgifte ’n negatiewe R35 miljoen beloop. Met ’n negatiewe kontantvloei uit bedrywighede het hulle ’n verdubbeling van besettings nodig om gelyk te breek, en as dit nie vinnig genoeg kom nie, is die groot vraag of nog ’n regte-uitgifte nodig sal wees.

Ek was nog altyd besorg daaroor by City Lodge en dit bly die grootste risiko vir hierdie aandeel.


Aveng

Wees versigtig

Aveng se tussentydse resultate is op 23 Februarie bekend gemaak en toon weer wins. WVPA was 0,6c, en met die huidige regte-uitgifte wat aandele verdubbel het, is dit effektief 0,3c.

Verhandeling teen 3c elk, beteken ’n p/v van ongeveer tien keer. Dis goedkoop. Werksaamhede bly ’n uitdaging vir Aveng, maar hy is nou weer winsgewend.

’n Mens kan dus ’n paar sent waag as jy nie bang is vir aandele met ’n hoë risiko nie. Ek sal egter wag vir die aandeelkonsolidasie, want dis byna altyd negatief vir ’n aandeelprys, en ’n konsolidasie van sê maar 100 tot 1 sal dié waansinnige 33%-strek van ’n koop-verkoopbod kan verminder.


Spur

Wag tot winste weer kook

Spur Corporation se tussentydse resultate tot 31 Desember, wat op 2 Maart uitgereik is, was verskriklik, weens die verskillende vlakke van inperking in die ses maande tot einde Desember.

Namate die inperkingsvlakke (en alkoholverbod) strenger gemaak is, het die verkope, vergeleke met dieselfde maand in die vorige jaar, gedaal en was die totale inkomste vir die tydperk 40,2% laer. Maar die maatskappy is ’n beter onderneming as vyf of meer jaar gelede toe hy net Spur met klein pizza- en soesji-verkope aan die kant was. Spur maak steeds ongeveer 70% van franchise-inkomste uit, maar hy het nou ander handelsmerke, soos RocoMamas en Hussar Grill wat op verskeie maniere bydra, met eersgenoemde wat reeds groter is as die ouer pizza- en soesji-handelsmerke.

Ek hou van die nuwe Spur, met sy nuwe uitvoerende hoof. Maar daar sal waarskynlik nog ’n Covid-19-golf vanjaar wees en met die gevolglike inperkings sal dit nog ’n moeilike jaar wees. Spur kan miskien WVPA van 70c vir die volle jaar tot einde Junie behaal. As dinge weer normaal is, behoort Spur maklik WVPA van 250c vir die volle jaar te realiseer.

Teen die huidige aandeelprys is dit ’n vooruitgeskatte p/v van minder as agt maal. Goedkoop, maar dis beter om te wag. Laat ons die pandemie eers agter die rug kry.


JSE

Geluk, maar . . .

Die bestuurder van SA se grootste aandelebeurs het op 25 Februarie sy finansiële jaarresultate bekend gemaak. Geen verrassings nie –die JSE het goeie resultate vir verlede jaar opgelewer. Die wesensverdienste per aandeel (WVPA) het met 15% gestyg tot 936,7c, met ’n dividend van 725c. Dit plaas die aandeel op ’n dividendopbrengs van ongeveer 6% en ’n prys- verdienste-verhouding (p/v) van 12 maal, wat aandui dat die aandeel goedkoop is.

Maar hoe gaan hulle hul resultate aanhou verbeter? Verlede jaar was daar ’n geweldige markverkoop en die vinnigste herstel wat ek nog gesien het. (Miskien was 1987 s’n vinniger, maar ek was toe nog jonk en kan nie onthou nie.)

Die verkoping en herstel het groot handelsvolumes ver bo die normale gelewer, en hoewel die beurs uitstekend gevaar en die verhoogde transaksievlakke gehanteer het, sal toekomstige groei moeiliker wees en ek sal dus wegbly.


