Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
11 Junie 2021

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

HOSPITAALGROEPE

Geen teken van herstel nie

Die resultate van die plaaslike hospitaalgroepe was somber, aangesien elektiewe chirurgie, die hoofbron van inkomste, steeds onder druk is weens die pandemie.

Ek hou al lank nie van die hospitaalsektor nie weens die risiko van regulering weens prysstygings wat inflasie in die afgelope dekade ver vooruit was. Al drie genoteerde hospitaalgroepe, naamlik Mediclinic, Life Healthcare en Netcare, verhandel teen laagtepunte met die aandeelpryse waar dit ongeveer tien jaar gelede was.

Maar al drie het ook rampspoedige oorsese petaljes gehad, met Mediclinic die laaste een wat daar die handdoek ingegooi het. Mediclinic het ’n aanbod vir sy belang in Spire Health (hy besit 29,9%) teen £2,40 per aandeel ontvang.

Mediclinic het die aanbod aanvaar en sal ’n netto £287,7 miljoen ontvang, nadat hy £432 miljoen in 2015 daarvoor betaal het. Die mark hou van die transaksie, al is dit ’n groot verlies. Maar ek bly steeds ver weg van dié deel van die gesondheidsorgsektor.


CASHBUILD

Terugslag

Die Mededingingskommissie het op 28 Mei aanbeveel dat die transaksie waardeur Cashbuild vir The Building Company van Pepkor sou koop, verbied moet word. Dit is ’n groot terugslag vir albei partye, maar dis waarskynlik ’n groter terugslag vir Pepkor.

Cashbuild het ’n sterk voetspoor, hoewel The Building Company verskeie nuwe provinsies sou bygevoeg het. Dit was ’n groot transaksie, en my mening is dat dit selde die beloofde sinergieë behaal; daarom is aandeelhouers waarskynlik beter daaraan toe.


AFRIMAT

Verdienste styg

Afrimat se resultate vir die jaar tot einde Februarie was geen verrassing nie, want dit is so dat die ysterertspryse steeds help om die maatskappy se netto wins uit te bou.

Die Demaneng-ysterertsmyn het ’n bedryfswins van R734,7 miljoen bygedra tot die groep se bedryfswins van R886,3 miljoen. Natuurlik beteken dit ’n verhoogde risiko vir die oomblik wanneer ysterertspryse begin daal, wat beslis sal gebeur. Maar bouaktiwiteite neem plaaslik toe, en Afrimat het ’n ooreenkoms aangekondig om mangaanmynregte vir R650 miljoen te koop om tot hul droë grootmaatbedrywighede by te voeg.

Hierdie nuwe myn sal ook ’n vlak oopgroefmyn wees en behoort laat volgende jaar in bedryf te wees. Teen ’n huidige aandeelprys van R 51,90, het Afrimat ’n prys-verdienste-veelvoud (p/v) van minder as 12 maal, wat billike waarde is. Maar met die risiko van ystererts is ek nie haastig om te koop nie. Ysterertspryse kan in die volgende jaar maklik halveer, hoewel dit steeds winsgewend sal wees.


DISTELL

Wat broei nou daar?

Distell se aankondiging op 18 Mei dat die Nederlandse brouery Heineken “die meerderheid van Distell se besigheid” wil koop, was sonder besonderhede, maar ironies.

Middel verlede jaar het Heineken plaaslike uitbreidingsplanne ter waarde van R6 miljard gekanselleer weens die regering se alkoholverbod. Maar dit was maar net groot besigheid wat sy spiere bult in die strewe na winste – amper ten koste van enigiets anders. Die vraag is: Wat beteken “meerderheid”? Wil Heineken Distell oorneem en denoteer, of wil hy net ’n belang van 50% plus een stem kry?

Of wil Heineken dalk net Distell se siderbedrywighede koop? Remgro en die Openbare Beleggingskorporasie besit elk net meer as 31% van die aandele. Distell het egter spesiale nie-ekonomiese B-aandele met ’n hoë stemreg wat Remgro besit, wat laasgenoemde 56% van die stemreg gee.

Die transaksiemaker hier is dus Remgro. Aangesien hy probeer om waarde te ontsluit deur die diskonto op sy aandeelprys tot sy netto batewaarde (NBW) te verklein, en Distell ongeveer 10% van die netto batewaarde uitmaak, sal hy miskien graag verkoop, al presteer Distell baie goed.


SANTOVA

Stewige syfers

Sy wesensverdienste per aandeel het met ’n 15,4% gestyg, met buitelandse verdienste op 91% van die totaal.

Santova het goeie resultate gelewer vir die jaar tot einde Februarie.

Sy wesensverdienste per aandeel het met 15,4% gestyg, met buitelandse verdienste op 91% van die totaal. Santova het sowat 20 miljoen aandele wat hy sedert 2014 gekoop het, gekanselleer.

