Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
28 Mei 2021

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

ASTRAL

Mieliepryse éét marges

In Astral se resultate vir die ses maande tot einde Maart het inkomste met 7% gestyg, maar wesensverdienste per aandeel was 37% laer. Astral het wel ’n dividend van 300c per aandeel betaal, maar hoë insetpryse vir mielies benadeel die marges. Die aandeelprys het vanjaar ’n bietjie geloop, maar is steeds ver weg van die byna R350-vlak van vroeg in 2018.

Vir beleggers is dit ’n geval van wag dat plaaslike mieliepryse laer begin beweeg na die ideale vlak van net meer as R2 000 per ton. Daar maak Astral lekker geld, maar ek verwag nie dat mielies hierdie seisoen veel sal daal nie, dus sal ons vir die volgende plantseisoen moet wag om ’n aanduiding van die mieliepryse te kry.


PICK N PAY

Apteke-skuif is winsmedisyne

Die aankondiging dat Pick n Pay sy 25 apteke in sy winkels aan Clicks gaan verkoop, maak vir my baie sin. Pick n Pay kon nie die apteke laat werk nie, en met Clicks wat die apteke in Pick n Pay-winkels sal bestuur, sal Pick n Pay steeds die voordeel geniet van verkope van medisyne oor die toonbank en mense in sy winkels.

Clicks sal baie lae marges op die apteke kry, maar sal ook meer produkte deur sy groothandelsafdeling, United Pharmaceutical Distributors, kan verkoop. Weer eens nie groot marges nie, maar skaalvoordele sal die wins verbeter.


ASCENDIS HEALTH

Skuldvry, maar lang pad lê voor

Ascendis Health het daarin geslaag om bankrotskap af te weer en het ingestem om sy beste bates, waaronder Remedica en sommige kleineres, aan sy kredietverskaffers te verkoop in ruil vir hul skuld van €400 miljoen. Hierdie skuld het die maatskappy elke ses maande ongeveer R250 miljoen gekos, en hy was totaal bankrot.

Nou het Ascendis die skuld uitgewis en geld gekry vir toekomstige bates, maar hy het nie veel oor behalwe ’n paar klein ondernemings in Suid-Afrika nie. In wese begin hy as ’n nuwe maatskappy en moet Ascendis nuwe besighede koop of opbou. Dit gaan ’n baie lang pad vir die onderneming sowel as sy aandeelhouers wees.


ANGLO AMERICAN

Risiko van ’n klein belang

Anglo American het aandeelhouersgoedkeuring om sy steenkoolbates in Thungela Resources te ontplooi, en teen marksluiting op 7 Junie sal Anglo-aandeelhouers Thungela-aandele besit.

Anglo-aandeelhouers sal een nuwe Thungela-aandeel ontvang vir elke tien Anglo American-aandele wat hulle besit. Die risiko vir aandeelhouers is dat as jy ’n ordentlike belang in Anglo American besit, jou Thungela Resources-belang baie beskeie kan wees.

Honderd Anglo-aandele is byvoorbeeld ongeveer R70 000 werd, maar aandeelhouers sal net tien nuwe Thungela Resources ontvang. Met ander woorde, daar is ’n risiko dat jy ’n klein getal aandele sal ontvang wat onekonomies sal wees om te verkoop as jou aandelemakelaar minimum transaksiewaardes het.

Daar is ongelukkig geen maklike oplossing nie, behalwe om Anglo voor die ontknoping te verkoop (wat soos ’n verkeerde rede lyk om ’n goed geplaaste kommoditeitsaandeel te verkoop) of om meer Thungela-aandele ná notering te koop.


TFG

Omset verhoog deur Jet

TFG het ’n handelsverslag van sy finansiële resultate vir die vierde kwartaal en die volle jaar geëindig Maart uitgereik. Omset het in die afgelope kwartaal met 6% gegroei, en met Jet Stores se verkryging het verkope met 21% gestyg.

Maar die volle jaar sluit die tyd van die streng inperking en ’n waardedaling van R2,7 miljard vir sy Britse bedrywighede in. TFG se wesensverdienste per aandeel kan tussen 75% en 85% laer wees, maar ek hou van die besigheid, en Jet is ’n goeie verkryging.

Omset het in die afgelope kwartaal met 6% gegroei, en met die onlangse verkryging van Jet Stores het die verkope met 21% gestyg.


GOUD

Rand bly ’n rem vir goudprys

Ek het regtig gedink dat goud verlede jaar sy jaar gehad het, en ek het verwag dat hy vanjaar sou terugsak. Maar voortgesette inflasievrese en algemene positiewe kommoditeitspryse het goud op $1 850 per ons gesien, en dit lyk eintlik meer asof hy hoër eerder as laer gaan beweeg.

Die kommer vir goudmynbeleggers is dat myne nie reageer nie. Die probleem is eenvoudig: die randsterkte het die randprys van goud vanjaar ongeveer 10% swakker gemaak.

Ek verwag dat die rand sterk sal bly, en wat myne dus regtig nodig het, is ’n sterk lopie in die goudprys. Persoonlik verkies ek die platinumgroepmetale vir blootstelling aan kommoditeite.