FirstRand

Doen beter as verwag

FirstRand se resultate vir die ses maande geëindig Desember, wat op 4 Maart aangekondig is, was baie beter as wat ’n mens ’n jaar gelede , met die begin van die Covid-19-pandemie, sou verwag het.

FirstRand se waardedalings het tot 1,46% gestyg teenoor 0,95% in die ooreenstemmende tydperk.

Die bank het ’n dividend van 110c per aandeel betaal, vergeleke met verlede jaar se tussentydse 146c, en afskrywings het tot 1,46% gestyg teenoor 0,95% in die ooreenstemmende tydperk. Die afskrywings is hoog, maar met die werksverliese verlede jaar, is dit heelwat minder as wat ek verwag het.

Die ander drie groot banke sal binnekort hul resultate bekend maak, en dit sal vir die volle jaar wees, dus nie direk vergelykbaar nie, maar dit lyk asof banke beter gevaar het as wat verwag is, en afskrywings is nie so erg as wat ek gedink het nie.

Standard Bank se handelsverslag was egter swakker as wat verwag is, en WVPA sal 40% tot 50% laer as in die vorige jaar wees. Standard Bank sal sy resultate publiseer tussen die skrywe hiervan en wanneer hierdie artikel verskyn.


Motus

Motorverkope herstel

Motus se tussentydse resultate vir die ses maande geëindig 31 Desember, wat op 23 Februarie bekend gemaak is, het veerkragtige voertuigverkope getoon, wat my nogal verbaas het. Dit is bevestig deur Super Group se finansiële resultate vir ses maande vir die ooreenstemmende tydperk.

Klante beweeg laer na goedkoper handelsmerke of tweedehandse voertuie, maar die verkope duur voort. Motus het ook diep besnoei in sy motorverhuringsondernemings, en hierdie sektor sal waarskynlik nog etlike jare kleiner bly. Voortgesette voertuigverkope is egter belangrik, aangesien wins uit finansieringsbedrywighede en latere voertuigdienste belangrik is.

Die ander suiwer voertuigbedryf op die JSE, Combined Motor Holdings, het ’n jaareinde in Februarie, en dit sal dus nog etlike maande wees voordat ons sy finansiële resultate sien. Die wêreldwye herstel in voertuigverkope is ook goeie nuus vir die platinumgroepmyne, aangesien die motorbedryf hul grootste mark is.


Glencore

Voorlopig veilig

Plaaslike aandele-indeksveranderinge sal by marksluiting op 18 Maart plaasvind. Die enigste veranderinge is dat Harmony Gold uit die FTSE/JSE se top-40-indeks en hulpbronne 10-indeks val. Hy word nou deur Glencore vervang.

Glencore is al lank groot genoeg om opgeneem te word, maar plaaslike reëls bepaal dat 5% van die aandele plaaslik gehou moet word, wat hy nou nakom. Die ander goudmyne is aansienlik groter, en selfs met goud wat teen ongeveer $1 700 per ons verhandel, sal hulle nou geruime tyd veilig wees.


Impala Platinum

Heelwat kontant hier

Met kommoditeitspryse meestal op rekordvlakke was Impala Platinum se resultate, wat op 25 Februarie bekend gemaak is, geen verrassing nie. Maar die dividend van 1 000c was die grootste sedert 2008, en dié keer is dit ’n tussentydse dividend, terwyl 2008 s’n vir die volle jaar was.

Impala het ook verhoogde produksie aangekondig, maar ’n ekstra 360 000 onse is slegs ongeveer 5% van sy jaarlikse produksie en sal nie juis die mark beïnvloed nie. Daarbenewens moet myne voortdurend produksievermoë verhoog, om te vergoed vir wat gemyn is, en versigtige toevoegings kan pryse ’n redelike tyd lank hoog hou.

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Ek hou nog baie van platinumgroepmetale, met Sibanye-Stillwater* my gunsteling onder hulle.

* Boodskap aan terugvoer@finweek.co.za

* Die skrywer hou aandele in Sibanye-Stillwater.

Foto’s: Argief, clhg.com, Motorpress, Impala Platinum Holdings

Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.