Dit laat net meer as 151 miljoen aandele oor. Santova sê ook die onlangse onderbrekings in die verskaffingsketting sal waarskynlik vir die res van vanjaar voortduur. Dit sal verdienste help, omdat onderbrekings pryse kan verhoog.

Ek het ’n fout gemaak met my beoordeling hier omdat ek baie minder wêreldwye vragverkeer verwag het. Teen ’n aandeelprys van sowat 330c en ’n toekomstige p/v van minder as ses maal, bied die aandeel egter ongetwyfeld goeie waarde.


CALGRO EN BALWIN

Hou resultate dop

Calgro M3 en Balwin Properties het op 17 Mei hul finansiële resultate vir die jaar geëindig Februarie gepubliseer. Albei resultate was moeilik, al styg huisverkope by mense met laer inkomste. Die probleem was dat albei tydens die inperking drie maande sonder aktiwiteit ervaar het. Ek hou van albei maatskappye, hoewel hulle verskille het.

Calgro werk in die lae-inkomstemark met huise wat vir ongeveer R500 000 verkoop (dus ’n verbandterugbetaling van ongeveer R4 000 per maand), terwyl Balwin in die mark is met effens hoër inkomste waar huise vir R1 miljoen tot R2,5 miljoen verkoop.

Ek sal nie enigeen van hierdie maatskappye se aandele vinnig koop nie, maar ek het albei op my waglys en sien uit na hulle tussentydse finansiële resultate in November. As daar positiewe prysbewegings is, sal ek ’n posisie in albei begin opbou. Normaalweg sou ek kies tussen twee soortgelyke aandele, maar hier is daar genoeg verskille sodat albei my interesseer. Balwin is miskien beter geposisioneer vanuit ’n markperspektief en kan vroeër beter vaar.


ADAPT IT

Huge verhoog die aanbod

Die oorname van Adapt IT deur die Huge-groep het nou net interessanter geraak, met Huge wat op 28 Mei sy aanbod van 0,9 Huge-aandele per Adapt IT-aandeel tot 1,37 Huge-aandele per Adapt IT-aandeel verhoog het.

Daar is natuurlik nog die Volaris-groep se 650c-kontantaanbod wat vaste beloftes van 44,4% van Adapt IT-aandeelhouers het om te verkoop.

Huge sê 909c is eintlik die aanbodprys (Huge-aandele), wat die boonste punt is van die bestek van billike waarde van 700c tot 909c wat voorgestel is deur ’n onafhanklike deskundige wat Adapt IT se direksie aangestel het. Daar is natuurlik nog die Volaris-groep se 650c-kontantaanbod wat vaste beloftes van 44,4% van Adapt IT-aandeelhouers het om te verkoop.

Wat nou? Die kwessie is waarskynlik die fyndruk in daardie vaste beloftes wat dikwels verval as daar ’n hoër aanbod is, maar ons het geen kennis van die voorwaardes nie, en die aandeelhouers is tans effens rigtingloos. Ek het nie een van die aandele nie, maar as ek gehad het, sou ek ’n kontantaanbod verkies.

Maar ek sou ’n hoër prys wou hê as wat Volaris aanbied, aangesien dit onder die aanbevole billike waarde is. Sonder ’n hoë kontantaanbod sou ek die Adapt IT-aandele hou, hoewel dit onwaarskynlik is met twee belangstellendes wat toekyk.


CORONATION

Markte goed vir verdienste

Coronation Fund Managers* se finansiële resultate vir die jaar geëindig 31 Maart en wat op 25 Mei bekend gestel is, was so goed as wat ’n mens verwag as die markte loop. Hoër markte sien ’n onmiddellike toename in winste omdat die bates onder bestuur toeneem, sowel as die basiskoste wat die fondsbestuurders vra. Coronation het voordeel getrek uit prestasiegelde, wat tot die maatskappy se netto wins bydra.

Die maatskappy waarsku dat hy dalk die hoogtepunt van prestasiegelde bereik het, maar dit behoort minstens nog ’n jaar of twee te hou. Mededingers Quilter en Ninety One trek ook albei voordeel uit hierdie toename in verdienste.


HANDELAARS

Volgende paar maande kritiek

Kleinhandelaars soos Mr Price, Lewis en Pepkor se finansiële resultate was sterk omdat kliënte die afgelope ses maande blykbaar goedkoper in die mark gekoop het. Die groter vraag is hoeveel van die verkope gekom het van mense wat nie tydens die streng inperking van verlede jaar kon bestee nie.

Tweedens, wat van die ekstra maatskaplike toelaes (wat nou verval het) en afleggingspakkette wat miljarde rande in die ekonomie gepomp het? Die volgende ses maande gaan die ware toets vir hierdie plaaslike nie-voedselkleinhandelaars wees.

* Stuur 'n boodskap aan terugvoer@finweek.co.za

* Die skrywer het aandele in Coronation Fund Managers.

* Foto: Gallo/Getty Images

* Foto’s: calgrom3.com | Verskaf | Shutterstock

Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.