KAAP AGRI

Pluk vrugte

Kaap Agri is nog ’n aandeel wat ek vroeër vanjaar aanbeveel het, en sy finansiële resultate was goed, met brandstofverkope wat uiteindelik begin regkom het. Die besigheid bestaan nou ongeveer driekwart uit kleinhandel, maar is steeds gemik op boerderygemeenskappe wat voordeel trek uit die hupstoot van sagtekommoditeitspryse.

Soos baie aandele was hy laat verlede jaar en vroeg vanjaar goedkoop. Selfs nadat hy gestyg het, is die aandeelprys nog nie duur nie, en ek sal voortgaan om hom nog vir een of twee stelle resultate te hou.


REVEGO

Notering is van die baan

In die uitgawe van 14 Mei het ek gesê dat ek van Revego hou en dat ek aansoek gedoen het vir ’n toekenning tydens sy boekbou-oefening. Wel, blykbaar kon hy nie genoeg belangstelling kry nie, en die notering is gevolglik gekanselleer.


MTN

Sterk groei

MTN het ’n sterk handelsverslag vir die kwartaal tot Maart gepubliseer. Ek het in Februarie vanjaar gesê ek hou van die aandeel (teen ongeveer R70) en hoewel hy tot sowat R100 per aandeel gestyg het, bied hy steeds waarde. Soos ek al voorheen gesê het, wil ek sien dat hierdie telekommunikasie-aandele soos nutsmaatskappye geprys moet word.

Al is daar baie opgewondenheid rondom mobiele geldbankdienste, sal die marges in ’n ongelooflik mededingende bedryf klein wees. Daarbenewens sal MTN sy dividend repatrieer. Die risiko is altyd ’n landrisiko, wat MTN baie beter bestuur sedert die Nigeriese mislukking in 2015.


NASPERS

Moet jy verruil of nie?

Naspers* en Prosus probeer weer om die diskonto op hul aandeelpryse tot dié van hul Tencent-aandeel te verlaag. Dié keer bied Prosus aan om Naspers-aandele vir nuwe Prosus-aandele te verruil.

Dit sal die getal vrylik verhandelbare Prosus-aandele verhoog en die gewig van Naspers in plaaslike indekse verminder. Dié gewigsvermindering behoort ’n impak op die diskonto te hê, omdat die huidige 20%-gewig van Naspers in die FTSE/JSE se top-40-indeks beteken dat fondsbestuurders nie ’n volle gewig daaraan kan toeken nie. Die reëls vir kollektiewebeleggingskemas beperk die toewysingspersentasie per aandeel in ’n portefeulje, wat beteken dat fondse nie hul volle gewig in ’n aandeel kan hê nie. En ek praat nie eers van ’n geval van oorgewig in die aandeel te wees nie.

Dus is byna elke fonds ondergewig in Naspers, en daarom duur die diskonto op netto batewaarde hardnekkig voort. Maar onthou, as jy jou Naspers-aandele vir Prosus-aandele verruil, sal jy kapitaalwinsbelasting (KWB) moet betaal, al kry jy geen kontant om dit te betaal nie. Ek stel dus voor dat jy seker maak die KWB-wins is onder die vrystellingvlak van R40 000 per jaar, of anders moet jy die Naspers-aandele hou.


SAB

Wees versigtig

SAB se nuwe Zenzele Kabili-bemagtigingskema word later vandeesmaand genoteer, en baie kwalifiserende beleggers is gretig om te belê ná die groot sukses van die vorige skema. Maar onthou dat AB InBev SAB Miller tóé teen ’n goeie prys gekoop het. Wees dus in jou pasoppens. Opbrengste sal miskien dié keer nie so skouspelagtig wees nie.


LONG4LIFE

Verkoop?

Long4Life verhandel steeds teen ’n groot diskonto op sy netto batewaarde, en dit beperk sy vermoë om oornametransaksies te dryf. Dit is omdat ’n maatskappy nie verdiskonteerde aandele wil gebruik om bates te koop nie, maar liewer aandele wat teen ’n premie verhandel.

Brian Joffe, Long4Life se uitvoerende hoof, sê hy wil ’n samesmelting van gelykes doen wanneer hy nuwe ondernemings verkry, met ander woorde teen ’n diskonto. Maar ek kan nie sien hoe dit kan gebeur nie. Hy moet bates verkoop en kontant aan aandeelhouers gee, of hy moet die groter bates (soos Holdsport) ontknoop.

Hoe dit ook al sy, die idee agter Long4Life het misluk, en die maatskappy sal vroeër of later gelikwideer moet word. Diegene wat vertrou op Joffe se transaksievermoë, kan hou en kyk of hy die diskonto kan laat krimp, maar ek het verkoop. Ek sien geen realistiese kans dat daardie diskonto aansienlik sal krimp nie.

* Stuur 'n boodskap aan terugvoer@finweek.co.za

* finweek is ’n publikasie van Media24, ’n filiaal van Naspers.

* Foto’s: Shutterstock, Gallo/Getty Images

Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.